கெமிஸ்ட்ரியா… கம்ஃபோர்ட்டா? ‘#Love’ டிரெய்லர் வெளியீடு!

deccanwebtv Sep 28, 2026

சௌந்தர்யா ரஜினிகாந்த் ஷோ-ரன்னராகவும் தயாரிப்பாளராகவும் பணியாற்ற, பாலாஜி மோகன் இயக்கத்தில் நவீன காதல் மற்றும் உறவுகளை மையமாகக் கொண்டு உருவாகியுள்ள ‘#Love’ வெப் சீரிஸின் டிரெய்லர்  வெளியிடப்பட்டது.

அர்ஜுன் தாஸ் மற்றும் ஐஸ்வர்யா லட்சுமி முன்னணி கதாபாத்திரங்களில் நடித்துள்ள இந்தத் தொடர், இன்றைய டிஜிட்டல் உலகில் காதல், டேட்டிங், உறவுகள் மற்றும் உணர்வுகள் எப்படி மாறியிருக்கின்றன என்பதை நகைச்சுவையுடனும் உணர்வுப்பூர்வமாகவும் பேசுகிறது.

சென்னையில் நடைபெற்ற ‘#Love’ தொடரின் டிரெய்லர் வெளியீட்டு விழாவில் படக்குழுவினர் மற்றும் திரையுலகைச் சேர்ந்த பிரபலங்கள் கலந்துகொண்டு தொடரைப் பற்றிய தங்களது கருத்துகளைப் பகிர்ந்துகொண்டனர்.

இந்நிகழ்வினில்

நெட்ஃப்ளிக்ஸ் நிறுவனத்தைச் சேர்ந்த மோனிகா ஸ்ரீவாஸ்தவ் பேசியதாவது..,

“நெட்ஃப்ளிக்ஸின் முதல் தமிழ் காதல் டிராமா தொடராக ‘#Love’ உருவாகியுள்ளது. தென்னிந்தியக் கதைகளில் நெட்ஃப்ளிக்ஸ் தொடர்ந்து அதிக கவனம் செலுத்தி வருகிறது. குறிப்பாக தமிழ் படைப்புகளில் வித்தியாசமான கதைக்களங்கள், தனித்துவமான குரல்கள் மற்றும் புதிய அணுகுமுறைகளை வழங்க விரும்புகிறோம். அந்த வகையில் ‘#Love’ காதல் கதையை நவீனமான மற்றும் விளையாட்டுத்தனமான பார்வையில் சொல்லும் படைப்பாக அமைந்துள்ளது.

‘#Love’ தொடரில் இரண்டு போட்டியாளர்களான டேட்டிங் ஆப் நிறுவனர்கள் இடம்பெறுகின்றனர். ஒருவர் காதல் என்பது பொருத்தத்தை அடிப்படையாகக் கொண்டது என நம்புகிறார்; மற்றொருவர் கெமிஸ்ட்ரிதான் முக்கியம் என்கிறார். தங்களது கருத்து சரி என்பதை நிரூபிக்க இருவரும் போட்டியில் இறங்கும் நிலையில், காதல் அவர்களது திட்டங்களையே மாற்றுகிறது. டேட்டிங் ஆப்களை பயன்படுத்தியிருக்கிறோமா இல்லையா என்பதைத் தாண்டி, காதல் குறித்த நம்முடைய எண்ணங்களை சில நேரங்களில் காதலே மாற்றிவிடும் என்பதை இந்தத் தொடர் பேசுகிறது.

இந்தத் தொடரை உருவாக்கிய இயக்குநர் பாலாஜி மோகன், அன்றாட உறவுகளில் இருக்கும் உண்மையான விஷயங்களை தனக்கே உரிய நகைச்சுவையான பார்வையில் சொல்லும் திறமை கொண்டவர்.

ஷோ-ரன்னரும் தயாரிப்பாளருமான சௌந்தர்யா ரஜினிகாந்த், ஆரம்பம் முதலே தெளிவான பார்வையுடன் ‘#Love’ தொடரின் உலகத்தை உருவாக்கியுள்ளார். எழுத்தாளர் நிர்மல் வில்லியம்ஸ், இணை எழுத்தாளர்கள் ஷரதா சுப்ரமணியன், ஸ்வேதா சக்ரவர்த்தி, இசையமைப்பாளர் ஷான் ரோல்டன், எடிட்டர்கள் சாய் முத்துராமன், சிவா உள்ளிட்ட அனைவருக்கும் நன்றி.

மேத்யூ மற்றும் தாரா கதாபாத்திரங்களில் நடித்துள்ள அர்ஜுன் தாஸ் மற்றும் ஐஸ்வர்யா லட்சுமி ஆகியோரின் கெமிஸ்ட்ரி இந்தத் தொடரின் முக்கிய பலமாக அமைந்துள்ளது. ஒவ்வொரு முறையும் பார்வையாளர்களுக்கு வித்தியாசமான உலகம் மற்றும் உணர்வை வழங்க வேண்டும் என்பதே நெட்ஃப்ளிக்ஸின் நோக்கம் என்றும், அந்த வகையில் ‘Love’ சமகால இளைஞர்களின் காதல் மற்றும் உறவுகளை பிரதிபலிக்கும் படைப்பாக இருக்கும் அனைவருக்கும் நன்றி, “என்றார்.

ஷோ-ரன்னராகவும் தயாரிப்பாளராகவும் பணியாற்றியுள்ள சௌந்தர்யா ரஜினிகாந்த் பேசியதாவது,

“இன்று எங்கள் அனைவருக்கும் மிகவும் சிறப்பான நாள். என்னை நம்பி இந்தக் கதையை வழங்கிய நெட்ஃப்ளிக்ஸ் நிறுவனத்திற்கும், குறிப்பாக மோனிகாவுக்கும் எனது நன்றியைத் தெரிவித்துக் கொள்கிறேன். மும்பையில் ‘#Love’ தொடருக்கான வாசிப்பு நிகழ்வு நடைபெற்றபோது அவருடன் இருந்த அனுபவம் எனக்கு மிகவும் சிறப்பானது. என்னை ஒரு சிறந்த தயாரிப்பாளராகவும், சிறந்த கதை சொல்லியாகவும் உருவாக அவர் அளித்த உத்வேகம் மறக்க முடியாதது.

நான் அதிகமான விஷயங்களால் எளிதில் வியப்படைவதில்லை. ஏனென்றால், நான் தலைவரின் மகள். அனைவராலும் போற்றப்படும் ஒருவருடன் வாழும்போது, மற்றவர்களைப் பார்த்து வியக்கும் பழக்கம் குறைந்துவிடும். ஆனால் மோனிகா என்னை மிகவும் வியக்க வைத்தவர். அவர் ஒரு சிறந்த தலைவர், மிகப்பெரிய உத்வேகம் தருபவர். நெட்ஃப்ளிக்ஸ் நிறுவனத்திற்காக தயாரிப்பாளராகவும் ஷோ-ரன்னராகவும் பணியாற்றும் வாய்ப்பை வழங்கியதற்கு அவருக்கு நன்றி. அதேபோல், ஒவ்வொரு கட்டத்திலும் என்னுடன் பயணித்த அபிஷேக் மற்றும் சுதான்ஷு ஆகியோருக்கும் நன்றி தெரிவித்துக் கொள்கிறேன்.

நெட்ஃப்ளிக்ஸ் ஒரிஜினல் தொடரின் ஷோ-ரன்னராகவும் தயாரிப்பாளராகவும் இருப்பது எனக்கு மிகப்பெரிய பொறுப்பு. ‘ஸ்பைடர்மேன்’ படத்தில் வரும் ‘With great power comes great responsibility’ என்ற வசனம் உண்மைதான். ஒரு கதையை ஆரம்பத்திலிருந்து இறுதிக்கட்டம் வரை கொண்டு செல்வது என்னுடைய பொறுப்பாக மாறியது. அந்தப் பயணத்தில் பல கடினமான முடிவுகளை எடுக்க வேண்டியிருந்தது. எடுத்த முடிவுகளில் உறுதியாக இருப்பதோடு, தேவையான நேரத்தில் அவற்றை மாற்றிக்கொள்ளவும் கற்றுக்கொண்டேன்.

இறுதியில், இந்தத் தொடரை நாங்கள் நினைத்த இடத்திற்கு சரியாகக் கொண்டு சேர்க்க வேண்டும் என்பதுதான் எங்களது ஒரே நோக்கமாக இருந்தது. இந்தப் பயணத்தில் நான் கற்றுக்கொண்ட மிகப்பெரிய விஷயம், முடிவுகளை எடுப்பது கடினமாக இருந்தாலும், சரியான நேரத்தில் அந்த முடிவுகளை எடுக்க வேண்டும் என்பதுதான். ‘#Love’ தொடரின் டிரெய்லரையும், தொடர்ந்து முழுத் தொடரையும் ரசிகர்கள் பார்க்க ஆவலுடன் காத்திருக்கிறேன்”

இயக்குநர் பாலாஜி மோகன் பேசியதாவது..,

“காதல் என்பது உலகில் யாராலும் முழுமையாக புரிந்துகொள்ள முடியாத ஒரு விஷயம். அதனால்தான் நான் மீண்டும் மீண்டும் காதலைப் பற்றி கதைகள் சொல்லி வருகிறேன். ஆண்கள் பெண்களைப் பற்றியும், பெண்கள் ஆண்களைப் பற்றியும் தெரிந்துகொள்வது என்பது பல தலைமுறைகளாக தொடர்ந்து கொண்டிருக்கும் ஒரு பயணம். இன்னும் பல ஆண்டுகள் சென்றாலும் காதலை முழுமையாக புரிந்துகொள்ள முடியாது என்பதுதான் அதன் சிறப்பு.

காதலைப் பற்றி எனக்கு எல்லாம் தெரியும் என்பதற்காக நான் தொடர்ந்து அதைப் பற்றி பேசவில்லை. உண்மையில், எனக்கும் காதலைப் பற்றி முழுமையாக எதுவும் தெரியாது. மற்ற அனைவரையும் போலவே நானும் தொடர்ந்து அதை புரிந்துகொள்ள முயற்சித்துக் கொண்டிருக்கிறேன். அதுதான் காதலை எப்போதும் சுவாரஸ்யமாகவும், புதுமையாகவும் வைத்திருக்கிறது. அதனால்தான் காதல் கதைகளை தொடர்ந்து திரையில் சொல்ல வேண்டும் என்ற ஆர்வம் எனக்கு இருக்கிறது.

என்னுடைய படைப்புகளைப் பார்த்து ரசிகர்கள் காதல் குறித்து பல விஷயங்களை கற்றுக்கொள்கிறார்கள் என்று கூறுவது மகிழ்ச்சியாக இருக்கிறது. அதே நேரத்தில், திரைப்படங்களில் வரும் காதல் கதைகளைப் பார்த்து நிஜ வாழ்க்கையிலும் அதேபோன்ற எதிர்பார்ப்புகளை உருவாக்கிக் கொள்ளக்கூடாது என்பதில் கவனமாக இருக்கிறேன். முடிந்தவரை என்னுடைய கதைகளை நிஜ வாழ்க்கைக்கு நெருக்கமாகவும், அதே நேரத்தில் பார்வையாளர்கள் கனவு காணவும், தங்களுடன் தொடர்புபடுத்திப் பார்க்கவும் முடியும் வகையிலும் உருவாக்க முயற்சிக்கிறேன்.

அந்த வகையில்தான் ‘Love’ தொடரையும் உருவாக்கியுள்ளோம். காதலைப் பற்றிய சில கனவுகளையும், நிஜ வாழ்க்கைக்கு நெருக்கமான உணர்வுகளையும் இணைத்து இந்தக் கதையை சொல்ல முயற்சித்திருக்கிறோம். பார்வையாளர்கள் இந்தத் தொடரைப் பார்க்கும்போது தங்களது அனுபவங்களுடன் தொடர்புபடுத்திப் பார்க்க முடியும் என்று நம்புகிறேன்”

தொடர்ந்து, ‘#Love’ தொடரில் காதலுக்கு கெமிஸ்ட்ரியா அல்லது காம்பாட்டிபிலிட்டியா முக்கியம் என்ற தலைப்பில் இருவரிடமும் கேள்விகள் கேட்கப்பட்டன. ‘

#Love’ தொடரில் மேத்யூ கதாபாத்திரத்தில் நடித்துள்ள அர்ஜுன் தாஸிடம்,

மேத்யூ நிஜ வாழ்க்கை கதாபாத்திரமாக இருந்தால் அவருடன் நட்பு வைத்திருப்பீர்களா என்று கேட்கப்பட்டபோது, “அவர் செய்யும் சாகசங்கள், மலை ஏறுவது போன்ற விஷயங்களைப் பற்றி பேசுவதற்காக அவருடன் நட்பு வைத்திருக்கலாம். அதே நேரத்தில், அவரது சில விஷயங்கள் எனக்குப் பிடிக்காமல் இருக்கலாம். மேத்யூ கதாபாத்திரத்தில் என்னை அதிகம் கவர்ந்தது அவரது உணர்வுகளும், கதையில் அவர் வெளிப்படுத்தும் பலவீனமான பக்கமும்தான்” என்றார்.

தாரா கதாபாத்திரம் குறித்து பேசிய ஐஸ்வர்யா லட்சுமி,

 “தாராவாக நடித்தது எனக்கு மிகவும் சுதந்திரமாகவும் மகிழ்ச்சியாகவும் இருந்தது. என்னை 80 சதவீதம் தாராவுடன் ஒப்பிட்டுப் பார்க்கலாம். பல நேரங்களில் நான் நடிக்கவே இல்லை, அந்த கதாபாத்திரமாகவே இருந்தேன். நான் நடித்த சில கதாபாத்திரங்களைப் போல தாரா என்னிடமிருந்து வெகு தொலைவில் இருப்பவர் அல்ல. அதனால் அவரை நடிப்பது மிகவும் இயல்பாக இருந்தது. மேலும், காதல் கதையில் நடிக்க வேண்டும் என்ற ஆசையும் எனக்கு இருந்தது. அதற்கு ‘#Love’ ஒரு சிறந்த வாய்ப்பாக அமைந்தது. இதற்கு முன்பு அர்ஜுனுடன் இணைந்து ஒரு படத்தில் நடிக்க இருந்தோம்; அது நடக்காமல் போனதால் வருத்தப்பட்டேன். ஆனால் தற்போது ‘#Love’ உருவாகியிருப்பதில் மிகவும் மகிழ்ச்சி. நல்ல விஷயங்கள் நடக்க சில நேரங்களில் காலம் தேவைப்படும்” என்றார்.

தொடர்ந்து, ‘#Love’ தொடரில் காதலுக்கு கெமிஸ்ட்ரியா அல்லது காம்பாட்டிபிலிட்டியா முக்கியம் என்ற தலைப்பில் இருவரிடமும் கேள்விகள் கேட்கப்பட்டன. எது கெமிஸ்ட்ரி, எது காம்பாட்டிபிலிட்டி என இருவரும் தங்களது கருத்துகளைப் பகிர்ந்துகொண்டனர். குறிப்பாக நல்ல முத்தம் குறித்து கேட்கப்பட்டபோது, கெமிஸ்ட்ரியும் காம்பாட்டிபிலிட்டியும் இரண்டுமே முக்கியம் என்று இருவரும் தெரிவித்தனர்.

நிஜ வாழ்க்கையில் காதலுக்கு இரண்டில் எது முக்கியம் என்று கேட்டபோது, அர்ஜுன் தாஸ் காம்பாட்டிபிலிட்டிதான் முக்கியம் என்றார். கெமிஸ்ட்ரி சில காலம் மட்டுமே நீடிக்கலாம்; அதன் பிறகு உறவு தொடர காம்பாட்டிபிலிட்டி அவசியம் என்ற கருத்தை அவர் தெரிவித்தார். அதே நேரத்தில் ஐஸ்வர்யா லட்சுமி, “கெமிஸ்ட்ரிதான் முதலில் உருவாகி, அதன் மூலம் காம்பாட்டிபிலிட்டியை நோக்கி உறவு செல்லும்” என்று தனது கருத்தைப் பகிர்ந்துகொண்டார். இருவரும் தங்களது கருத்துகளைப் பகிர்ந்துகொண்டனர். குறிப்பாக நல்ல முத்தம் குறித்து கேட்கப்பட்டபோது, கெமிஸ்ட்ரியும் காம்பாட்டிபிலிட்டியும் இரண்டுமே முக்கியம் என்று இருவரும் தெரிவித்தனர்.

இன்றைய காலகட்டத்தில் காதல் என்பது நேரில் சந்தித்து தொடங்குவதைத் தாண்டி, டேட்டிங் ஆப்களில் ஸ்வைப், மேட்ச், மெசேஜ் என டிஜிட்டல் உலகத்திலேயே ஆரம்பிக்கும் சூழல் உருவாகியுள்ளது. இந்த நவீன காதல் மற்றும் உறவுகளின் மாற்றத்தை மையமாக வைத்தே ‘Love’ தொடர் உருவாகியுள்ளது.

இந்தத் தொடரை இயக்கியுள்ள பாலாஜி மோகன், தமிழ் சினிமாவில் தனக்கென தனித்துவமான கதை சொல்லும் பாணியை உருவாக்கிய இயக்குநர். ‘காதலில் சொதப்புவது எப்படி?’ படத்தின் மூலம் இயக்குநராக அறிமுகமான இவர், பின்னர் ‘வாயை மூடி பேசவும்’, ‘மாரி’, ‘மாரி 2’ உள்ளிட்ட படங்களை இயக்கியுள்ளார். காதல், இளைஞர்களின் வாழ்க்கை மற்றும் நவீன உறவுகளை இயல்பான நகைச்சுவையுடன் அணுகும் அவரது பாணி, ‘Love’ தொடரிலும் எதிர்பார்ப்பை ஏற்படுத்தியுள்ளது.

‘Love’ தொடரின் கதை FOUND மற்றும் Find My Bae எனும் இரண்டு டேட்டிங் ஆப்களைச் சுற்றி நகர்கிறது. மற்றவர்களுக்கான சரியான துணையைத் தேடிக் கொடுப்பதையே தொழிலாகக் கொண்டிருக்கும் இந்த இரண்டு டேட்டிங் ஆப்களின் நிறுவனர்களான தாரா மற்றும் மேத்யூ, தங்களுக்கான காதலை மட்டும் கண்டுபிடிக்க முடியாமல் இருக்கின்றனர். போட்டியாளர்களாக இருக்கும் இருவருக்கிடையே உருவாகும் உறவு, காதல் மற்றும் கருத்து மோதல்கள்தான் கதையின் முக்கிய அம்சமாக அமைந்துள்ளது.

‘#Love’ தொடரை நிர்மல் வில்லியம்ஸ் எழுதியுள்ளார். ஷரதா சுப்ரமணியன் மற்றும் ஸ்வேதா சக்ரவர்த்தி இணை எழுத்தாளர்களாகப் பணியாற்றியுள்ளனர். May6 Entertainment Factory நிறுவனம் தொடரைத் தயாரித்துள்ளது.

டிரெய்லர் வெளியாகியுள்ள நிலையில், நவீன தலைமுறையின் காதல் மற்றும் உறவுகளை பாலாஜி மோகன் எப்படியான அணுகுமுறையில் சொல்லியிருக்கிறார், அர்ஜுன் தாஸ் – ஐஸ்வர்யா லட்சுமி கூட்டணி எப்படி அமைந்திருக்கிறது, கெமிஸ்ட்ரியா… கம்ஃபோர்ட்டா… என்ற கேள்விக்கு இந்தத் தொடர் என்ன பதிலைத் தருகிறது என்ற எதிர்பார்ப்பு உருவாகியுள்ளது.

காதல், நட்பு, குடும்பம், லட்சியம் என உறவுகளின் பல்வேறு பரிமாணங்களைப் பேசும் ‘Love’ வெப் சீரிஸ் அக்டோபர் 2 முதல் நெட்ஃப்ளிக்ஸில் வெளியாகிறது.

இதுவரை காணாத ஹாட் லுக்! ஆலியா பட்டின் ‘லவ் & வார்’ (Love & War) முதல் பார்வை போஸ்டர்கள் வைரல்!

deccanwebtv Sep 28, 2026

சஞ்சய் லீலா பன்சாலியின் ‘லவ் & வார்’ படத்தில் ஆலியா பட்டின் இதுவரை காணாத நியூ ஜெனரேஷன் கேபரேட் லுக் ரசிகர்களை வெகுவாக கவர்ந்துள்ளது!

சஞ்சய் லீலா பன்சாலி இயக்கத்தில் உருவாகி வரும் ‘லவ் & வார்’ திரைப்படம் 2027-ம் ஆண்டில் வெளியாகவுள்ள மிகவும் எதிர்பார்க்கப்படும் படங்களில் ஒன்றாக உள்ளது. படம் குறித்த ஒவ்வொரு புதிய அப்டேட்டும் ரசிகர்கள் மத்தியில் பெரும் எதிர்பார்ப்பை ஏற்படுத்தி வரும் நிலையில், முதல் போஸ்டர் வெளியானது முதலே இப்படம் சமூக வலைதளங்களில் தொடர்ந்து டிரெண்டாகி வருகிறது.

இதனைத் தொடர்ந்து, படத்தில் ரன்பீர் கபூர் இடம்பெறும் கதாபாத்திர தோற்றங்கள் வெளியாகி ரசிகர்கள் மத்தியில் பெரும் வரவேற்பைப் பெற்றன. தற்போது, ஆலியா பட்டின் ஃபர்ஸ்ட் லுக்  போஸ்டர்கள் வெளியாகியுள்ள நிலையில், அவர் இதுவரை ஏற்றிராத வித்தியாசமான நியூ ஜெனரேஷன் கேபரேட் அவதாரத்தில் தோன்றியிருப்பது ரசிகர்களின் கவனத்தை ஈர்த்துள்ளது.

முதல் போஸ்டரில் ஆலியா பட், கண்கவர் ஸ்லிட் ஸ்கர்ட் மற்றும் சிகை அலங்காரத்துடன் நாற்காலியில் அமர்ந்தபடி தோன்றுகிறார். அவரது தோற்றம் படத்தின் கிளாமர் அம்சத்தை வெளிப்படுத்தும் வகையில் அமைந்துள்ளது.

இரண்டாவது போஸ்டரில், ஆலியா பட் முற்றிலும் மாறுபட்ட கேபரேட் தோற்றத்தில் காட்சியளிக்கிறார். பின்னணியில் மின்னும் கேபரேட் மேடை இடம்பெற்றுள்ள நிலையில், அவரது உடை, அலங்காரம் மற்றும் ஒட்டுமொத்த தோற்றத்தில் சஞ்சய் லீலா பன்சாலியின் திரைப்படங்களுக்கே உரிய நுணுக்கமான கலை வடிவமைப்பு பிரதிபலிக்கிறது.

ஒரு பன்சாலி திரைப்படத்தின் கதாநாயகி எப்படி இருக்க வேண்டும் என்பதற்கான தனித்துவமான அழகியலை இந்த போஸ்டர்கள் வெளிப்படுத்துகின்றன. ஆலியா பட்டின் கிளாமரஸ் தோற்றம் இதுவரை ரசிகர்கள் பார்த்திராத புதிய பரிமாணத்தை காட்டுவதுடன், அவரது கதாபாத்திரம் குறித்த எதிர்பார்ப்பையும் அதிகரித்துள்ளது.

இந்த போஸ்டர்கள் மூலம் ஆலியா பட்டை இதுவரை காணாத ஒரு புதிய அவதாரத்தில் சஞ்சய் லீலா பன்சாலி காட்சிப்படுத்தியிருப்பது உறுதியாகியுள்ளது. ஏற்கனவே தனது தலைமுறையின் திறமையான நடிகைகளில் ஒருவராக தன்னை நிலைநிறுத்தியுள்ள ஆலியா பட், இப்படத்தில் முற்றிலும் மாறுபட்ட கதாபாத்திரத்தை ஏற்று நடிப்பதாக தெரிகிறது. குறிப்பாக, சஞ்சய் லீலா பன்சாலியுடன் அவர் மீண்டும் இணைந்திருப்பது படத்தின் முக்கிய எதிர்பார்ப்புகளில் ஒன்றாக உள்ளது.

‘லவ் & வார்’ படத்தின் முதல் போஸ்டர் வெளியானது முதலே சமூக வலைதளங்களில் தொடர்ந்து பேசுபொருளாக இருந்து வருகிறது. ரன்பீர் கபூர், ஆலியா பட் ஆகியோரின் அடுத்தடுத்த தோற்றங்கள் படத்தின் மீதான எதிர்பார்ப்பை மேலும் அதிகரித்துள்ளன. ஒவ்வொரு போஸ்டரும் சஞ்சய் லீலா பன்சாலியின் பிரம்மாண்டமான திரை உலகின் புதிய பரிமாணத்தை வெளிப்படுத்தி வருவதால், படத்தில் இன்னும் என்னென்ன ஆச்சரியங்கள் காத்திருக்கின்றன என்ற எதிர்பார்ப்பு ரசிகர்கள் மத்தியில் அதிகரித்துள்ளது.

சஞ்சய் லீலா பன்சாலி இயக்கும் ‘லவ் & வார்’ திரைப்படத்தில் ரன்பீர் கபூர், ஆலியா பட் மற்றும் விக்கி கௌஷல் ஆகியோர் முன்னணி கதாபாத்திரங்களில் நடிக்கின்றனர். இப்படம் 2027 ஜனவரி 21-ம் தேதி உலகம் முழுவதும் இந்தி, தமிழ் மற்றும் தெலுங்கு மொழிகளில் வெளியாகிறது.

‘பத்தா’ படத்தின் டிரெய்லர் வெளியீடு …….

deccanwebtv Sep 28, 2026

80-களின் பின்னணியில் ஆக்ஷன், நகைச்சுவை, குடும்ப உணர்வுகளுடன் வெளியாகியுள்ள ‘பத்தா’ டிரெய்லர்

மக்கள் செல்வன் விஜய் சேதுபதி நடிப்பில், பாலாஜி தரணிதரன் இயக்கத்தில், இயக்குநர் அட்லி வழங்க, ஸ்டார் ஸ்டுடியோ (Star Studio18), ஏ ஃபார் ஆப்பிள் ஸ்டுடியோஸ் (A for Apple Studios)மற்றும் சினி 1 ஸ்டுடியோஸ் புரொடக்‌ஷன் (Cine 1 Studios Production) நிறுவனங்கள் இணைந்து தயாரித்துள்ள ‘பத்தா’ திரைப்படத்தின் டிரெய்லர் வெளியாகியுள்ளது. ஏற்கனவே படத்தின் டீசர் மற்றும் பாடல்கள் மூலம் கவனம் பெற்றிருந்த நிலையில், தற்போது வெளியாகியுள்ள டிரெய்லர் படத்தின் மீதான எதிர்பார்ப்பை மேலும் அதிகரித்துள்ளது.

இரண்டு சிறுவர்கள் ரௌடி பத்தாவின் வீர பிரதாபங்களைப் பற்றி விவாதிப்பதுடன் தொடங்குகிறது ‘பத்தா’ டிரெய்லர். யாராலும் தொட முடியாதவர், அசைத்து பார்க்க முடியாதவர் என பத்தாவின் வீரத்தைப் பற்றிப் பலரும்  பேச அப்படியே திரையில் வரும் காட்சிகள், அவர் மீதான எதிர்பார்ப்பை உருவாக்குகின்றன.

தொடர்ந்து, ஆக்ஷன் காட்சிகளுடன் பத்தாவின் பல்வேறு முகங்களை அறிமுகப்படுத்தும் டிரெய்லர், எதிர்பாராத விதமாக அவரது குடும்பஸ்தன் முகத்தையும் காட்டி ஆச்சரியப்படுத்துகிறது. ரௌடியாக அறிமுகமாகும் பத்தாவுக்குள் இருக்கும் மற்றொரு மனிதனை வெளிப்படுத்தும் வகையில் காட்சிகள் அமைந்துள்ளன.

ஆக்ஷன் களமாக நகரும் என எதிர்பார்க்க வைக்கும் டிரெய்லர், அடுத்தடுத்த காட்சிகளில் நகைச்சுவை நிறைந்த தருணங்களுடன் வேறொரு கோணத்திற்கு மாறுகிறது. பத்தாவின் கதாபாத்திரத்தை சுற்றியுள்ள சம்பவங்கள், அவரது பல்வேறு முகங்கள் மற்றும் அவரைச் சுற்றியுள்ள மனிதர்களின் உறவுகள் என டிரெய்லர் முழுவதும் சுவாரஸ்யமான காட்சிகள் இடம்பெற்றுள்ளன.

குறிப்பாக, டிரெய்லரின் இறுதியில் இடம்பெறும் ‘செல்லமே மகளே’ பாடல் காட்சிகள் படத்தின் உணர்வுப்பூர்வமான மற்றொரு பரிமாணத்தை வெளிப்படுத்துகின்றன. “அப்பா வந்திருவார்ல அம்மா?” என சிறுமி கேட்கும் கேள்வியுடன், ஜெயிலில் இருக்கும் பத்தாவின் காட்சியுடன் டிரெய்லர் நிறைவடைகிறது. இந்த இறுதிக் காட்சிகள், பத்தாவின் வாழ்க்கையில் என்ன நடந்தது என்ற கேள்வியை எழுப்புகின்றன.

80-களின் பின்னணியில் உருவாகியுள்ள ‘பத்தா’ திரைப்படத்தின் உலகத்தையும் டிரெய்லர் அழுத்தமாகக் காட்டுகிறது. அந்தக் காலகட்டத்தின் தோற்றம், கதாபாத்திரங்களின் உடைகள், காட்சியமைப்பு மற்றும் சூழல் என அனைத்தும் கதையின் காலப்பின்னணியை உணர்த்தும் வகையில் அமைந்துள்ளன.

அதே நேரத்தில், பத்தா உண்மையில் யார்?, அவரது பல்வேறு முகங்களுக்குப் பின்னால் இருக்கும் கதை என்ன?, ரௌடி பத்தா எப்படி குடும்பஸ்தனாக மாறுகிறார்?, அவர் ஏன் சிறையில் இருக்கிறார்? என பல கேள்விகளை டிரெய்லர் எழுப்புகிறது.

ஆக்ஷன், நகைச்சுவை, குடும்ப உணர்வு மற்றும் மர்மம் என பல்வேறு அம்சங்களை ஒன்றிணைத்து வெளியாகியுள்ள ‘பத்தா’ டிரெய்லர், கதையின் முக்கிய முடிச்சுகளை வெளிப்படுத்தாமல் படத்தின் மீதான ஆர்வத்தை தூண்டும் வகையில் அமைந்துள்ளது.

விஜய் சேதுபதியின் வித்தியாசமான தோற்றங்கள் மற்றும் பல்வேறு கதாபாத்திரப் பரிமாணங்கள், 80-களின் பின்னணி, நகைச்சுவை நிறைந்த காட்சிகள், குடும்ப உணர்வுகள் என பல சுவாரஸ்ய அம்சங்களை தன்னுள் கொண்டுள்ள ‘பத்தா’ திரைப்படம், திரையில் என்ன அனுபவத்தை வழங்கப் போகிறது என்ற எதிர்பார்ப்பை டிரெய்லர் ஏற்படுத்தியுள்ளது.

‘பத்தா’ திரைப்படத்தில் மக்கள் செல்வன் விஜய் சேதுபதியுடன், ‘ஜெய் பீம்’ புகழ் லிஜோமோல் ஜோஸ் கதாநாயகியாக நடித்துள்ளார். இவர்களுடன் ஹரிகிருஷ்ணன், சாந்தி பாலச்சந்திரன், அர்ஜுன் சிதம்பரம், அஜய் கோஷ், தீபா வெங்கட் உள்ளிட்ட பலர் முக்கிய கதாபாத்திரங்களில் நடித்துள்ளனர்.  

பாலாஜி தரணிதரன் இயக்கியுள்ள இப்படத்திற்கு சாய் அப்யங்கர்   இசையமைத்துள்ளார். செல்வகுமார் எஸ்.கே ஒளிப்பதிவு செய்ய, ஆர். கலைவாணன் படத்தொகுப்பு பணிகளை மேற்கொண்டுள்ளார். டி. முத்துராஜ் தயாரிப்பு வடிவமைப்பை கவனித்துள்ளார். அஷ்வின் முருகன் இணை தயாரிப்பாளராக பணியாற்றியுள்ள நிலையில், முராத் கெதானி, பிரியா அட்லி, அலோக் ஜெயின் மற்றும் அஜித் அந்தாரே ஆகியோர் இணைந்து தயாரித்துள்ளனர்.

‘பத்தா’ திரைப்படம் வரும் அக்டோபர் 1-ம் தேதி உலகம் முழுவதும் திரையரங்குகளில் வெளியாகிறது.

ஒரே கதை. காதலைப் பற்றிய பல பார்வைகள். எளிதில் புரிந்துகொள்ள முடியாத ஒரு உண்மை: ‘Pooja Meri Jaan’ திரைப்படம் அக்டோபர் 2 முதல் Hindi Zee 5-ல் வெளியாகிறது

deccanwebtv Sep 28, 2026

National, செப்டம்பர் 24, 2026: ஒவ்வொரு கதையும் எளிதான பதில்களை வழங்குவதற்காக உருவாக்கப்படுவதில்லை. சில கதைகள் நம்மை அசௌகரியத்திற்கு உள்ளாக்கி, நாம் ஏற்றுக்கொள்வதை கேள்விக்குள்ளாக்கி, நாம் பார்க்காமல் தவிர்க்க விரும்பும் உண்மைகளை எதிர்கொள்ள வைக்கின்றன. Navjot Gulati இயக்கத்தில், Dinesh Vijan மற்றும் Amar Kaushik தயாரிப்பில், Maddock Films நிறுவனத்தின் தயாரிப்பாக உருவாகியுள்ள ‘Pooja Meri Jaan’ திரைப்படம் 2026 அக்டோபர் 2-ம் தேதி Hindi Zee 5-ல் வெளியாகிறது.

இந்த தீவிரமான டிராமா திரைப்படம் Pooja-வை மையமாகக் கொண்டு நகர்கிறது. தொடர் அதிர்ச்சியூட்டும் சம்பவங்கள், நிராகரிப்பு, வெறித்தனமான காதல், சம்மதம் மற்றும் உண்மையில் என்ன நடந்தது என்பதன் பின்னணியில் எழும் கேள்விகளை எதிர்கொள்ள வைக்கின்றன.

முக்கிய விவரங்கள்:

தலைப்பு: Pooja Meri Jaan
தளம்: Hindi Zee 5
மொழி: இந்தி
வகை: டிராமா
வெளியீடு: 2 அக்டோபர் 2026
இயக்கம்: Navjot Gulati
தயாரிப்பு: Maddock Films
நடிகர்கள்: Mrunal Thakur, Huma Qureshi, Vikram Singh Chauhan மற்றும் Vijay Raaz

Pooja Meri Jaan திரைப்படம் எதைப் பற்றியது?

இந்தக் கதையின் மையத்தில் Pooja இருக்கிறார். நெருங்கிய நண்பர் ஒருவர் தனது காதலை வெளிப்படுத்தும்போது, அதை அவர் நிராகரிக்கிறார். அதைத் தொடர்ந்து தொடர்ச்சியான அதிர்ச்சியூட்டும் சம்பவங்கள் நடைபெறுகின்றன. கதை நகரும் போது, உண்மையில் என்ன நடந்தது, இதற்கு யார் பொறுப்பு, மேலும் Pooja சூழ்நிலைகளின் பாதிக்கப்பட்டவரா அல்லது அவரைச் சுற்றி நடந்த சம்பவங்களுடன் அவருக்கு ஆழமான தொடர்பு உள்ளதா என்ற கேள்விகள் எழுகின்றன.

Huma Qureshi, இந்த வழக்கில் நெருக்கமாக ஈடுபடும் வழக்கறிஞரான Sana கதாபாத்திரத்தில் நடிக்கிறார். Pooja-வைச் சுற்றி நடந்த சம்பவங்களின் பின்னணியை ஒன்றிணைத்து, முரண்பட்ட தகவல்களுக்கு அடியில் மறைந்திருக்கும் உண்மையை வெளிக்கொணர அவர் முயற்சிக்கிறார். உண்மை தொடர்ந்து எட்டாக்கனியாக இருக்கும் நிலையில், ‘Pooja Meri Jaan’ திரைப்படம் எங்கே அப்பாவித்தனம் முடிகிறது, எங்கே பொறுப்பு தொடங்குகிறது என்ற கேள்விகளை பார்வையாளர்களிடம் எழுப்புகிறது. நிராகரிப்பு, வெறித்தனமான காதல் மற்றும் சமூகத்தின் தீர்ப்புகள் ஆகியவற்றின் இருண்ட சிக்கல்களை படிப்படியாக வெளிப்படுத்துகிறது.

‘Pooja Meri Jaan’ திரைப்படம் தனித்து நிற்பதற்கான காரணங்கள்:

● மாறுபட்ட பார்வைகள் மூலம் பல அடுக்குகளைக் கொண்ட மர்மத்தை வெளிப்படுத்துகிறது
● Mrunal Thakur மற்றும் Huma Qureshi இருவரையும் அழுத்தமான கதாபாத்திரங்களில் ஒன்றிணைக்கிறது
● பார்வை எவ்வளவு வேகமாக உண்மையை வடிவமைக்க முடியும் என்பதை ஆராய்கிறது
● வெறித்தனமான காதல், எல்லைகள் மற்றும் சமூகத்தின் தீர்ப்புகளை ஆழமாக ஆராய்கிறது
● எளிதான பதில்கள் இல்லாமல் கேள்விகளை எழுப்பும் ஒரு கதை

அதிகாரப்பூர்வ கருத்துகள்:

நடிகை Mrunal Thakur கூறுகையில்:

“ஆரம்பத்திலிருந்தே இந்தக் கதாபாத்திரம் என்னை ஈர்த்தது. ஏனெனில், ஒரு நடிகையாக என்னுள் இருக்கும் பல்வேறு பரிமாணங்களை வெளிப்படுத்தவும், வித்தியாசமான ஒன்றை வழங்கவும் இந்த கதாபாத்திரம் எனக்கு வாய்ப்பளிக்கும் என்று எனக்குத் தெரியும். Pooja மிகவும் ஆழமான பல அடுக்குகளைக் கொண்ட கதாபாத்திரம். அவரைச் சுற்றி நடக்கும் சம்பவங்களின் சிக்கல்தன்மையே திரைப்படத்திற்கும் அவரது பயணத்திற்கும் என்னை ஈர்த்தது. பார்வையாளர்களே கண்டறிய வேண்டிய பதில்களை வெளிப்படுத்தாமல், பல்வேறு உணர்வுகளை வெளிப்படுத்தும் வகையில் இந்த கதாபாத்திரத்தில் நான் பயணிக்க வேண்டியிருந்தது. நீங்கள் பார்ப்பது, நீங்கள் நம்புவது மற்றும் ஒருவரையோ அல்லது ஒரு சூழ்நிலையையோ நாம் எவ்வளவு வேகமாக மதிப்பிடுகிறோம் என்பதை நமது பார்வைகள் எவ்வாறு வடிவமைக்கின்றன என்பதை இந்தக் கதை தொடர்ந்து கேள்விக்குள்ளாக்குகிறது. இது தீவிரமான மற்றும் சவாலான அனுபவமாக இருந்தது. அதே நேரத்தில், மிகுந்த மனநிறைவை அளித்த அனுபவமாகவும் இருந்தது. பார்வையாளர்கள் இந்தப் படத்தை அனுபவித்து, Pooja-வின் பயணத்தைப் புரிந்துகொண்டு, உறவுகள், நிராகரிப்பு, சம்மதம், பார்வை மற்றும் இறுதியாக ஒரு சமூகமாக நாம் வழங்கும் தீர்ப்புகள் குறித்த கேள்விகளில் ஈடுபடுவதை காண நான் ஆவலுடன் இருக்கிறேன்.”

நடிகை Huma Qureshi கூறுகையில்:

“‘Pooja Meri Jaan’ திரைப்படத்தை சுவாரஸ்யமாக்குவது, அதன் மையச் சம்பவத்தை ஒரே ஒரு பார்வையில் மட்டும் அணுகாமல் இருப்பதுதான். Pooja-வைச் சுற்றியுள்ள முரண்பட்ட தகவல்களை புரிந்துகொண்டு, என்ன நடந்தது என்பதை ஒன்றிணைக்க முயற்சிக்கும் Sana, கதைக்குள் ஒரு சட்டரீதியான பார்வையை கொண்டு வருகிறார். மனிதர்களையும் சம்பவங்களையும் நாம் புரிந்துகொள்ளும் விதத்தை நமது பார்வை எவ்வாறு வடிவமைக்கிறது என்பதையும், நமது அனுமானங்களிலிருந்து உண்மையைப் பிரிப்பது எவ்வளவு கடினம் என்பதையும் இந்தத் திரைப்படம் ஆராய்கிறது. சம்மதம், பொறுப்பு, நீதி மற்றும் சமூகத்தின் தீர்ப்புகள் குறித்த அசௌகரியமான கேள்விகளை எழுப்பும் அதே நேரத்தில், உணர்வுப்பூர்வமாக ஈர்க்கும் ஒரு கதையின் ஒரு பகுதியாக இருந்தது மிகவும் வலிமையான அனுபவமாக இருந்தது.”

நடிகர் Vikram Singh Chauhan கூறுகையில்:

“‘Pooja Meri Jaan’ என்பது நம்மை நீண்ட காலம் சிந்திக்க வைக்கும் வகையான கதை. ஏனெனில், ஒரு சூழ்நிலையையோ அல்லது அதில் சம்பந்தப்பட்ட நபர்களையையோ நாம் உண்மையில் எவ்வளவு நன்றாக அறிந்திருக்கிறோம் என்ற கேள்வியை இது எழுப்புகிறது. உறவுகள், நிராகரிப்பு மற்றும் எல்லைகள் சோதிக்கப்படும் போது உருவாகக்கூடிய உணர்வுகளை இந்தப் படம் ஆராயும் விதம்தான் என்னை இதில் நடிக்கத் தூண்டியது. இந்தக் கதை தொடர்ந்து நமது பார்வையை மாற்றிக்கொண்டே செல்கிறது. மேலும் எது உண்மை, எது நமது பார்வையால் உருவாக்கப்பட்டது என்ற கேள்வியையும் எழுப்புகிறது. பார்வையாளர்களுக்கு எளிதான பதில்களை வழங்காமல், ஆழமாகப் பார்க்கவும், தங்களது அனுமானங்களைக் கேள்விக்குள்ளாக்கவும், இறுதியில் என்ன நடக்கிறது என்பது குறித்த தங்களுக்கான புரிதலை உருவாக்கிக்கொள்ளவும் ஊக்குவிக்கும் ஒரு திரைப்படத்தின் ஒரு பகுதியாக இருந்தது சுவாரஸ்யமான மற்றும் சவாலான அனுபவமாக இருந்தது.”

‘தாய்நிலம்’ – அக்டோபர் 9-ம் தேதி திரைக்கு வருகிறது!

deccanwebtv Sep 28, 2026

இலங்கை மக்களின் வலி, வாழ்வியல் மற்றும் தாய்நிலத்தின் மீதான பாசத்தை மையமாகக் கொண்டு உருவாகியுள்ள ‘தாய்நிலம்’ திரைப்படம் அக்டோபர் 9-ம் தேதி திரையரங்குகளில் வெளியாகிறது. நெனி என்டர்டெயின்மென்ட்ஸ் பிரைவேட் லிமிடெட் நிறுவனத்தின் தயாரிப்பில், அறிமுக இயக்குநர் அபிலாஷ் ஜி. தேவ் இயக்கத்தில் உருவாகியுள்ள இப்படத்தின் டிரெய்லர் நேற்று வெளியாகி ரசிகர்கள் மத்தியில் நல்ல வரவேற்பைப் பெற்று வருகிறது.

இலங்கையில் நடைபெற்ற போரின் பின்னணியில், 2016-ல் உறவுகளையும் சொந்த மண்ணையும் இழந்து, வேறு வழியின்றி தமிழ்நாட்டிற்கு வந்து சேரும் ஒரு தந்தையும் அவரது சிறுமகளும் எதிர்கொள்ளும் வாழ்க்கைப் போராட்டத்தை மையமாகக் கொண்டதாக ‘தாய்நிலம்’ உருவாகியுள்ளது. தாய்நிலத்தை விட்டு வெளியேறிய பிறகு புதிய இடத்தில் வாழ்க்கையை தொடங்க வேண்டிய சூழலில், அந்த தந்தையும் மகளும் சந்திக்கும் சவால்களையும், அவர்களைச் சுற்றியுள்ள மனிதர்களின் அன்பையும் திரைப்படம் பேசுகிறது.

எல்லாவற்றையும் இழந்து தமிழ்நாட்டிற்கு வரும் அந்த தந்தையின் மிகப்பெரிய ஆசை, தனது மகளை நல்ல நிலைக்கு கொண்டு வர வேண்டும் என்பதுதான். அதற்காக அவர் எதிர்கொள்ளும் போராட்டங்கள், வாழ்க்கையில் கிடைக்கும் புதிய வாய்ப்புகள், அருகில் இருக்கும் நல்ல மனிதர்களின் உதவி என அவர்களின் பயணம் நகர்கிறது. தாய்நிலத்தில் கிடைக்காத சுதந்திரத்தையும் புதிய வாழ்க்கையில் அவர் சந்திக்கும் அனுபவங்களையும், அதே நேரத்தில் தாய்நிலத்தின் நினைவுகள் அவரை விட்டு ஒருபோதும் நீங்காததையும் அழுத்தமான உணர்வுகளுடன் பதிவு செய்யும் படைப்பாக இப்படம் உருவாகியுள்ளது.

இலங்கை மக்களின் வாழ்வில் ஏற்பட்ட இழப்புகள் மற்றும் வலிகள் குறித்து அதிகம் பேசப்படாத சில அம்சங்களையும் ‘தாய்நிலம்’ திரைப்படம் தனது கதையின் வழியாக முன்வைக்கிறது. குறிப்பாக, சொந்த மண்ணை இழந்து புதிய இடத்தில் வாழ்க்கையை கட்டமைக்க வேண்டிய மனிதர்களின் மனநிலை, அவர்களின் எதிர்பார்ப்புகள், உறவுகள் மற்றும் எதிர்கால கனவுகளை மையப்படுத்தி படம் உருவாகியிருப்பது டிரெய்லர் மூலம் தெரியவருகிறது.

டாக்டர் அமர் ராமச்சந்திரன், நேகா அமர் முதன்மைப் பாத்திரங்களில் நடித்துள்ளனர், இவர்களுடன் பாலாசிங், தீபக் பிரபாகர், பத்மஜா, நிமிஷா நம்பியார், குரு தட்சணா, தளபதி ஆனந்த், சரவணன் சொக்கம்பட்டி ஆகியோர் முக்கிய கதாப்பாத்திரங்களில் நடித்துள்ளனர்.

அறிமுக இயக்குநர் அபிலாஷ் ஜி. தேவ் இயக்கியுள்ள இப்படத்தில், படத்தின் ஒளிப்பதிவை பிரசாந்த் பிரணவம், இசையை ஔசேப்பச்சன், படத்தொகுப்பை தீஜோ பி. வர்கீஸ், கலை இயக்கத்தை கைலாஸ் திரிப்பூனிதுறை, மிக்ஸிங் ராஜாகிருஷ்ணன், பின்னணி இசையை ஔசேப்பச்சன் ஆகியோர் கவனித்துள்ளனர். மேலும், பல்வேறு தொழில்நுட்பக் கலைஞர்கள் இணைந்து இப்படத்தை உருவாக்கியுள்ளனர்.

திரையரங்க வெளியீட்டுக்கு முன்பாகவே ‘தாய்நிலம்’ சர்வதேச திரைப்பட விழாக்களிலும் கவனம் பெற்றுள்ளது. படத்தின் போஸ்டரில் குறிப்பிடப்பட்டுள்ள தகவலின்படி, Toronto Tamil Film Festival – Canada, Luleå International Film Festival – Sweden, Catharsis International Film Festival – Belgium ஆகிய திரைப்பட விழாக்களில் இப்படம் Official Selection ஆக இடம்பெற்றுள்ளது.

மேலும் Crown Wood International Film Festival-ல் Best Indian Film, Seventh Art Independent International Film Festival-ல் Best Original Score, Tamil Nadu International Film Festival-ல் Best Debut Filmmaker மற்றும் Best Narrative Feature Film – Special Mention, Cosmos International Film Festival-ல் Best Cameraman மற்றும் Best Debut Director உள்ளிட்ட அங்கீகாரங்களையும் இப்படம் பெற்றுள்ளது.

இந்நிலையில், நேற்று வெளியாகியுள்ள ‘தாய்நிலம்’ திரைப்படத்தின் டிரெய்லர், படத்தின் கதை களத்தையும் கதாபாத்திரங்களின் உணர்வுகளையும் அழுத்தமாக வெளிப்படுத்தி ரசிகர்கள் மத்தியில் கவனத்தை ஈர்த்து வருகிறது. சர்வதேச திரைப்பட விழாக்களில் கிடைத்த அங்கீகாரங்களுடன், தற்போது டிரெய்லர் ஏற்படுத்தியுள்ள வரவேற்பும் படத்தின் மீதான எதிர்பார்ப்பை அதிகரித்துள்ளது. ‘தாய்நிலம்’ திரைப்படம் அக்டோபர் 9-ம் தேதி திரையரங்குகளில் வெளியாகிறது.