ராவடி (Raawadi)’ படத்தின் ‘அட்ரா பரமா.. ’ – முதல் பாடல் வெளியீடு!

deccanwebtv Nov 5, 2026

நடிகர்கள் பஸில் ஜோசப் (Basil Joseph) – எல். கே. அக்ஷய் குமார் (L. K. Akshay Kumar) இணைந்து நடித்திருக்கும் ‘ராவடி (Raawadi)’ படத்தின் ‘அட்ரா பரமா.. ’ – முதல் பாடல் வெளியீடு!

மலையாளத் திரையுலகின் முன்னணி நட்சத்திர நடிகரான பேசில் ஜோசப் – ‘சிறை’ படத்தின் மூலம் பிரபலமான நடிகர் எல். கே. அக்ஷய் குமார் ஆகிய இருவரும் இணைந்து முக்கிய வேடங்களில் நடித்திருக்கும் ‘ராவடி (Raawadi)’ திரைப்படத்தில் இடம்பெற்ற ‘அட்ரா பரமா..’ எனும் முதல் பாடல் வெளியிடப்பட்டிருக்கிறது.

இயக்குநர் விக்னேஷ் வடிவேல் இயக்கத்தில் உருவாகியுள்ள ‘ராவடி (Raawadi)’ திரைப்படத்தில் பஸில் ஜோசப், எல். கே. அக்ஷய் குமார், ஜான் விஜய்,  ஜாபர் சாதிக், நோபல் கே. ஜேம்ஸ், ஷாரிக் ஹாசன், அருணாச்சலேஸ்வரன் PA., சத்யன், ஐஸ்வர்யா சர்மா உள்ளிட்ட பலர் நடித்திருக்கிறார்கள். லியோன் பிரிட்டோ ஒளிப்பதிவு செய்திருக்கும் இந்தத் திரைப்படத்திற்கு ஜென் மார்ட்டின் இசையமைத்திருக்கிறார். படத்தொகுப்புப் பணிகளைப் பரத் விக்ரமன் மேற்கொள்ள, தயாரிப்பு வடிவமைப்பாளராகப் பி. எஸ். ஹரிஹரன் பணியாற்றியிருக்கிறார். கமர்ஷியல் என்டர்டெயினராகத் தயாராகியிருக்கும் இந்தத் திரைப்படத்தை செவன் ஸ்கிரீன் ஸ்டுடியோ நிறுவனம் சார்பில் தயாரிப்பாளர் எஸ். எஸ். லலித்குமார் தயாரித்திருக்கிறார். இப்படத்திற்கு எல். கே. விஷ்ணுகுமார் இணைத் தயாரிப்பாளராகப் பொறுப்பேற்றுள்ளார்.

இப்படத்தின் ஆடை வடிவமைப்பாளராக பிரியா ரவி பணியாற்றியுள்ளார். நடன அமைப்பை எம். ஷெரிப் மேற்கொண்டுள்ளார். சண்டைப் பயிற்சியை டான் அசோக் கவனித்துள்ளார். ஒலி வடிவமைப்புப் பணிகளை எஸ். அழகியகூத்தன் மற்றும் சுரேன் ஜி ஆகியோரும், ஒலி கலவைப் பணிகளை சுரேன் ஜி -யும் மேற்கொண்டுள்ளனர். படப்பிடிப்புத் தளப் புகைப்படக் கலைஞராக ஆகாஷ் பாலாஜி பணியாற்றியுள்ளார். மக்கள் தொடர்புப் பணிகளை யுவராஜ் கவனிக்க, தயாரிப்பு நிர்வாகியாக ஆர். எஸ். வெங்கட், எக்ஸிக்யூட்டிவ் புரொடியூசராக மணிகண்டன், கிரியேட்டிவ் புரொடியூசராக அருண் கே. ஆகியோர் பணியாற்றியுள்ளனர்.

வரும் டிசம்பர் மாதம் 24ஆம் தேதி முதல் உலகம் முழுவதும் திரையரங்குகளில் வெளியாகும் என அறிவிக்கப்பட்டிருக்கும் இந்தத் திரைப்படத்தில் இடம்பெற்ற ‘பொடி பொடியா அடிச்சது பொடியன் இல்ல பாத்துக்க பாத்துக்க…’ எனத் தொடங்கும் முதல் பாடல் வெளியிடப்பட்டிருக்கிறது . இந்தப் பாடலைப் பாடலாசிரியர் உதய் எழுத, பின்னணிப் பாடகர் அறிவு பாடியிருக்கிறார். ஜென் மார்ட்டினின் இசையில் உருவாகியிருக்கும் இந்தப் பாடல் இளம் ரசிகர்களின் விருப்பத்திற்குரிய துள்ளல் இசைப் பாணியில் அமைந்திருப்பதால் பெரும் வரவேற்பைப் பெற்று வருகிறது.

‘படிடா பரமா’ என்ற வசனம் ஏற்கனவே சமூக வலைதளங்களில் வைரலாகி ரசிகர்களின் கவனத்தை ஈர்த்த நிலையில், தற்போது இப்படத்தில் இடம்பெற்றுள்ள ‘அட்ரா பரமா’ பாடலும் வெளியாகி ரசிகர்கள் மத்தியில் வைரலாகி வருகிறது.

‘ஜான் டோ’ திரைப்பட பத்திரிகையாளர் சந்திப்பு

deccanwebtv Nov 5, 2026

மர்ம முடிச்சுகளுடன் வெளியாகும் அர்ஜுன் தாஸின் ‘ஜான் டோ’! – நவம்பர் 13 முதல் திரையரங்குகளில் வெளியீடு!

அர்கா மீடியாவொர்க்ஸ் நிறுவனத்தின் தயாரிப்பில், மதுமிதாவின் இயக்கத்தில், அர்ஜுன் தாஸ் நடிப்பில் உருவாகியுள்ள சைக்கலாஜிக்கல் கிரைம் திரில்லர் திரைப்படமான ‘ஜான் டோ’ (John Doe) வரும் நவம்பர் 13ஆம் தேதி திரையரங்குகளில் வெளியாகிறது.

இதனை முன்னிட்டு நடைபெற்ற பத்திரிகையாளர் சந்திப்பில் படக்குழுவினர் கலந்துகொண்டு படம் குறித்த பல்வேறு சுவாரஸ்யமான தகவல்களைப் பகிர்ந்து கொண்டனர்.

இந்நிகழ்வில்…

நடிகை அனுபமா பேசியதாவது:

“‘ஜான் டோ’ மிகவும் முக்கியமான, ஆழமான உளவியல் கதைக்களத்தைக் கொண்ட திரைப்படம். இந்தப் படத்தைப் பார்க்கத் திரையரங்கிற்குள் செல்லும்போது நீங்கள் ஒரு நபராக இருப்பீர்கள். ஆனால், படத்தைப் பார்த்துவிட்டு வெளியே வரும்போது நிச்சயமாக இன்னொரு நபராக மாறியிருப்பீர்கள். அந்த அளவுக்கு இப்படம் உங்கள் மனதில் தாக்கத்தை ஏற்படுத்தும் என்று என்னால் உறுதியாகச் சொல்ல முடியும்” என்றார்.

நடிகர் படவா கோபி பேசியதாவது:

“இந்தப் படத்தில் என்னுடைய குரலைப் பற்றிப் பேசுவதைவிட, இந்தப் படத்தின் குரலே அர்ஜுன் தாஸ் தான். அவருடைய ஆழமான குரல் தனித்துவமானது. நாங்கள் வாய்ஸ் ஓவர் பணிகளுக்குச் செல்லும்போதுகூட, ‘உங்கள் குரல் அர்ஜுன் தாஸ் மாதிரி இருக்க வேண்டும்’ என்று சொல்வார்கள். அந்த அளவுக்கு அவருடைய குரல் ரசிகர்களிடம் தாக்கத்தை ஏற்படுத்தியுள்ளது. அவர் உண்மையிலேயே ஒரு திறமையான கலைஞர். இந்தப் படத்தில் அவருடன் இணைந்து பணியாற்றியது மகிழ்ச்சி.

இந்தப் படம் ஒரு சைக்கலாஜிக்கல் திரில்லர். ஒவ்வொரு மனிதருக்குள்ளும் ஒரு உளவியல் போராட்டம் இருக்கிறது. கமல் சார் சொன்னதுபோல, கடவுள் பாதி, மிருகம் பாதி என்பதுதான் மனிதர்களின் இயல்பு. அந்த மனநிலையைப் படத்தில் வித்தியாசமாக அணுகியிருக்கிறார்கள்.

இயக்குநர் மதுமிதா எனக்கு நீண்டகால குடும்ப நண்பர். 2018ஆம் ஆண்டு என் அம்மா இறந்த பிறகு நான் மிகுந்த மனவேதனையில் இருந்தேன். அப்போது என்னைத் தொடர்புகொண்டு கேரளாவுக்கு வந்து நடிக்கும்படி அழைத்தவர் மதுமிதா. அந்தக் காலகட்டத்தில் என்னை மீண்டும் இயல்பு வாழ்க்கைக்குக் கொண்டுவந்தவர் அவர். அதற்காக அவருக்கு என் மனமார்ந்த நன்றியைத் தெரிவித்துக் கொள்கிறேன்.

மதுமிதா ஒரு சிறந்த இயக்குநர். அவருடைய படைப்பாற்றலும், நடிகர்களிடமிருந்து சிறந்த நடிப்பை வெளிக்கொண்டு வரும் விதமும் வியக்க வைக்கிறது. இந்தப் படத்தில் நான் நிறைய நகைச்சுவைக் காட்சிகளில் நடித்திருக்கிறேன். அர்ஜுன் தாஸின் நடிப்பு, அவருடைய உணர்வுபூர்வமான காட்சிகள் எனப் பல விஷயங்கள் படத்தில் சிறப்பாக அமைந்துள்ளன.

மேலும், இந்தப் படத்தில் அர்ச்சனா எனக்கு மனைவியாக நடித்திருக்கிறார். ஜாராவும் சிறப்பாக நடித்திருக்கிறார். அவருடைய வளர்ச்சியைப் பார்க்கும்போது மகிழ்ச்சியாக இருக்கிறது. மதுமிதா தேசிய அளவில் கவனம் ஈர்த்து வரும் நம் தமிழ் மண்ணின் பெண் என்பது நம் திரையுலகமே பெருமைப்பட வேண்டிய விஷயம்.

இந்தப் படத்தின் தலைப்பான ‘ஜான் டோ’ என்பதன் அர்த்தம் எனக்குத் தொடக்கத்தில் தெரியவில்லை. மருத்துவமனையில் அடையாளம் தெரியாத ஆண் நோயாளி ஒருவர் அனுமதிக்கப்பட்டிருந்தால் அவரைக் குறிப்பிடப் பயன்படுத்தப்படும் பெயர்தான் ஜான் டோ; பெண் நோயாளியாக இருந்தால் ஜேன் டோ என்று குறிப்பிடுவார்கள் என்பதைப் பின்னர்தான் தெரிந்துகொண்டேன். அந்த அளவுக்கு வித்தியாசமான பெயரையும், கதைக்களத்தையும் கொண்ட இந்தப் படத்தில் வாய்ப்பு வழங்கிய மதுமிதாவுக்கும் படக்குழுவினருக்கும் நன்றி” என்றார்.

நடிகை அர்ச்சனா பேசியதாவது:

“இந்தப் படத்தில் என்னுடைய கதாபாத்திரம் மிகவும் முக்கியமானது. அதற்கான நடிப்பும் மிகவும் அழுத்தமானதாக இருந்தது. படத்தைப் பார்க்கும்போது முதல் ஒரு நிமிடத்திலேயே என்னுடைய கதாபாத்திரத்தின் தாக்கத்தை உணர்வீர்கள். அந்த அளவுக்கு ஒரு கனமான நடிப்பை வழங்கியிருக்கிறேன். ஒரு சிறிய கதாபாத்திரத்தைக்கூட மிகுந்த அழுத்தமும் தாக்கமும் கொண்டதாக மாற்ற முடியும் என்பதை மதுமிதா மூலம் கற்றுக்கொண்டேன். என் மீது நம்பிக்கை வைத்து இந்த வாய்ப்பைக் கொடுத்த மதுமிதாவுக்கு மனமார்ந்த நன்றி.

இந்தப் படத்தில் பணியாற்றிய நடிகர்கள் மற்றும் தொழில்நுட்பக் கலைஞர்கள் அனைவரின் கூட்டு முயற்சியால்தான் ‘ஜான் டோ’ உருவாகியுள்ளது.. உங்கள் அனைவருக்கும் எனது வாழ்த்துகள். அர்கா நிறுவனத்துக்கும், தயாரிப்பாளர்களுக்கும் வாழ்த்துகள். தமிழ் சினிமாவுக்கு உங்களை வரவேற்கிறேன். தமிழ் திரையுலகில் நீங்கள் மேலும் பல சாதனைகளைப் படைக்க வேண்டும்” என்றார்.

ஒளிப்பதிவாளர் பிரீதா ஜெயராமன் பேசியதாவது:

“‘ஜான் டோ’ திரைப்படத்தில் ஒளிப்பதிவு ரீதியாக எங்களுக்கு முற்றிலும் புதிய அனுபவமாக இருந்தது நீருக்கடியில் படமாக்கிய காட்சிகள்தான். படத்தின் முக்கியமான ஒரு பகுதி நீருக்கடியில் நடைபெறுவதால், அதற்காக முன்கூட்டியே நிறைய திட்டமிட வேண்டியிருந்தது.

படத்தின் முன்தயாரிப்புப் பணிகளின்போதே காட்சிப் பிரிப்பு, காட்சிகளை மனதில் உருவகப்படுத்திப் பார்ப்பது (Pre-visualization) உள்ளிட்ட பல்வேறு பணிகளை மேற்கொண்டோம். நீருக்கடியிலேயே நேரடியாகப் படப்பிடிப்பையும் நடத்தினோம். இதற்காகப் பயிற்சி பெற்ற ஸ்கூபா டைவர்களைப் பயன்படுத்தினோம். நடிகர்களுக்கும் அதற்கேற்ற பயிற்சியும், சூழலுக்குப் பழகுவதற்கான ஏற்பாடுகளும் செய்யப்பட்டன. இது சவாலான பணியாக இருந்தாலும், திட்டமிட்டபடி சிறப்பாகச் செய்து முடித்தோம்” என்றார்.

படத்தொகுப்பாளர் விஜய் வெங்கடரமணன் பேசியதாவது:

“படத்தொகுப்பு என்பது ஒரு வகையில் கதையை மீண்டும் எழுதுவதுதான் (Editing is rewriting). இயக்குநர் எழுதிய கதையைப் படத்தொகுப்பு மேசைக்கு வந்த பிறகு, காட்சிகளின் வரிசை, அதன் அமைப்பு உள்ளிட்ட பல விஷயங்கள் மூலம் இன்னும் சிறப்பாக மாற்றியமைக்க முடியும்.

இயக்குநர் மதுமிதாவுடன் இணைந்து பணியாற்றி கிட்டத்தட்ட 20 ஆண்டுகளுக்கும் மேலாகிவிட்டது. எங்களுக்குள் நல்ல புரிதல் இருப்பதால், அவர் எதைப் படமாக்குகிறார், எதற்காக அந்தக் காட்சியை எடுக்கிறார் என்பது எனக்கு முன்கூட்டியே தெரிந்துவிடும். அவர் படப்பிடிப்பு நடத்திக்கொண்டிருக்கும்போதே நான் படத்தொகுப்புப் பணிகளைத் தொடங்கி, படத்தொகுக்கப்பட்ட காட்சிகளை அவருக்கு அனுப்பி வைப்பேன். இதனால் படப்பிடிப்பு நடைபெற்றுக் கொண்டிருக்கும்போதே படம் எப்படி உருவாகிறது என்பதை அவரால் பார்க்க முடியும். அந்த அளவுக்கு எங்களுக்குள் நல்ல ஒருங்கிணைப்பு இருக்கிறது” என்றார்.

ஆடை வடிவமைப்பாளர்கள் ப்ரியா கரண் மற்றும் ப்ரியா ஹரே பேசியதாவது:

“‘ஜான் டோ’ திரைப்படத்தில் கதையின் மர்மத்தன்மையை அதிகரிக்கும் வகையிலும், சில விஷயங்களைப் பார்வையாளர்களிடமிருந்து மறைத்து வைக்கும் வகையிலும் ஆடைகளின் நிறங்கள் மற்றும் வடிவமைப்புகளைப் பயன்படுத்தியுள்ளோம். அதேபோல், ஒவ்வொரு கதாபாத்திரத்தின் மனநிலையையும் அவர்களுடைய ஆடை வடிவமைப்பின் மூலம் வெளிப்படுத்த முயற்சி செய்துள்ளோம்.

ஒரு திரைப்படத்தில் காஸ்ட்யூம்கள் தனியாகத் தெரியாமல், கதாபாத்திரங்களுடன் இயல்பாகப் பொருந்திவிட்டால் அதுவே சிறந்த ஆடை வடிவமைப்பு என்று நாங்கள் நம்புகிறோம். ஒவ்வொரு கலைஞரும் ஒரே காட்சியில் தனித்துத் தெரிய வேண்டும் என்பதற்காக ஆடைகளை வடிவமைக்காமல், கதையின் சூழலுக்கும் கதாபாத்திரங்களுக்கும் பொருத்தமான வகையில் பணியாற்றியுள்ளோம். அந்த வகையில் ‘ஜான் டோ’ படத்தில் எங்களுடைய முயற்சி சிறப்பாக அமைந்திருக்கிறது என்று நம்புகிறோம்” என்றனர்.

ஒலி வடிவமைப்பாளர் அதுல் கிருஷ்ணா பேசியதாவது:

“இந்தப் படத்தில் பணியாற்றுவதற்கான அருமையான வாய்ப்பை வழங்கிய அனைவருக்கும் நன்றி. சிங்க் சவுண்ட் (Sync Sound) என்பது ஒரு நல்ல இயக்குநர், சிறந்த நடிகர்கள் மற்றும் தொழில்நுட்பக் குழுவினர் இருந்தால் மிகவும் எளிதாகச் செயல்படுத்தக்கூடிய ஒலிப்பதிவு முறையாகும். படப்பிடிப்பின்போதே நடிகர்கள் பேசும் வசனங்களையும், அந்தச் சூழலில் இயல்பாக உருவாகும் ஒலிகளையும் நேரடியாகப் பதிவு செய்வதுதான் சிங்க் சவுண்ட் முறை.

இந்த முறையால் நடிகர்கள் தங்களுடைய வசனங்களிலும், கதாபாத்திரத்தின் உணர்வுகளிலும் முழுமையாகக் கவனம் செலுத்த முடியும். சிங்க் சவுண்ட் முறையில் படப்பிடிப்பு நடைபெறும்போது அரங்கம் அமைதியாகவும், கட்டுப்பாட்டுடனும் இருக்கும். இது நடிகர்களுக்கு மட்டுமின்றி இயக்குநர், ஒளிப்பதிவாளர் உள்ளிட்ட தொழில்நுட்பக் கலைஞர்களும் தங்களுடைய பணிகளில் சிறப்பாகக் கவனம் செலுத்த உதவுகிறது.

‘மயக்கம் என்ன’ திரைப்படமும் சிங்க் சவுண்ட் முறையில் உருவான படம்தான். இந்த முறையில் பதிவு செய்யப்படுவதால் பார்வையாளர்கள் கதாபாத்திரங்களுடன் இன்னும் நெருக்கமாகத் தங்களை இணைத்துக்கொள்ள முடியும் என்று நான் நம்புகிறேன். அனைத்து இயக்குநர்களும் சிங்க் சவுண்ட் முறையில் திரைப்படங்களை உருவாக்க முன்வந்தால், அது திரைப்படங்களுக்கும், டப்பிங் கலைஞர்களுக்கும் நிச்சயம் பயனுள்ளதாக இருக்கும்” என்றார்.
தயாரிப்பு வடிவமைப்பாளர் அஷ்வினி காலே பேசியதாவது:

“‘ஜான் டோ’ திரைப்படத்திற்கான படப்பிடிப்பு இடங்களைத் தேர்வு செய்வதில் பல்வேறு சவால்களைச் சந்தித்தோம். குறிப்பாக, குட்டிக்கானம், பீர்மேடு உள்ளிட்ட மலைப்பகுதிகளில் சுமார் 38 நாட்கள் படப்பிடிப்பு நடைபெற்றது. படத்தில் இடம்பெறும் ஒரு வீடு ஒரு மலையிலும், மற்றொரு வீடு வேறொரு மலையிலும், காவல் நிலையம் மற்றொரு மலையிலும் அமைந்திருந்தது. இதுபோன்ற இடங்களைச் சென்றடைவதும், அங்கு படப்பிடிப்புக்கான ஏற்பாடுகளைச் செய்வதும் மிகவும் சவாலாக இருந்தது.

அதுமட்டுமின்றி, தொடர்ந்து பெய்த மழையும் படப்பிடிப்புப் பணிகளுக்குப் பெரும் சிரமத்தை ஏற்படுத்தியது. இருப்பினும், தயாரிப்புத் தரப்பினர் எங்களுக்குத் தேவையான அனைத்து வசதிகளையும் செய்து கொடுத்து முழு ஆதரவு அளித்தனர். குறிப்பாக, கேரளாவைச் சேர்ந்த லைன் புரொடக்‌ஷன் பொறுப்பாளர் ராஜீவ் சார் எங்களுக்கு மிகவும் உறுதுணையாக இருந்தார். படத்திற்குப் பொருத்தமான சிறந்த படப்பிடிப்பு இடங்களைத் தேர்வு செய்து கொடுத்தார். விரைவில் திரையில் அந்த இடங்களைப் பார்வையாளர்கள் காணும்போது எங்களுடைய உழைப்பைப் புரிந்துகொள்வார்கள்” என்றார்.

தயாரிப்பாளர் பிரசாத் பேசியதாவது:

“மதுமிதாவிடமிருந்து எங்களுக்கு ஒரு அற்புதமான கதைக்களம் கிடைத்தது. இதுவரை நான் பணியாற்றிய இயக்குநர்களிலேயே மதுமிதா மிகவும் அர்ப்பணிப்புடனும் கடின உழைப்புடனும் பணியாற்றக்கூடியவர். அவர் ஒரு சிறப்பான திரைப்படத்தைக் கொடுத்திருக்கிறார். இரண்டு நாட்களுக்கு முன்புதான் எங்கள் குழுவினருடன் இணைந்து படத்தைப் பார்த்தேன். எங்களுடைய நிறுவனத்தின் முதல் தமிழ்த் திரைப்படம் இது என்பதில் மிகவும் பெருமைப்படுகிறேன். இது எங்களுடைய முதல் படமாக மட்டுமல்லாமல், தொடர்ந்து பல தமிழ்ப் படங்களைத் தயாரிப்பதற்கான தொடக்கமாகவும் இருக்கும் என்று நம்புகிறேன்.

இந்தப் படத்தில் இணைந்ததற்காக அர்ஜுன் தாஸுக்கு நன்றி தெரிவித்துக் கொள்கிறேன். சந்துரு கதாபாத்திரத்தில் அவரைத் தவிர வேறு யாரையும் என்னால் நினைத்துப் பார்க்க முடியவில்லை. அவர் மிகச்சிறந்த நடிகர். இப்போது அவர் ஒரு திறமையான ராப் கலைஞராகவும் இருக்கிறார். படத்தில் பணியாற்றிய நடிகர்கள் மற்றும் தொழில்நுட்பக் கலைஞர்கள் அனைவருக்கும் நன்றி. அவர்களைப் பற்றி இயக்குநர் மதுமிதாவே பேசுவார் என்று நினைக்கிறேன். இந்தப் படத்தில் உழைத்த ஒவ்வொருவருக்கும் எனது மனமார்ந்த நன்றிகள்.

எங்களுடைய கூட்டாளிகளான நெட்ஃபிளிக்ஸ்( ஓடிடி பங்குதாரர்), ஜீ தமிழ்(சாட்டிலைட் பங்குதாரர்), டிவோ மற்றும் இசைப் பங்குதாரர்கள் அனைவருக்கும் நன்றி. குறிப்பாக ஏஜிஎஸ் (AGS) நிறுவனத்துக்கும், அர்ச்சனா, ஐஸ்வர்யா மற்றும் ஏஜிஎஸ் (AGS)  குழுவினருக்கும் நன்றியைத் தெரிவித்துக் கொள்கிறேன்.

இந்தப் படத்தைத் தெலுங்கில் தயாரிப்பதா அல்லது தமிழில் தயாரிப்பதா என்ற குழப்பம் ஆரம்பத்தில் எங்களுக்கு இருந்தது. எங்களுடைய பலம் தெலுங்குத் திரையுலகில் இருப்பதால் தெலுங்கில் தயாரிக்கலாம் என்று முதலில் நினைத்தோம். ஆனால், இந்தக் கதைக்கு மிகவும் அவசியமான உள்ளூர் கலாச்சாரப் பின்னணியும் இயல்புத்தன்மையும் தமிழில் படமாக்கும்போதுதான் சரியாக வெளிப்படும் என்பதை உணர்ந்தோம். அதே நேரத்தில் படத்தின் விநியோகம் குறித்த கவலையும் இருந்தது. ஏஜிஎஸ் (AGS) நிறுவனம் எங்களுடன் இணைந்ததால் இப்போது அந்தப் பொறுப்பு பாதுகாப்பான கைகளில் இருப்பதாக நம்புகிறேன். இத்தகைய மதிப்புமிக்க நிறுவனத்துடன் இணைந்திருப்பதில் மகிழ்ச்சி அடைகிறேன்.

‘ஜான் டோ’ ஒரு சிறந்த திரைப்படம். நவம்பர் 13ஆம் தேதி திரையரங்குகளில் வெளியாகும் இப்படத்தை அனைவரும் திரையரங்குகளுக்குச் சென்று பார்த்து ஆதரவு அளிக்க வேண்டும்” என்றார்.

குழந்தை நட்சத்திரம் நீரவ் பேசியதாவது:

“‘ஜான் டோ’ படப்பிடிப்புத் தளத்தில் பணியாற்றியது எனக்கு மிகவும் மகிழ்ச்சியான அனுபவமாக இருந்தது. இயக்குநர் மதுமிதா எனக்கு முழுமையான ஆதரவு கொடுத்தார். எப்படி நடிக்க வேண்டும் என்பதைப் பொறுமையாகச் சொல்லிக் கொடுத்து, மிகவும் சுதந்திரமாகவும் வசதியாகவும் நடிக்கச் வைத்தார். அதனால் படப்பிடிப்பில் எந்தவிதமான தயக்கமும் இல்லாமல் ஜாலியாகப் பணியாற்ற முடிந்தது.

அர்ஜுன் தாஸ், ஜாரா, சஞ்சனா நடராஜன் உள்ளிட்ட திறமையான கலைஞர்களுடன் இணைந்து நடித்தது மிகவும் மகிழ்ச்சியாக இருந்தது. ஆரம்பத்தில் அவர்களைப் பார்க்கும்போது கொஞ்சம் கூச்சமாகவும் தயக்கமாகவும் இருந்தது. ஆனால் அனைவரும் என்னைச் சகஜமாகப் பழக வைத்தார்கள். இந்தப் படத்தில் பணியாற்றியது மறக்க முடியாத அனுபவம்” என்றார்.

நடிகை ஜாரா பேசியதாவது:

“ஒரு படப்பிடிப்பில் ஒவ்வொரு காட்சியும் முடிந்த பிறகு, நடிகர்களுக்கு இயக்குநர் மற்றும் தொழில்நுட்பக் கலைஞர்களிடமிருந்து பாராட்டுகளும் கருத்துகளும் கிடைக்கும். ஒரு காட்சி சரியாக வரவில்லை என்றால், அதை எப்படிச் செய்தால் சிறப்பாக இருக்கும் என்பதையும் இயக்குநர் எடுத்துச் சொல்வார். ஒரு காட்சி சிறப்பாக அமைந்திருந்தால் ஒளிப்பதிவாளரும் இயக்குநரும் ஒருவரையொருவர் பாராட்டிக்கொள்வார்கள். அதேபோல், ஆடை வடிவமைப்பு மற்றும் கலை இயக்கம் ஆகியவை படத்தின் வண்ணங்கள், பின்னணி மற்றும் உணர்வுகளுக்கு ஏற்ப ஒன்றிணைந்து செயல்படும்.

ஆனால் இவை அனைத்தையும் தாண்டி, ஒரு திரைப்படத்திற்குக் கிடைக்க வேண்டிய மிக முக்கியமான அங்கீகாரம் பார்வையாளர்களிடமிருந்துதான் வர வேண்டும்.

குறிப்பாக, எங்களுடைய இயக்குநர் மதுமிதாவுக்கு அந்த அங்கீகாரத்தை வழங்கக்கூடியவர்கள் ரசிகர்களாகிய நீங்கள்தான். எனவே, நவம்பர் 13ஆம் தேதி அனைவரும் திரையரங்குகளுக்கு வந்து ‘ஜான் டோ’ திரைப்படத்தைப் பார்த்து ரசிக்க வேண்டும். நாங்கள் அனைவரும் மிகுந்த உழைப்பைக் கொடுத்து இந்தப் படத்தை உருவாக்கியிருக்கிறோம். உங்கள் நேரத்தையும் பணத்தையும் செலவழித்துப் பார்க்கும் அளவுக்கு இந்தப் படம் சிறப்பான திரையரங்க அனுபவத்தைத் தரும் என்று உண்மையாக நம்புகிறேன்” என்றார்.

நடிகை ஸ்ருஷ்டி பேசியதாவது:

“அனைவருக்கும் வணக்கம். எனக்குக் கொஞ்சம் தமிழ்தான் தெரியும் என்பதால் இங்கு பேசுவதற்கு மிகவும் பதற்றமாக இருக்கிறது. உண்மையில், நான் முதலில் கற்றுக்கொண்ட தமிழ் வார்த்தைகளே ‘தமிழ் தெரியாது’ என்பதுதான். ஆனால் இன்று உங்கள் அனைவருடனும் இந்த மகிழ்ச்சியான தருணத்தைப் பகிர்ந்துகொள்வதில் மிகவும் சந்தோஷமாக இருக்கிறேன்.

தமிழ்நாட்டுடன் எனக்கு ஒரு சிறப்பான நினைவு இருக்கிறது. வீட்டை விட்டு வெகுதூரம் நான் முதன்முதலில் பயணம் செய்தது சென்னைக்குத்தான். முதன்முதலில் விமானத்தில் பயணம் செய்து டெல்லியை விட்டு வேறொரு நகரத்திற்கு வந்ததும் சென்னை தான். அதேபோல், முதன்முதலில் கடலைப் பார்த்ததும் சென்னையில்தான். இப்போது என்னுடைய முதல் திரைப்படமும் தமிழ் திரைப்படமாக அமைந்திருப்பது தற்செயலானது என்று தோன்றவில்லை. இதற்குப் பின்னால் ஏதோ ஒரு பூர்வஜென்மத் தொடர்பு இருக்கலாம் என்று நினைக்கிறேன்.

என் மீது நம்பிக்கை வைத்து இந்த வாய்ப்பை வழங்கிய தயாரிப்பாளர்களுக்கு நன்றி.

மதுமிதா ஒரு சிறந்த இயக்குநர். அவர் உருவாக்கிய தர்ஷனா கதாபாத்திரம் என்னுடைய தனிப்பட்ட பயணத்திலும் மிகவும் முக்கியமானதாக இருக்கும். அந்தக் கதாபாத்திரத்தை எனக்கு வழங்கியதற்காக அவருக்கு மனமார்ந்த நன்றி. சக நடிகர்களான அர்ஜுன் தாஸ், சஞ்சனா, ஜாரா, நீரவ், அனுபமா மேடம் உள்ளிட்ட அனைவரும் என்னை ஒரு புதுமுகமாக உணர வைக்காமல், கேமரா முன்னாலும் பின்னாலும் மிகவும் வசதியாக இருக்க உதவினார்கள்.

ஒளிப்பதிவாளர் பிரீதா மேடம், ஒளி மற்றும் லென்ஸ் குறித்த நுணுக்கங்களைப் புரிந்துகொள்ள எனக்கு உதவியதற்கு நன்றி. ‘ஜான் டோ’ படக்குழுவில் பணியாற்றிய ஒவ்வொரு கலைஞருக்கும் எனது அன்பையும் நன்றியையும் தெரிவித்துக் கொள்கிறேன். உங்கள் அனைவருடைய அன்பும் ஆதரவும் எனக்கு மிகவும் முக்கியம். நாங்கள் அனைவரும் மிகுந்த உழைப்பைக் கொடுத்து இந்தப் படத்தை உருவாக்கியிருக்கிறோம். நவம்பர் 13ஆம் தேதி திரையரங்குகளுக்கு வந்து படத்தைப் பார்த்து ரசித்து ஆதரவு அளிக்குமாறு கேட்டுக்கொள்கிறேன்” என்றார்.

நடிகை சஞ்சனா நடராஜன் பேசியதாவது:

‘ஜான் டோ’ படத்தைப் பற்றிப் பேசத் தொடங்கினால், அனைவருக்கும் நன்றி சொல்வதிலேயே இந்த நிகழ்ச்சி முடிந்துவிடும். அதனால் அதையெல்லாம் படத்தின் வெற்றிவிழாவில் பார்த்துக்கொள்ளலாம்.

இந்தப் படத்தின் நடிகர்கள் மற்றும் தொழில்நுட்பக் கலைஞர்கள் அனைவருடனும் பணியாற்றியது மிகச்சிறந்த அனுபவம். நடிகையாக மட்டுமின்றி ஒரு மனிதராகவும் இவ்வளவு அற்புதமான குழுவுடன் இணைந்து பணியாற்றியதில் மகிழ்ச்சி. அர்ஜுன் தாஸுடன் நான் இணைந்து நடிக்கும் இரண்டாவது படம் இது. அதிலும் இந்தப் படத்தில் நாங்கள் இருவரும் காவல்துறை அதிகாரிகளாக நடித்திருப்பது மகிழ்ச்சியையும் பெருமையையும் அளிக்கிறது. அர்ஜுன் மிகவும் இனிமையானவர், நட்பாகப் பழகக்கூடியவர். படப்பிடிப்புத் தளத்தில் எப்போதும் ஜாலியாகவும் கலகலப்பாகவும் இருப்பார். அவருடன் தீவிரமான காட்சிகளில் நடிப்பதுகூட சில நேரங்களில் சவாலாக இருக்கும். அவருடன் மீண்டும் பணியாற்றியது சிறப்பான அனுபவம். இன்னொரு படத்திலும் அவருடன் இணைந்து நடிக்க ஆவலாக இருக்கிறேன்.

இந்தப் படத்திற்காக சுமார் 35 நாட்கள் தொடர்ந்து பணியாற்றினேன். நான் இதுவரை பணியாற்றிய குழுக்களில் மிகவும் திட்டமிட்டும், நேரத்தை வீணாக்காமலும், திறமையாகவும் பணியாற்றிய குழு இதுதான். தினமும் படப்பிடிப்புக்குச் செல்வதே உற்சாகமாக இருக்கும். குறிப்பாக, படக்குழுவில் நிறைய பெண்கள் இருந்தது கூடுதல் மகிழ்ச்சியாக இருந்தது. அர்ஜுன் சாரை நாங்கள் அனைவரும் படப்பிடிப்பில் அடிக்கடி கலாய்ப்போம். அவரும் அதற்குப் பதிலடி கொடுப்பார். எப்போது யாரைக் கலாய்க்க வேண்டும் என்பது அவருக்கு நன்றாகத் தெரியும். இப்படி கலகலப்பான பல நினைவுகள் இந்தப் படப்பிடிப்பில் இருக்கின்றன. தயாரிப்பாளர்கள், விநியோகஸ்தர்கள் மற்றும் படக்குழுவினர் அனைவரும் எனக்கு அளித்த ஆதரவுக்கும் அன்புக்கும் நன்றி.

‘ஜான் டோ’ ஒரு சிறப்பான சென்டிமென்ட் கலந்த சைக்கலாஜிக்கல் திரில்லர் திரைப்படம். நான் இன்னும் முழுப் படத்தையும் பார்க்கவில்லை என்றாலும், படத்தின் சில காட்சிகளைப் பார்த்திருக்கிறேன். படத்தைப் பார்த்த பலரும் என்னிடம் மிகவும் நன்றாக இருப்பதாகத் தெரிவித்துள்ளனர். நவம்பர் 13ஆம் தேதி அனைவரும் திரையரங்குகளுக்குச் சென்று படத்தைப் பாருங்கள்.

குடும்பத்துடன் குழந்தைகளையும் அழைத்துச் சென்று ரசிக்கக்கூடிய வகையில் படம் இருக்கும். திரையரங்கிலிருந்து வெளியே வரும்போது ஒரு சிறந்த திரைப்படத்தைப் பார்த்த அனுபவம் உங்களுக்குக் கிடைக்கும் என்று நம்புகிறோம். ஊடக நண்பர்களும் ரசிகர்களும் எங்களுக்கு ஆதரவு அளிக்க வேண்டும். அப்போதுதான் இதுபோன்ற மேலும் பல நல்ல திரைப்படங்களில் எங்களால் பணியாற்ற முடியும்” என்றார்.

நடிகர் அர்ஜுன் தாஸ் பேசியதாவது,

“முதலில் இந்தப் பத்திரிகையாளர் சந்திப்புக்கு வந்திருக்கும் ஊடக நண்பர்கள் அனைவருக்கும் நன்றி. இந்தப் படத்தின் கதையை முதலில் இயக்குநர் மதுமிதா என்னிடம் சொன்னபோது, கதையைப் படித்துப் பாருங்கள் என்றுதான் கூறினார். கதையைப் படித்துவிட்டு நடிக்கச் சம்மதம் தெரிவித்தேன். அதன்பிறகு இப்படத்தை ‘பாகுபலி’ உள்ளிட்ட பிரம்மாண்ட படங்களைத் தயாரித்த அர்கா மீடியாவொர்க்ஸ் நிறுவனம் தயாரிக்கிறது என்று சொன்னபோது மிகவும் மகிழ்ச்சியாக இருந்தது. அர்கா நிறுவனத்துடன் பணியாற்றுவது எனக்குப் பெருமையான விஷயம். எங்கள் படத்தின் மீது நம்பிக்கை வைத்த தயாரிப்பாளர்கள் அனைவருக்கும் நன்றி.

இந்தப் படத்தில் நடித்த நீரவ் மிகவும் அழகாகவும், இயல்பாகவும் நடித்திருக்கிறார். அவருக்கு இன்னும் நிறைய பட வாய்ப்புகள் கிடைக்க வேண்டும். ஜாராவுக்கும் என்னுடைய வாழ்த்துகள். ஸ்ருஷ்டி இந்தப் படத்திற்காக மிகவும் கடினமாக உழைத்திருக்கிறார். குறிப்பாக, அவருக்குத் தமிழ் பேசத் தெரியாவிட்டாலும் சிங்க் சவுண்ட் முறையில் படப்பிடிப்பு நடைபெற்றபோது கிடைக்கும் நேரங்களில் வசனங்களைத் தொடர்ந்து பயிற்சி செய்து, ஒரே டேக்கில் சிறப்பாகப் பேசி முடிப்பார். சஞ்சனா இந்தப் படத்தில் மிகச்சிறப்பாக நடித்திருக்கிறார். பிரீதா மேடம் எங்களுடைய ஒளிப்பதிவாளர். எந்த இடத்திற்குச் சென்றாலும் மிகவும் இயல்பாகப் படப்பிடிப்பைத் தொடங்கிவிடுவார். தயாரிப்பு வடிவமைப்பாளர் அஷ்வினி மேடமும் அவரது குழுவினரும் படப்பிடிப்புத் தளத்தில் தொடர்ந்து ஓடிக்கொண்டே இருப்பார்கள். ஒவ்வொரு ஃபிரேமையும் சிறப்பாகக் கொண்டுவருவதில் அதிக கவனம் செலுத்தினார்கள். காஸ்ட்யூம் டிசைனர்களான பிரியா ஹரி மற்றும் பிரியா கரண் இருவரும் ஒருவரை ஒருவர் பார்த்துக்கொண்டே தங்களுக்குள் புரிந்துகொண்டு பணியாற்றுவார்கள். அவர்களுடைய ஒருங்கிணைப்பு மிகவும் ஆச்சரியமானது. அதேபோல் அனு மேடம், அதுல் கிருஷ்ணா, ராஜேஷ், உதவி இயக்குநர்கள் மற்றும் ஒட்டுமொத்த தொழில்நுட்பக் குழுவினருக்கும் நன்றி. படத்தொகுப்பாளர் விஜய் வெங்கடரமணன் அதிகம் பேசமாட்டார். ஆனால், அவருடைய பணி படத்தை மிகச்சிறப்பாக வடிவமைத்திருக்கிறது.

அர்ச்சனா மேடம் இந்தப் படத்தில் என்னுடைய அம்மாவாக நடித்திருக்கிறார். அவருடன் எனக்கு ஒரு சிறப்பான நினைவு இருக்கிறது. ‘கைதி’ படத்திற்காக எனக்குக் கிடைத்த முதல் விருது ஜீ விருது தான். அந்த நிகழ்ச்சியைத் தொகுத்து வழங்கியது அர்ச்சனா மேடம். அதன்பிறகு அவர் தொகுத்து வழங்கும் விருது விழாக்களில் எனக்கு விருது கிடைப்பது வழக்கமாகிவிட்டது. அதனால் அவரை என்னுடைய அதிர்ஷ்ட தேவதை என்று அழைப்பேன். இந்தப் படத்திலும் மிகவும் அழகாக நடித்திருக்கிறார். இயக்குநர் மதுமிதாவுடன் இது எனக்கு இரண்டாவது படம். ஆரம்பத்தில் அவரை மேடம் என்று அழைத்தாலும், எங்களுடைய நீண்ட பயணத்திற்குப் பிறகு இப்போது மதுமிதா என்று நட்புடன் அழைக்கிறேன். இதற்கு முன்பு ஒரு படத்திற்காக என்னை ஆடிஷனுக்கு அழைத்திருந்தார். அப்போது ஆடிஷன் செய்து அனுப்பினேன். அவர் அதைத் தேர்வு செய்ததாகத் தகவல் வந்தபோது மிகவும் மகிழ்ச்சியாக இருந்தது. இப்போது ‘ஜான் டோ’ படத்திற்காக மீண்டும் என்னைத் தொடர்புகொண்டு இந்தக் கதாபாத்திரத்திற்கு நீங்கள் பொருத்தமாக இருப்பீர்கள் என்று கூறினார். அவருடன் இணைந்து பணியாற்றியது சிறப்பான அனுபவம். மதுமிதா மிகவும் அர்ப்பணிப்புடன், முழுமையாகத் திரைப்படத்தைப்  பற்றியே சிந்தித்துக்கொண்டிருக்கும் இயக்குநர். ஒரு பெண் இயக்குநராக மட்டுமல்லாமல், ஒரு ஒட்டுமொத்த படையையே வழிநடத்தும் ஒருவராகப் பணியாற்றியிருக்கிறார். அவருக்குத் துணையாகத் திறமையான தொழில்நுட்பக் கலைஞர்களையும் தேர்வு செய்திருக்கிறார்.

இந்தப் படத்திற்கு இசையமைத்த முஜீப் மஜீத் மற்றும் பாடகர்கள் உள்ளிட்ட அனைவருக்கும் நன்றி. குறிப்பாக, என்னுடைய சகோதரி மாளவிகாவும் இந்தப் படத்தில் ஒரு பாடலைப் பாடியிருக்கிறார். குடும்பத்தினருக்காகப் பாடல் பாடுவதற்கு அவருடைய குரலைப் பரிசோதித்துப் பார்க்கும்படி மதுமிதாவிடம் கேட்டேன். அவர் ஆடிஷனில் தேர்வானது எனக்கு மகிழ்ச்சியாக இருந்தது. படத்தை வழங்கும் ஏஜிஎஸ் (AGS) நிறுவனம், அர்ச்சனா மேடம், ஐஸ்வர்யா மேடம் மற்றும் அவர்களுடைய குழுவினருக்கும் நன்றி. நெட்ஃபிளிக்ஸ், ஜீ தமிழ், டிவோ உள்ளிட்ட நிறுவனங்களுக்கும் நன்றியைத் தெரிவித்துக் கொள்கிறேன். ‘ஜான் டோ’ ஒரு சைக்கலாஜிக்கல் திரில்லர் திரைப்படம் மட்டுமல்ல; இதில் வலுவான உணர்வுபூர்வமான அம்சங்களும் இடம்பெற்றுள்ளன. பார்வையாளர்களை இருக்கையின் நுனியில் அமர்ந்து பார்க்க வைக்கும் திரில்லராகவும் இருக்கும். நவம்பர் 13ஆம் தேதி திரையரங்குகளில் வெளியாகும் இப்படத்தை அனைவரும் பார்த்து ஆதரவு அளிக்க வேண்டும். படம் நிச்சயம் உங்களுக்குப் பிடிக்கும் என்று நம்புகிறேன்” என்றார்.

இயக்குநர் மதுமிதா பேசியதாவது,

“‘ஜான் டோ’ திரைப்படத்தின் டிரெய்லரை வெளியிட ஆதரவளித்த கார்த்திக் சுப்புராஜ், விஜய் ஆண்டனி, லோகேஷ் கனகராஜ், பா. ரஞ்சித், புஷ்கர் – காயத்ரி உள்ளிட்ட அனைவருக்கும் நன்றி. ‘பாகுபலி’ படத்தைத் தயாரித்த அர்கா மீடியாவொர்க்ஸ் நிறுவனம் தமிழில் இப்படத்தைத் தயாரித்திருப்பது எங்களுக்குப் பெருமை. தயாரிப்பாளர்கள் ஷோபு, பிரசாத் மற்றும் அவர்களுடைய குழுவினர் ஒவ்வொரு கட்டத்திலும் எங்களுக்கு மிகப்பெரிய ஆதரவையும் ஊக்கத்தையும் அளித்தனர். என்னுடைய உதவி இயக்குநர்கள் மற்றும் தொழில்நுட்பக் கலைஞர்கள் அனைவரும் இரவு பகலாக உழைத்திருக்கிறார்கள்.

எந்த ஜானரில் திரைப்படம் உருவாக்கினாலும் மனித உணர்வுகள்தான் என்னுடைய படங்களின் முக்கிய அம்சமாக இருக்கும். ‘ஜான் டோ’ ஒரு சைக்கலாஜிக்கல் திரில்லர். கேரளா – தமிழ்நாடு எல்லையில் அமைந்துள்ள குறிஞ்சி மேடு என்ற மலைப்பிரதேசத்தில் கதை நடைபெறுகிறது. அர்ஜுன் தாஸ் கேரள காவல்துறை அதிகாரியாகவும், சஞ்சனா தமிழ்நாடு காவல்துறை அதிகாரியாகவும் நடித்துள்ளனர். இந்தப் படத்தின் மூலம் எனக்கு ஒரு அக்கா கிடைத்திருக்கிறார் என்றால் அது அர்ச்சனா மேடம்தான். அவர் எனக்குப் படப்பிடிப்புத் தளத்தில் மிகப்பெரிய ஆதரவாக இருந்தார்.

இந்த நிகழ்ச்சியில் வழங்கிய சிவப்பு நிற டெடி பியருக்கும் ஒரு அர்த்தம் இருக்கிறது. ஒவ்வொருவருக்கும் சில குறைகள் இருந்தாலும் நான் போதுமா!? என்ற கேள்வி மனதில் அடிக்கடி எழும் , நாம் போதும்!!! என  உணர்த்துவதற்காக தான் அதை வழங்கினோம். ஒரு நல்ல கணவராக, மனைவியாக, குழந்தையாக, நடிகராக அல்லது தொழில்நுட்பக் கலைஞராக இருக்கிறோமா என்ற கேள்வி எல்லோருக்குள்ளும் இருக்கிறது. அதற்கான பதில், நம்மிடம் குறைகள் இருந்தாலும் நாம் நம்முடைய இடத்தில் சிறந்தவர்கள்தான் என்பதுதான்.

ஒரு இயக்குநருக்கான உண்மையான அங்கீகாரம் பார்வையாளர்களிடமிருந்துதான் கிடைக்கும். நெட்ஃபிளிக்ஸ், ஜீ தமிழ், திவோ மற்றும் ஏஜிஎஸ் போன்ற நிறுவனங்கள் படத்தைப் பார்த்துவிட்டு எங்களுடன் இணைந்திருப்பது மிகப்பெரிய நம்பிக்கையை அளித்துள்ளது. நவம்பர் 13ஆம் தேதி திரையரங்குகளில் வெளியாகும் ‘ஜான் டோ’ திரைப்படத்தை அனைவரும் பார்த்து ஆதரவு அளிக்க வேண்டும்” நன்றி என்றார்.

‘பாகுபலி’ உள்ளிட்ட பிரம்மாண்ட படைப்புகளைத் தயாரித்த அர்கா மீடியாவொர்க்ஸ்  (Arka Mediaworks) நிறுவனம் சார்பில் ஷோபு யார்லகட்டா (Shobu Yarlagadda), பிரசாத் தேவினேனி (Prasad Devineni) ஆகியோர் தயாரித்துள்ள இப்படத்தை இயக்குநர் மதுமிதா இயக்கியுள்ளார். அர்ஜுன் தாஸ் கதையின் நாயகனாக நடித்துள்ள இப்படத்தில் சஞ்சனா நடராஜன், ஸ்ருஷ்டி, ஜாரா வினீத் சந்தோக், நீரவ் உள்ளிட்ட பலர் நடித்துள்ளனர்.

இயக்குநர் மதுமிதா மற்றும் நிக்கோலஸ் செவாலியர் (Nicholas Chevaillier) இணைந்து படத்தின் கதை மற்றும் திரைக்கதையை எழுதியுள்ளனர். படத்திற்கு பிரீதா ஜெயராமன் ISC ஒளிப்பதிவு செய்துள்ளார். முஜீப் மஜீத் இசையமைக்க, ஆர்டிஸ்ட் 404 (Artist 404) கூடுதல் இசைப் பணிகளை மேற்கொண்டுள்ளது. படத்தொகுப்பை விஜய் வெங்கடரமணன் கவனித்துள்ளார். தயாரிப்பு வடிவமைப்பாளராக அஷ்வினி காலே பணியாற்றியுள்ளார்.

அர்ஜுன் தாஸ் முதன்முறையாக காவல் அதிகாரி கதாபாத்திரத்தில் நடித்திருப்பது இப்படத்தின் மீதான எதிர்பார்ப்பை மேலும் அதிகரித்துள்ளது. அர்கா மீடியாவொர்க்ஸ்  நிறுவனத்தின் தயாரிப்பு, அர்ஜுன் தாஸின் வித்தியாசமான கதாபாத்திரம், மதுமிதாவின் இயக்கம் எனப் பல எதிர்பார்ப்புகளை ஏற்படுத்தியுள்ள ‘ஜான் டோ’ திரைப்படம் நவம்பர் 13ஆம் தேதி திரையரங்குகளில் வெளியாகிறது.

அர்ஜுன் தாஸின் ‘ஜான் டோ’ (John Doe) நவம்பர் 13 முதல் திரையரங்குகளில் வெளியீடு!

deccanwebtv Nov 5, 2026

கதாப்பாத்திரங்கள் நிறைந்த மர்மமான போஸ்டர்… வெளியீட்டுத் தேதியுடன் களமிறங்கும் அர்ஜுன் தாஸின் ‘ஜான் டோ’!

அர்ஜுன் தாஸ் நடிப்பில் உருவாகியுள்ள சைக்கலாஜிக்கல் கிரைம் திரில்லர் திரைப்படமான ‘ஜான் டோ’ (John Doe), வரும் நவம்பர் 13ஆம் தேதி திரையரங்குகளில் வெளியாகிறது. இதனை அசத்தலான ஒரு போஸ்டர் மூலம்  படக்குழு அதிகாரப்பூர்வமாக அறிவித்துள்ளது.

இந்த போஸ்டர், மர்மம் நிறைந்த கிரைம் திரில்லர் கதைக்களத்தை உணர்த்தும் வகையில் வடிவமைக்கப்பட்டுள்ளது. சிவப்பு மற்றும் கருப்பு வண்ணப் பின்னணியில், காவலர் சீருடையில் இருக்கும் அர்ஜுன் தாஸின் தோற்றம் மையமாக இடம்பெற்றுள்ளது. அவரைச் சுற்றிலும் பல்வேறு கதாபாத்திரங்களின் புகைப்படங்கள், மர்மமான காட்சிகள் மற்றும் விசாரணையுடன் தொடர்புடைய தடயங்களை நினைவூட்டும் அம்சங்கள் இடம்பெற்றுள்ளன. குறிப்பாக, கதாபாத்திரங்களின் முகபாவனைகளும், ஒன்றோடொன்று தொடர்புடையது போன்ற புகைப்படங்களின் தொகுப்பும் படத்தின் பின்னணியில் இருக்கும் மர்ம முடிச்சுகள் குறித்த எதிர்பார்ப்பை அதிகரிக்கின்றன. ‘ஜான் டோ’ என்ற தலைப்புடன் நவம்பர் 13ஆம் தேதி வெளியாகும் என்ற அறிவிப்பும் இடம்பெற்றுள்ள இந்தப் போஸ்டர், படத்தின் மீதான ரசிகர்களின் ஆர்வத்தைத் தூண்டியுள்ளது.

‘பாகுபலி’ உள்ளிட்ட பிரம்மாண்ட படைப்புகளைத் தயாரித்த அர்கா மீடியாஒர்க்ஸ் (Arka Mediaworks) நிறுவனம் சார்பில் ஷோபு யார்லகட்ட  (Shobu Yarlagadda), பிரசாத் தேவினேனி ( Prasad Devineni) ஆகியோர் தயாரித்துள்ள இப்படத்தை இயக்குநர் மதுமிதா இயக்கியுள்ளார். அர்ஜுன் தாஸ் கதையின் நாயகனாக நடித்துள்ள இப்படத்தில் சஞ்சனா நடராஜன், ஸ்ருஷ்டி, ஜாரா வினீத் சந்தோக், நீரவ் உள்ளிட்ட பலர் நடித்துள்ளனர். இயக்குநர் மதுமிதா மற்றும் நிக்கோலஸ் செவாலியர் ( Nicholas Chevaillier) இணைந்து படத்தின் கதை மற்றும் திரைக்கதையை எழுதியுள்ளனர்.

படத்திற்கு பிரீதா ஜெயராமன் ISC ஒளிப்பதிவு செய்துள்ளார். முஜீப் மஜீத் இசையமைக்க, ஆர்டிஸ்ட் 404 (Artist 404) கூடுதல் இசைப் பணிகளை மேற்கொண்டுள்ளது. படத்தொகுப்பை விஜய் வெங்கடரமணன் கவனித்துள்ளார். தயாரிப்பு வடிவமைப்பாளராக அஷ்வினி காலே பணியாற்றியுள்ளார்.

“ஜான் டோ என்பவர் யார்? பாதிக்கப்பட்டவரா, கொலைகாரனா அல்லது காணாமல் போன குழந்தையா? என்பதைச் சுற்றி இப்படத்தின் கதை நகர்கிறது. சந்துரு உண்மையைத் தேடிப் பயணிக்கும்போது, ஜான் டோவைப் பற்றிய உண்மையை யாரும் எதிர்கொள்ளத் தயாராக இல்லையென்றால் என்ன செய்வது என்ற கேள்வி எழுகிறது. பார்வையாளர்களால் எளிதில் யூகிக்க முடியாத வகையில் திரைக்கதை அமைக்கப்பட்டுள்ளது.”

அர்ஜுன் தாஸ் முதன்முறையாக காவல் அதிகாரி கதாபாத்திரத்தில் நடித்திருப்பது இப்படத்தின் மீதான எதிர்பார்ப்பை மேலும் அதிகரித்துள்ளது. போஸ்டரில் காவலர் சீருடையில் அவர் தோன்றியிருப்பதும், மர்மம் நிறைந்த கதாபாத்திரங்களின் புகைப்படங்கள் இடம்பெற்றிருப்பதும் படத்தின் கதைக்களம் குறித்த பல்வேறு கேள்விகளை எழுப்புகின்றன.

அர்கா மீடியாஒர்க்ஸ் நிறுவனத்தின் தயாரிப்பு, அர்ஜுன் தாஸின் வித்தியாசமான கதாபாத்திரம், மதுமிதாவின் இயக்கம் எனப் பல எதிர்பார்ப்புகளை ஏற்படுத்தியுள்ள ‘ஜான் டோ’ திரைப்படம், நவம்பர் 13ஆம் தேதி திரையரங்குகளில் வெளியாகிறது.

‘பிளாக் கோல்டு’ படத்தின் பத்திரிகையாளர் சந்திப்பு நிகழ்வு !!

deccanwebtv Nov 4, 2026

உண்மைச் சம்பவங்களின் பின்னணியில் உருவாகியுள்ள ‘பிளாக் கோல்டு’ – நவம்பர் 13-ம் தேதி திரையரங்குகளில் வெளியாகிறது!

எம்.எம். ஸ்டூடியோஸ் சார்பில் எம். மூர்த்தி தயாரிப்பில், தீரன் அருண்குமார் இயக்கத்தில் நடிகர் வெற்றி கதாநாயகனாக நடித்துள்ள திரைப்படம் ‘பிளாக் கோல்டு’. இப்படத்தில் லிவிங்ஸ்டன், ப்ரியாலயா,துளசி, பிக்பாஸ் அபிராமி, ஏ.வெங்கடேஷ் உள்ளிட்ட பலர் முக்கிய கதாபாத்திரங்களில் நடித்துள்ளனர்.

யாருக்கும் தெரியாத பெரிய நிழல் வணிகம், ஒரு நடுத்தர குடும்பத்தைச் சேர்ந்த இளைஞனை   எவ்வாறு பாதிக்கிறது என்பதே இப்படத்தின் கதை.உண்மைச் சம்பவங்களின் அடிப்படையில் இப்படம் உருவாக்கப்பட்டிருப்பது கூடுதல் கவனம் பெற்றுள்ளது.

இப்படம் வரும் நவம்பர் 13-ம் தேதி திரையரங்குகளில் வெளியாகவுள்ள நிலையில், படத்தின் வெளியீட்டை முன்னிட்டு நடைபெற்ற பத்திரிகையாளர் சந்திப்பில் படக்குழுவினர் கலந்துகொண்டு படத்தின் உருவாக்கம், கதைக்களம், நட்சத்திரங்களின் பங்களிப்பு மற்றும் படப்பிடிப்பு அனுபவங்கள் குறித்து பகிர்ந்துகொண்டனர்.

இந்நிகழ்வினில்…,

தயாரிப்பாளர் எம். மூர்த்தி பேசியதாவது,

“நான் முதலில் நடிகராக வேண்டும் என்றுதான் சினிமாவுக்கு வந்தேன். இன்று தயாரிப்பாளராக உங்கள் முன்னால் நிற்கிறேன். இயக்குநர் தீரன் அருண்குமார் இந்தக் கதையை என்னிடம் சொன்னபோது, மிகவும் புதுமையான கதைக்களமாக இருந்தது. வேறு சில தயாரிப்பாளர்களிடமும் கதையைச் சொல்லியிருந்தாலும், அதிக காலம் எடுத்துக்கொண்டதால், இந்தப் படத்தைத் நானே தயாரிக்க சம்மதித்தேன். இந்தப் படம் உருவாக எனது முழு ஆதரவையும் கொடுத்தேன்.

இதுபோன்ற புதுமையான கதையைப் படமாக்கும்போது ரசிகர்களிடம் வரவேற்பு கிடைக்குமா என்ற தயக்கம் இருந்தது. ஆனால் எனது மனைவி, மகளிடம் கதையைப் பற்றிக் கூறியபோது, இது வித்தியாசமான முயற்சி என்றும், நம்மைச் சுற்றி நடக்கும் விஷயங்களைப் பேசும் கதை என்றும் ஊக்கமளித்தார்கள். இந்தப் படத்தை உருவாக்குவதில் கதாநாயகன் வெற்றியின் பங்களிப்பு மிக முக்கியமானது. மற்ற நடிகர்கள் மற்றும் தொழில்நுட்பக் கலைஞர்கள் அனைவரும் இரவு, பகல் பாராமல் மிகுந்த அர்ப்பணிப்புடன் பணியாற்றினார்கள்.

நான் இதுவரை ஆயிரக்கணக்கான படங்களை பார்த்திருப்பேன். அந்த அனுபவத்தில் சொல்கிறேன், ‘பிளாக் கோல்டு’ இந்திய சினிமாவில் ஒரு புதுமையான படமாக இருக்கும். படத்தின் மேக்கிங்கும் மிக சிறப்பாக வந்துள்ளது. ஒரு படத்தைச் சிறிய படம், பெரிய படம் என்று பார்ப்பதைவிட நல்ல படமா என்பதுதான் முக்கியம். இயக்குநர் ஏ. வெங்கடேஷ் உள்ளிட்ட அனைவரும் இந்தப் படத்தில் சிறப்பான கதாபாத்திரங்களில் நடித்துள்ளனர்.

இந்தப் படம் நிச்சயம் ரசிகர்களுக்குப் புதிய அனுபவத்தைக் கொடுக்கும். ஊடக நண்பர்கள், பத்திரிகையாளர்கள் மற்றும் யூடியூப் சேனல் நண்பர்கள் அனைவரும் இப்படத்திற்குத் தங்களது ஆதரவை வழங்க வேண்டும். இந்தப் படத்தைப் பற்றிய செய்திகளை மக்களிடம் கொண்டு சேர்க்க வேண்டும். அனைவருக்கும் நன்றி.”

இசையமைப்பாளர் கவாஸ்கர் அவினாஷ் பேசியதாவது,

“‘பிளாக் கோல்டு’ படக்குழு சார்பாக ஊடக நண்பர்கள், பத்திரிகையாளர்கள் மற்றும் யூடியூப் சேனல் நண்பர்கள் அனைவருக்கும் நன்றியைத் தெரிவித்துக் கொள்கிறேன். நடிகர் வெற்றியுடன் இது எனக்கு இரண்டாவது படம். அவர் இந்த மூன்று ஆண்டுகளில் ஏராளமான படங்களில் நடித்திருக்கிறார். ‘பிளாக் கோல்ட்’ படம் அவருக்குப் பெரிய திருப்புமுனையாக இருக்கும். நடிகை அபிராமியின் நடிப்புக்கு நான் ஏற்கெனவே ரசிகன். இந்தப் படத்தில் அவர் ஏற்றிருக்கும் துணிச்சலான காவல்துறை அதிகாரி கதாபாத்திரத்தில் மிகச் சிறப்பாக நடித்திருக்கிறார்.

இயக்குநர் ஏ. வெங்கடேஷ், ஜப்பான் குமார் உள்ளிட்டவர்களின் கதாபாத்திரங்களும் குறிப்பிடத்தக்கவை. குறிப்பாக, நகைச்சுவை கதாபாத்திரங்களில் பார்த்துப் பழகிய ஜப்பான் குமாரை இந்தப் படத்தில் முற்றிலும் மாறுபட்ட தீவிரமான கதாபாத்திரத்தில் பார்க்கலாம். நடிகர்கள் அனைவரும் இயல்பான நடிப்பை வெளிப்படுத்தியிருக்கிறார்கள். இந்தப் படத்திற்குப் பிறகு அவர்களைப் பார்க்கும் இயக்குநர்களின் பார்வையும் மாறும் என்று நம்புகிறேன்.

பாடலாசிரியர் மோகன் ராஜாவுடன் பணியாற்றியது மகிழ்ச்சியான அனுபவம். ‘வெங்காட்டு பூமி’ பாடலுக்காக அவர் எழுதிய வரிகளில் எந்தத் திருத்தமும் செய்யத் தேவையில்லை. அவருடைய எழுத்து எனக்கு மிகவும் பிடித்திருந்தது. பாடகர்கள் சைந்தவி, சத்யா கபூர், சத்யா பிரகாஷ், சஞ்சனா கல்மஞ்சி உள்ளிட்ட அனைவருக்கும் நன்றி. குறிப்பாக, சைந்தவி இந்தப் படத்தில் வழக்கமான பாணியிலிருந்து மாறுபட்டு உயர்ந்த ஸ்வரத்தில் பாடியிருப்பது சிறப்பு.

தயாரிப்பாளர் மூர்த்தி சாரின் ஆதரவு இல்லாமல் இந்தப் படம் சாத்தியமாகியிருக்காது. நல்ல கதையை தேர்வு செய்திருக்கிறார்.  இயக்குநர் தீரன் அருண்குமார் என்னுடைய ‘ஸ்மைல் மேன்’ படத்தைப் பார்த்துவிட்டு என்னைத் தொடர்புகொண்டு இந்தப் படத்திற்கு இசையமைக்க வாய்ப்பளித்தார். பெரிய இசையமைப்பாளர்களைப் பரிந்துரைத்தபோதும், கதைக்கும் களத்திற்கும் நான் பொருத்தமாக இருப்பேன் என்று நம்பி தேர்வு செய்தார். அதற்காக அவருக்கு நன்றி. தொடர்ந்து வெற்றி உள்ளிட்ட படக்குழுவினருடன் பல படங்களில் இணைந்து பணியாற்ற விரும்புகிறேன்.” நன்றி.

ஒளிப்பதிவாளர் சந்தோஷ் குமார் வீராசாமி பேசியதாவது,

“‘பிளாக் கோல்டு’ திரைப்படம் எனக்கு முதல் படம். இந்தப் படத்தில் பணியாற்ற வாய்ப்பளித்த இயக்குநர் தீரன் அருண்குமார் மற்றும் தயாரிப்பாளர் மூர்த்தி ஆகியோருக்கு எனது மனமார்ந்த நன்றியைத் தெரிவித்துக் கொள்கிறேன். இப்படத்தில் நடித்த அனைத்து நடிகர்களுக்கும், பணியாற்றிய தொழில்நுட்பக் கலைஞர்கள் அனைவருக்கும் எனது நன்றிகள். விரைவில் இதே இடத்தில் நடைபெறும் படத்தின் வெற்றிச் சந்திப்பில் மீண்டும் அனைவரையும் சந்திக்கிறேன். நன்றி, வணக்கம்.”

எடிட்டர் தினேஷ்குமார் பேசியதாவது,

“ஒரு கதையைத் தொடங்குவதில் இருந்து படம் வெளியாகி முடிவடையும் வரை நிறைய பேருடைய உழைப்பு இருக்கும். அந்த வகையில் ‘பிளாக் கோல்டு’ படத்தில் என்னுடைய பங்களிப்பும் இருப்பது மகிழ்ச்சியையும் திருப்தியையும் அளிக்கிறது. இந்தப் படத்தில் பணியாற்ற வாய்ப்பளித்த இயக்குநர் தீரன் அருண்குமார் அவர்களுக்கு நன்றி. எடிட்டிங்கில் எனக்கு முழுமையான சுதந்திரம் கொடுத்திருந்தார். முதலில் என்னுடைய பாணியில் ஒரு காட்சியை எடிட் செய்து கொடுத்த பிறகு, அதில் என்ன மாற்றங்கள் செய்யலாம் என்பதை மட்டுமே ஆலோசிப்போம். இதே சுதந்திரத்தை ஒளிப்பதிவாளர் மற்றும் இசையமைப்பாளருக்கும் அவர் வழங்கியிருந்தார்.

இயக்குநர், ஒளிப்பதிவாளர், இசையமைப்பாளர் மற்றும் உதவி இயக்குநர்கள் என அனைவருக்குள்ளும் நல்ல புரிதலும் ஒருங்கிணைப்பும் இருந்தது. ஒரு நல்ல படத்தைக் கொடுக்க வேண்டும், இன்னும் எப்படிச் சிறப்பாக உருவாக்கலாம் என்பதில்தான் எங்களுடைய கவனம் இருந்தது. தயாரிப்பாளர் மூர்த்தி சாரும் எங்களுக்கு முழுமையான ஆதரவு அளித்தார். பட்ஜெட் அல்லது வேறு கட்டுப்பாடுகள் குறித்து அதிகம் பேசாமல், படம் நன்றாக வருமா, நீங்கள் திருப்தியாக இருக்கிறீர்களா என்று மட்டுமே கேட்பார். அந்த ஆதரவு படத்தின் தரத்தை மேம்படுத்த உதவியது.

இந்தப் படத்தில் பணியாற்றும் வாய்ப்பையும் படக்குழுவினரிடம் என்னை அறிமுகப்படுத்தியதற்காகவும் துரை ப்ரோவுக்கு எனது தனிப்பட்ட நன்றியைத் தெரிவித்துக் கொள்கிறேன். மேலும், ஒரு நல்ல படம் அதிகமான ரசிகர்களைச் சென்றடைவதில் ஊடகங்களுக்கும் பத்திரிகையாளர்களுக்கும் முக்கியப் பங்கு இருக்கிறது. நீங்கள் அளிக்கும் ஆதரவும் பகிர்வும்தான் நல்ல படங்களை ரசிகர்களிடம் கொண்டு சேர்க்கிறது.

‘பிளாக் கோல்டு’ படத்தின் கதையிலோ, காட்சிகளிலோ எந்தவிதமான விஷயத்தையும் நாங்கள் முன்கூட்டியே வெளிப்படுத்தவில்லை. ரசிகர்கள் திரையரங்கில் பார்த்து அந்த ஆச்சரியத்தை அனுபவிக்க வேண்டும். படம் பார்த்துவிட்டு வெளியே வரும்போது ஒரு நல்ல படத்தைப் பார்த்த திருப்தியுடன் வருவீர்கள் என்று நம்புகிறேன். இப்படம் மேலும் மேலும் வெற்றிபெற வாழ்த்துகிறேன். நன்றி.”

பாடகர் ராம் பேசியதாவது,

“இங்கு வந்திருக்கும் பத்திரிகையாளர்கள், ஊடகவியலாளர்கள் மற்றும் நண்பர்கள் அனைவருக்கும் எனது வணக்கத்தைத் தெரிவித்துக் கொள்கிறேன். கடந்த 16 ஆண்டுகளாக என்டர்டெயின்மென்ட் துறையில் இயங்கி வருகிறேன். இசைப் பயிற்சிப் பள்ளி ஒன்றையும் நடத்தி வருகிறேன். அதில் சுமார் 20 மாணவர்கள் பயின்று வருகிறார்கள். அதேபோல், இன்டிபென்டன்ட் மியூசிக் துறையிலும் கடந்த 16 ஆண்டுகளாகப் பயணித்து வருகிறேன்.

இயக்குநர் தீரன் அருண்குமார் எனக்கு கடந்த நான்கு ஆண்டுகளாகப் பழக்கம். எடிசன் விருது விழாவில் நான் இசை நிகழ்ச்சி நடத்தியபோது அவரைச் சந்தித்தேன். அன்றிலிருந்து எங்களுக்குள் நல்ல நட்பு இருந்து வருகிறது. என்னுடைய இசைப் பயணம் மற்றும் முயற்சிகளை அவர் தொடர்ந்து கவனித்து வந்தார்.

என்னுடைய 16 ஆண்டுகால கனவை நனவாக்கும் வகையில் ‘பிளாக் கோல்டு’ திரைப்படத்தில் வாய்ப்பளித்த இயக்குநர் தீரன் அருண்குமார் மற்றும் தயாரிப்பாளர் மூர்த்தி ஆகிய இருவருக்கும் எனது மனமார்ந்த நன்றியைத் தெரிவித்துக் கொள்கிறேன். இந்தப் படத்தின் மூலம் எனது நீண்ட நாள் கனவு நிறைவேறியிருப்பது மிகுந்த மகிழ்ச்சியளிக்கிறது. அனைவருக்கும் நன்றி, வணக்கம்.”

பாடலாசிரியர் மோகன் ராஜன் பேசியதாவது,

“இயக்குநர் தீரன் அருண்குமார் இந்தப் படத்தின் கதையைச் சொன்னபோதே எனக்கு மிகவும் பிடித்துவிட்டது. ‘பிளாக் கோல்டு’ என்ற தலைப்பைக் கேட்டதும் மிளகு அல்லது நிலக்கரி என்று நினைக்கலாம். ஆனால் அதைத்தாண்டி தலைமுடியை மையமாகக் கொண்ட வித்தியாசமான கதைக்களம் இதில் இருக்கிறது. தலைமுடியைச் சுற்றியுள்ள வணிகம், அரசியல் எனப் பல விஷயங்களைப் படத்தில் பேசியிருக்கிறார்கள். சாதாரணமாக நாம் ஒரு விஷயமாகக் கடந்து செல்லும் தலைமுடிக்குப் பின்னால் இவ்வளவு பெரிய அறிவியல் மற்றும் வணிகப் பின்னணி இருப்பது ஆச்சரியமாக இருந்தது. அதைப் பற்றி மேலும் படிக்கவும் ஆராயவும் இந்தப் படம் தூண்டியது.

இந்தப் படத்தில் இரண்டு பாடல்களை எழுதியிருக்கிறேன். இசையமைப்பாளர் கவாஸ்கர் அவினாஷுடன் பணியாற்றியது மகிழ்ச்சியான அனுபவம். அவர் இசையமைத்த மெட்டுக்கு ஏற்ப வார்த்தைகளை மிகவும் கவனமாகப் பொருத்தி எழுத வேண்டியிருந்தது. குறிப்பாக, ‘தினம் தினம் நீ பார்க்கும் வரம் வாங்குவேன், மனதினில் அதை கோர்த்து உனைத் தாங்குவேன்’ என்ற வரிகள் எனக்கு மிகவும் பிடித்தமானவை. அதேபோல், ‘வெங்காட்டு பூமியிலே’ பாடலும் ஒரு கதையைச் சொல்லும் விதமாக அமைந்துள்ளது.

அந்தப் பாடலில் இடம்பெற்றுள்ள ‘வெங்காட்டு பூமியிலே புழுதிக் காற்று வீசுது, வெஞ்சோகம் நெஞ்சிலே பெருகிப் பாயுதே’, ‘மண்ணாளும் போகும் ஈரம் எழுதில் காய்வதில்லை, நெஞ்சோடு வாழும் நேசம் வலியில் வீழ்வதில்லை’ போன்ற வரிகளை எழுதியது மனநிறைவாக இருந்தது. மேலும், ‘பொல்லாத ஊருக்குள்ள சந்தேகம் குறையவில்லை, சொல்லாத விடுகதையில் விடை தெரியல ஏனோ’ என்ற வரிகளும் படத்தின் மர்மமான கதைக்களத்துடன் பொருந்தும்.

தலைமுடியை மையமாகக் கொண்டு உருவாக்கப்பட்டிருக்கும் இந்தப் படம் ரசிகர்களுக்கு நிச்சயம் மிகப்பெரிய ஆச்சரியத்தையும் பல திருப்பங்களையும் கொடுக்கும். நடிகர் வெற்றிக்கு இப்படம் வெற்றிப் படமாக அமைய வேண்டும். இயக்குநர் தீரன் அருண்குமார், இசையமைப்பாளர் கவாஸ்கர் அவினாஷ் மற்றும் படக்குழுவினர் அனைவருக்கும் என்னுடைய வாழ்த்துகள். இந்தப் படத்தில் பணியாற்றியது மகிழ்ச்சி. நன்றி.”

ஜே.ஆர். ரமேஷ் பேசியதாவது,

“ஊடக நண்பர்கள், பத்திரிகையாளர்கள் அனைவருக்கும் முதலில் எனது வணக்கத்தைத் தெரிவித்துக் கொள்கிறேன். இயக்குநர் தீரன் அருண்குமார் எனக்கு கடந்த ஐந்து ஆண்டுகளாகப் பழக்கம். அவ்வப்போது சந்தித்து அடுத்ததாக என்ன படம் செய்யப் போகிறீர்கள் என்று பேசிக்கொள்வோம்.

என்னுடைய அடிப்படைத் தொழில் தினமலர் விநியோகஸ்தராக இருப்பதுதான். திரைப்பட விநியோகம் தொடர்பான பணிகளிலும் ஈடுபட்டு வருகிறேன். தீரன் படம் எடுக்கப் போகிறேன் என்று கூறியபோது, என்ன படம் எடுக்கப் போகிறார் என்பதைத் தெரிந்துகொள்ள ஆர்வமாக இருந்தேன்.

அவருடைய அலுவலகத்துக்கு அடிக்கடி சென்று வந்த நிலையில், இந்தப் படத்தின் விநியோகப் பணிகளிலும் என்னால் ஈடுபட முடிந்தது மகிழ்ச்சியாக இருக்கிறது. ‘பிளாக் கோல்டு’ படத்துடன் இணைந்து பணியாற்றும் வாய்ப்பளித்த இயக்குநர் மற்றும் தயாரிப்பாளருக்கு எனது நன்றியைத் தெரிவித்துக் கொள்கிறேன். நன்றி.”

விநியோகஸ்தர் ஆதவா பேசியதாவது,

“இங்கு வந்திருக்கும் பத்திரிகை மற்றும் ஊடக நண்பர்கள் அனைவருக்கும் எனது வணக்கத்தைத் தெரிவித்துக் கொள்கிறேன். ‘பிளாக் கோல்டு’ படத்தின் விநியோக உரிமையை எங்களுக்கு வழங்கிய தயாரிப்பாளர் மூர்த்தி சாருக்கு எனது நன்றியைத் தெரிவித்துக் கொள்கிறேன். எனது நண்பர் இயக்குநர் தீரன் அருண்குமார் ஏற்கெனவே வெற்றியைச் சந்தித்துள்ளார். இந்தப் படமும் வெற்றிபெற ஊடக நண்பர்கள் அனைவரும் ஆதரவு தர வேண்டும் என்று கேட்டுக்கொள்கிறேன்.

சமீபத்தில் வெளியான ‘மண்டாடி’ படத்தில் இடம்பெறும் ஒரு வசனம் நினைவுக்கு வருகிறது. நம்முடைய முன்னோர்கள் காற்றையும் கடலையும் நம்பி வாழ்ந்தவர்கள் என்பதால், அவை ஒருபோதும் நம்மைக் கைவிடாது என்ற கருத்து அதில் இடம்பெற்றிருக்கும். அதேபோல், தீரன் அருண்குமார் சினிமாவைத் தனது மூச்சாகச் சுவாசித்துக் கொண்டிருக்கிறார். எனவே, இந்தத் திரையுலகமும் ஊடகங்களும் அவரைக் கைவிடாது என்று நம்புகிறேன். அவர் தொடர்ந்து பல வெற்றிப் படங்களை வழங்க என்னுடைய வாழ்த்துகள்.

மேலும், தயாரிப்பாளர் மூர்த்தி சாரைப் பற்றியும் குறிப்பிட வேண்டும். ‘ஜெயிலர் 2’ படத்தில் மூர்த்தி என்ற பெயர் பேசப்பட்டது. ஆனால் இந்தப் படத்தைப் பொறுத்தவரை அனைத்தும்  எங்களுடைய மூர்த்தி அண்ணன்தான். அவருடன் இணைந்து பணியாற்றுவதில் பெருமைப்படுகிறோம். ‘பிளாக் கோல்டு’ திரைப்படம் வெற்றிபெற அனைவரும் ஆதரவு தர வேண்டும். நன்றி.”

இப்ராஹிம்  பேசியதாவது,

“இங்கு வந்திருக்கும் அனைவருக்கும் என்னுடைய வணக்கத்தைத் தெரிவித்துக் கொள்கிறேன். நான் சென்னைக்கு ஒரு வியாபார விஷயமாக வந்திருந்தபோது, ரமேஷ் சார் என்னைச் சந்தித்து, இயக்குநர் தீரன் அருண்குமார் தனது நண்பர் என்றும், அவர் ஒரு நல்ல படம் இயக்கியிருப்பதாகவும் கூறி பார்க்க அழைத்தார். அப்போது நேரமில்லாததால் என்னால் பார்க்க முடியவில்லை. பின்னர் இயக்குநர் தனது முதல் படமான ‘தீர்ப்புகள் விற்கப்படும்’ படத்தை எனக்கு அனுப்பி வைத்தார். சத்யராஜ் நடித்த அந்தப் படத்தைப் பார்த்தபோது, ஒவ்வொரு காட்சியும் ரசிக்கும்படியாக இருந்தது.

எனக்கு இப்போது 60 வயதாகிறது. என்னுடைய 21 வயதில் சினிமாவில் நடிக்க வேண்டும் என்ற ஆசையில் ஊரை விட்டு சென்னைக்கு வந்தேன். ஆனால் சினிமாவில் நுழைய முடியாமல் பல கஷ்டங்களைச் சந்தித்தேன். கையில் இரண்டு ரூபாய் கூட இல்லாமல், பேருந்தில் பயணம் செய்யக்கூட முடியாத சூழ்நிலையிலும் இருந்திருக்கிறேன். சினிமாவில் வாய்ப்பு கிடைக்காததால் சுமார் 20 ஆண்டுகளுக்குப் பிறகு மீண்டும் ஊருக்கே திரும்பிச் சென்றேன். இருந்தாலும் சினிமாவில் சாதிக்க வேண்டும் என்ற ஆசையை மட்டும் ஒருபோதும் கைவிடவில்லை.

இப்போது மீண்டும் சினிமாவுக்குள் வந்திருக்கிறேன். எனக்கான தகுதியையும் அனுபவத்தையும் வளர்த்துக் கொண்டு, இயக்குநர் தீரன் அருண்குமாருடன் இணைந்து படங்களைத் தயாரிக்கவும் திட்டமிட்டிருக்கிறேன். ‘பிளாக் கோல்டு’ படத்தின் விநியோக உரிமையையும் பெற்றிருக்கிறேன். நிச்சயமாக நானும் திரைப்படங்களைத் தயாரிப்பேன்.

சினிமா என்னை வாழவைக்கும் என்ற நம்பிக்கை எனக்கு இருக்கிறது.

என்னைப் போல சினிமாவில் சாதிக்க வேண்டும் என்று ஆசைப்பட்டு, பல கஷ்டங்களால் ஊருக்குத் திரும்பியவர்கள் ஏராளமானோர் இருக்கிறார்கள். அவர்களுக்கு மீண்டும் ஒரு வாய்ப்பு கிடைக்க வேண்டும். ஒரு திரைப்படத்தை மக்களிடம் கொண்டு சேர்த்து, அதை வாழ வைக்கும் சக்தி பத்திரிகையாளர்கள் மற்றும் ஊடக நண்பர்களின் கைகளில்தான் இருக்கிறது. என்னைப் போன்றவர்களின் முயற்சிகளுக்கும் நீங்கள் ஆதரவு அளிக்க வேண்டும். நன்றி, வணக்கம்.”

ஜனீஷ் பேசியதாவது,

“தயாரிப்பாளர் மூர்த்தி சார் மிகவும் நேர்மையானவர், வெளிப்படையாகப் பேசக்கூடியவர். இந்தப் படத்தின் படப்பிடிப்பு பாதியில் இருந்தபோதுதான் அவருடன் எனக்குப் பழக்கம் ஏற்பட்டது. ஆனால் படத்தின் வெளியீடு வரை எங்களுடன் பயணிக்க வேண்டும் என்ற ஆர்வத்துடன் அவர் தொடர்ந்து ஆதரவளித்தார். இந்தப் படத்தில் என்னுடைய பங்களிப்பும் இருப்பதை மகிழ்ச்சியுடன் தெரிவித்துக் கொள்கிறேன்.

இயக்குநர், எக்ஸிகியூட்டிவ் புரொடியூசர் மற்றும் அலுவலகத்தில் பணியாற்றிய அனைவரும் மிகவும் சுறுசுறுப்பாகச் செயல்பட்டார்கள். பல தொழில்நுட்பக் கலைஞர்கள் தங்களுடைய ஆரம்பகட்டப் பயணத்தில் இருந்தாலும், அனைவரும் தங்களால் முடிந்த சிறந்த உழைப்பைக் கொடுத்திருக்கிறார்கள். இயக்குநர் ஒவ்வொரு விஷயத்திலும் மிகுந்த மெனக்கெடல் எடுத்திருப்பது படத்தைப் பார்க்கும்போது தெரிகிறது. இந்தப் படம் இயக்குநருக்கும் தொழில்நுட்பக் கலைஞர்கள் அனைவருக்கும் அடுத்தகட்ட வளர்ச்சியைப் பெற்றுத் தர வேண்டும் என்று வாழ்த்துகிறேன்.

ஏ. வெங்கடேஷ், லிவிங்ஸ்டன் உள்ளிட்ட அனுபவமிக்க கலைஞர்களிலிருந்து வெற்றி வரை அனைவரும் தங்களுடைய நேரத்தை ஒதுக்கி படத்தின் விளம்பர நிகழ்ச்சிகளிலும் கலந்துகொண்டது மகிழ்ச்சியளிக்கிறது. இந்தப் படம் ரசிகர்களுக்குச் சிறந்த திரையரங்க அனுபவத்தைக் கொடுக்கும். ஒரு கருத்தைச் சொல்வதைத் தாண்டி, முழுமையான பொழுதுபோக்குப் படமாகவும் நிச்சயம் இருக்கும்.

விரைவில் திரையரங்குகளில் வெளியாகவுள்ள ‘பிளாக் கோல்டு’ படத்திற்கு திரையரங்குகள் மட்டுமின்றி மற்ற வணிகப் பிரிவுகளிலும் நல்ல வரவேற்பு கிடைத்து வருவது மகிழ்ச்சியாக இருக்கிறது. இந்தப் படத்தின் வெற்றிக்கு ஊடக நண்பர்கள் தொடர்ந்து ஆதரவு அளிக்க வேண்டும். அனைவருக்கும் நன்றி.”

நடிகர் ஜப்பான் குமார் பேசியதாவது,

“இந்தப் படத்தில் ஒரு சிறிய கதாபாத்திரத்தில் நடிக்க இயக்குநர் தீரன் அருண்குமார் என்னை அழைத்துப் பேசினார். நான் இதுவரை சிறிய காமெடி கதாபாத்திரங்களில்தான் நடித்து வருகிறேன் என்று கூறினேன். ஆனால், இந்தக் கதாபாத்திரத்தில் நான் நடித்தால் நன்றாக இருக்கும் என்று அவர் நம்பிக்கையுடன் கூறினார். அவருடைய நம்பிக்கைக்காகவே இந்தப் படத்தில் நடிக்கச் சம்மதித்தேன்.

இந்தப் படம் எப்படி வந்திருக்கிறது என்பதைவிட, படத்தைப் பார்த்தவர்கள் நன்றாக இருக்கிறது என்று சொல்வதைக் கேட்கும்போது மகிழ்ச்சியாக இருக்கிறது. ஆனால், இந்தப் படத்தை வெற்றிபெறச் செய்வது உங்கள் கைகளில்தான் இருக்கிறது. இதுபோன்ற தயாரிப்பாளர்களுக்கும் இயக்குநர்களுக்கும் ஊடக நண்பர்களும் ரசிகர்களும்தான் தொடர்ந்து ஆதரவு அளிக்க வேண்டும்.

இப்போதெல்லாம் சிறிய படங்கள் நன்றாக இருந்தாலும், திரையரங்குகளில் அவற்றைப் பார்க்க ரசிகர்கள் வருவது குறைவாக இருக்கிறது. சில நேரங்களில் நல்ல படங்களாக இருந்தாலும் விரைவிலேயே திரையரங்குகளில் இருந்து எடுக்கப்பட்டு விடுகின்றன. எனவே, ‘பிளாக் கோல்டு’ படத்திற்கு அனைவரும் ஆதரவு அளித்து வெற்றிபெறச் செய்ய வேண்டும். அனைவருக்கும் நன்றி.”

நடிகர் கராத்தே வெங்கடேஷ் பேசியதாவது,

“இந்தப் படக்குழுவில் இடம்பெற்றுள்ள மூத்த கலைஞர்கள், இளம் கலைஞர்கள், தொழில்நுட்பக் கலைஞர்கள் உள்ளிட்ட அனைவருக்கும் என்னுடைய நன்றியையும் வாழ்த்துகளையும் தெரிவித்துக் கொள்கிறேன். இயக்குநர் தீரன் அருண்குமார் என்னிடம் முதலில் கதையைச் சொன்னபோதே, எனக்கு ஒரு வித்தியாசமான கதாபாத்திரம் கொடுத்திருந்தார். குறிப்பாக, உயிரைப் பறிக்கும் கதாபாத்திரமாக இருந்தால்தான் உங்களுக்கு நன்றாக இருக்கும் என்று கூறினார்.

‘பரியேறும் பெருமாள்’ படத்திற்குப் பிறகு இதுபோன்ற கதாபாத்திரங்களில் நடிக்கும் வாய்ப்பு மீண்டும் கிடைத்திருக்கிறது. இயக்குநர் என்ன சொன்னாலும் அதைச் செய்யத் தயாராக இருக்கிறேன். இந்தப் படத்திலும் இரண்டு, மூன்று உயிர்களை எடுத்திருக்கிறோம். அதை ரசிகர்கள் திரையில் பார்த்து ரசிப்பார்கள் என்று நம்புகிறேன். அனைவரும் ‘பிளாக் கோல்டு’ படத்திற்கு ஆதரவு அளித்து வெற்றிபெறச் செய்ய வேண்டும். நன்றி.”

நடிகர் டெலிபோன் ராஜ் பேசியதாவது,

“எல்லாப் படங்களுக்கும் படப்பிடிப்புக்குச் செல்வதைப் போலத்தான் இந்தப் படத்திற்கும் சென்றேன். ஆனால், இதில் எனக்குக் கொடுக்கப்பட்ட கதாபாத்திரம் சற்று வித்தியாசமானது. ஒரு சிறிய கதாபாத்திரமாக இருந்தாலும், அதில் ஒரு முக்கியமான விஷயம் இருந்தது. இயக்குநர் தீரன் அருண்குமார் மிகவும் பொறுமையாக, ஒரு குழந்தைக்குச் சொல்லிக் கொடுப்பதைப் போல எனக்குக் காட்சிகளை விளக்கிக் கொடுத்தது மிகவும் பிடித்திருந்தது.

படப்பிடிப்பிலும் டப்பிங் பணியின்போதும் ஒவ்வொரு கதாபாத்திரத்தையும் பார்த்து ஆச்சரியப்பட்டேன். ஒவ்வொரு நடிகரையும் அந்தந்தக் கதாபாத்திரத்திற்குப் பொருத்தமாகத் தேர்வு செய்திருக்கிறார்கள். சில கதாபாத்திரங்களின் தோற்றத்தைப் பார்த்தபோது எனக்கே பயமாக இருந்தது. அந்த அளவுக்கு ஒவ்வொருவருடைய தோற்றமும் கதாபாத்திரங்களும் வித்தியாசமாக அமைந்துள்ளன.

நடிகர் வெற்றியைப் பார்க்கும்போது மிகவும் மென்மையான, சாக்லேட் பாய் போன்ற தோற்றத்தில் இருக்கிறார். அவருடைய படங்கள் தொடர்ந்து வெற்றிபெற்று வருகின்றன. அந்த வரிசையில் ‘பிளாக் கோல்டு’ படமும் நிச்சயம் வெற்றிபெறும் என்று நம்புகிறேன். தயாரிப்பாளர் மூர்த்தி மிகவும் நல்ல மனிதர். எனக்கும் நல்ல முறையில் சம்பளம் வழங்கினார். இந்தப் படத்தில் பணியாற்றிய அனைவருக்கும் என்னுடைய வாழ்த்துகள். ஊடக நண்பர்கள் அனைவரும் படத்திற்கு ஆதரவு அளிக்க வேண்டும். நன்றி.”

நடிகை சபீதா ராய் பேசியதாவது,

“இங்கு வந்திருக்கும் திரைப்பட உறவுகளுக்கும், பத்திரிகையாளர்கள் மற்றும் ஊடக நண்பர்கள் அனைவருக்கும் என்னுடைய மாலை வணக்கத்தைத் தெரிவித்துக் கொள்கிறேன். பல ஆண்டுகளாக சினிமாவை நேசித்து, அதில் ஒரு நல்ல வாய்ப்புக்காகப் போராடி வருகிறேன். அந்த வகையில் ‘பிளாக் கோல்டு’ திரைப்படம் எனக்கு ஒரு முக்கியமான மேடையாக அமைந்துள்ளது. இந்தப் படத்தில் மல்லி என்ற கதாபாத்திரத்தில் நடித்திருக்கிறேன். இந்தப் படத்திற்குப் பிறகு மல்லி என்ற கதாபாத்திரத்தின் மூலம் எனக்கு நல்ல அங்கீகாரம் கிடைக்கும் என்று நம்புகிறேன். வாய்ப்பளித்த இயக்குநர் தீரன் அருண்குமாருக்கு எனது மனமார்ந்த நன்றி.

இயக்குநர் தீரன் அருண்குமார் ஒரு சிறந்த கேப்டன். எவ்வளவு பரபரப்பான சூழ்நிலையாக இருந்தாலும் மிகவும் அமைதியாகவும் பொறுமையாகவும் செயல்படுவார். படப்பிடிப்புத் தளத்தில் அனைவரையும் இயல்பாகவும் மகிழ்ச்சியாகவும் வைத்திருப்பார். அவருடைய இயக்கத்தில் உருவாகியுள்ள இந்தப் படம் அவருக்கு மிகப்பெரிய வெற்றியைத் தரும் என்று நம்புகிறேன். ஒளிப்பதிவாளர் சந்தோஷ் குமார் வீராசாமியின் பணி மிகவும் சிறப்பாக இருக்கிறது. தமிழ் சினிமாவில் அவர் முக்கியமான ஒளிப்பதிவாளராக வருவார் என்ற நம்பிக்கை எனக்கு இருக்கிறது.

நடிகர் வெற்றி படப்பிடிப்புத் தளத்தில் மிகவும் எளிமையாகவும் அமைதியாகவும் இருப்பார். ஆனால் கேமரா முன்பு நடிக்கும்போது அவருடைய நடிப்பும் ஹீரோயிசமும் வியக்க வைக்கும். நடிகர் ஏ. வெங்கடேஷுடன் இணைந்து நடிக்க வேண்டும் என்பது எனது நீண்ட நாள் ஆசை. இந்தப் படத்தின் மூலம் அந்த வாய்ப்பு கிடைத்தது மகிழ்ச்சி. அதேபோல், என்னுடைய கதாபாத்திரத்துடன் தொடர்புடைய நைனா கதாபாத்திரத்தில் நடித்த அருள் சங்கருடனும் நல்ல நட்பு உருவாகியுள்ளது. தயாரிப்பாளர் மூர்த்தி போன்ற ஆதரவான தயாரிப்பாளர்கள் தமிழ் சினிமாவுக்குக் கிடைப்பது உண்மையிலேயே ஒரு வரம். இசையமைப்பாளர் கவாஸ்கர் அவினாஷ், பாடலாசிரியர் மோகன் ராஜா உள்ளிட்ட தொழில்நுட்பக் கலைஞர்கள் அனைவருக்கும் நன்றி.

சிறிய படம், பெரிய படம் என்று இனிமேல் படங்களைப் பிரித்துப் பார்க்க வேண்டாம். சிறிய படங்கள்தான் இன்றைக்குப் பல வெற்றிகளையும் சாதனைகளையும் படைத்து வருகின்றன. நல்ல கதையும் உழைப்பும் இருந்தால் எந்தப் படமும் பெரிய வெற்றியைப் பெற முடியும். ‘பிளாக் கோல்டு’ படமும் ரசிகர்களுக்குப் பிடித்தமான படமாக இருக்கும் என்று நம்புகிறேன். வரும் நவம்பர் 13-ம் தேதி திரையரங்குகளில் வெளியாகும் இப்படத்திற்கு அனைவரும் ஆதரவு அளித்து வெற்றிபெறச் செய்ய வேண்டும். நன்றி.”

இயக்குநரும் நடிகருமான ஏ. வெங்கடேஷ் பேசியதாவது,

“இங்கு வந்திருக்கும் பத்திரிகை மற்றும் ஊடக நண்பர்கள் அனைவருக்கும் என்னுடைய மாலை வணக்கத்தைத் தெரிவித்துக் கொள்கிறேன். இந்தப் படத்தை வெளியிடும் ஆதவா ரமேஷ், ஆகியோருக்கு முதலில் நன்றி.

 ‘பிளாக் கோல்டு’ முழுக்க முழுக்க இயக்குநர் தீரன் அருண்குமாரின் படைப்பு. ஒரு நாள் செய்தித்தாளில் தலைமுடி தொடர்பான ஒரு செய்தியைப் படித்தபோது, அதை வைத்து ஒரு திரைப்படம் உருவாக்கலாம் என்று நான் நினைத்தேன். சில நாட்களுக்குப் பிறகு தீரன் இந்தப் படத்தின் கதையைச் சொன்னபோது, நான் படித்த அதே செய்தியின் பின்னணியில் கதையை உருவாக்கியிருப்பதை அறிந்து ஆச்சரியப்பட்டேன். இதுவரை தமிழ் சினிமாவில் பேசப்படாத ஒரு விஷயத்தைப் புதுமையான முறையில் அணுகியிருக்கிறார். ‘பிளாக் கோல்டு’ என்ற தலைப்பும் கதைக்கு மிகவும் பொருத்தமாக இருக்கிறது.

ஒரு படத்தின் வெற்றிக்கு முக்கியமானது சரியான நடிகர் தேர்வு. அந்த வகையில் தீரன் இந்தப் படத்தில் ஒவ்வொரு கதாபாத்திரத்திற்கும் பொருத்தமான நடிகர்களைத் தேர்வு செய்திருக்கிறார். குறிப்பாக, அருள் டி. சங்கர் உள்ளிட்ட நடிகர்களின் தேர்வு சிறப்பாக அமைந்துள்ளது. அபிராமி, சபீதா ராய், ஜப்பான் குமார் உள்ளிட்ட அனைவரும் தங்களுடைய கதாபாத்திரங்களுக்கு நியாயம் செய்திருக்கிறார்கள். கதாநாயகன் வெற்றி மிகவும் அமைதியானவர். ஆனால் கேமரா முன்பு அவருடைய நடிப்பு வியக்க வைக்கும். என்னுடன் இணைந்து நடித்த காட்சியிலும் மிகக் குறைவான ரியாக்ஷன்களைக் கொண்டே சிறப்பான நடிப்பை வெளிப்படுத்தியிருந்தார். ஒளிப்பதிவாளர் சந்தோஷ் குமார் வீராசாமி, தயாரிப்பின் தேவைகளையும் இயக்குநரின் எதிர்பார்ப்பையும் சமநிலைப்படுத்தி சிறப்பாகப் பணியாற்றியிருக்கிறார். எடிட்டர் தினேஷ்குமாரின் பணியும் சிறப்பாக உள்ளது. இசையமைப்பாளர் கவாஸ்கர் அவினாஷ் இசையிலும் பாடல்களிலும் நல்ல பங்களிப்பைக் கொடுத்திருக்கிறார். பாடலாசிரியர் மோகன் ராஜாவின் வரிகளும் குறிப்பிடத்தக்கவை.

தயாரிப்பாளர் மூர்த்தி சாருக்கு நன்றி சொல்வதுடன், இந்தப் படத்தை உருவாக்குவதற்கு ஊக்கமளித்த அவரது மனைவி மற்றும் மகளுக்கும் நன்றி தெரிவிக்க வேண்டும். அவர்களுடைய ஆதரவும் இந்தப் படம் உருவாக முக்கியக் காரணமாக இருந்திருக்கிறது. இயக்குநர் தீரன் இந்தப் படத்திற்காக ஆரம்பம் முதல் இன்றுவரை எவ்வளவு உழைத்திருக்கிறார் என்பதை நான் நேரடியாகப் பார்த்திருக்கிறேன். இது அவருக்கு இரண்டாவது படம் என்றாலும், முதல் படம் போலவே மிகுந்த அர்ப்பணிப்புடன் பணியாற்றியிருக்கிறார். படத்தின் உருவாக்கத்தில் ஒவ்வொரு கட்டத்திலும் அவர் எடுத்துக்கொண்ட முயற்சிகள் பாராட்டுக்குரியவை.

நான் இன்னும் முழுப் படத்தையும் பார்க்கவில்லை. எனது காட்சிகளை மட்டுமே பார்த்திருக்கிறேன். இருந்தாலும் கதையின் மீது எனக்கு மிகப்பெரிய நம்பிக்கை இருக்கிறது. இறைவனின் அருளாலும், இயற்கையின் துணையாலும், ஊடக நண்பர்கள் மற்றும் ரசிகர்களின் ஆதரவாலும் ‘பிளாக் கோல்டு’ திரைப்படம் மிகப்பெரிய அளவில் ரசிகர்களைச் சென்றடைய வேண்டும் என்று விரும்புகிறேன். அனைவருக்கும் நன்றி.”

நடிகர் அருள் டி. சங்கர் பேசியதாவது,

சினிமாவில் எனது 16 ஆண்டுகால பயணத்தில் பல்வேறு கதாபாத்திரங்களில் நடித்திருக்கிறேன். ஆனால் ‘பிளாக் கோல்டு’ திரைப்படம் எனக்கு மிகவும் முக்கியமான படம். ஒரு டூயட் பாடல் இல்லாமல், என்னை எந்த மாதிரியான கதாபாத்திரத்தில் வேண்டுமானாலும் வெளிப்படுத்துங்கள் என்று இயக்குநர் தீரணிடம் கூறினேன். அதற்கேற்ற வகையில் நைனா ராஜா என்ற கதாபாத்திரத்தை அவர் உருவாக்கியிருக்கிறார். இதுவரை ஊடகங்களிடம் எனக்காக எழுதும்படி கேட்டதில்லை. ஆனால் முதல்முறையாக, இந்தப் படத்தில் எனது நடிப்பு நன்றாக இருந்தால் அதைப் பற்றி எழுதுங்கள் என்று கேட்டுக்கொள்கிறேன்.

தயாரிப்பாளர் மூர்த்தி ஒரு சிறந்த தயாரிப்பாளர். முறையான திட்டமிடலும், சினிமா மீதான கலை உணர்வும் கொண்டவர். படத்தை ஒரு நடிகராகத் தொடங்கி இந்த நிலைக்குக் கொண்டு வந்திருப்பது பாராட்டுக்குரியது. உடன் நடித்த ஷீபானு, சபீதா ராய், ஏ. வெங்கடேஷ், வெற்றி, டெலிபோன் ராஜ், ஜப்பான் குமார் உள்ளிட்ட அனைவரும் சிறப்பாக நடித்துள்ளனர். குறிப்பாக வெற்றி மிகவும் அமைதியான, நேர்மையான மனிதர். ஒரு கதாபாத்திரத்தின் எல்லையைத் தாண்டி அவர் தலையிடுவதில்லை. இயக்குநர் என்ன நினைக்கிறாரோ அதைச் செயல்படுத்துவதுதான் தனது வேலை என்பதில் தெளிவாக இருக்கிறார். ஏ. வெங்கடேஷ் சாரின் நடிப்பும், சக நடிகர்களுடன் பணியாற்றிய அனுபவமும் மகிழ்ச்சியாக இருந்தது. கவாஸ்கர் அவினாஷின் இசையில் ‘வெங்காட்டு’ பாடல் மனதைத் தொடும் வகையில் அமைந்துள்ளது.

இந்தப் படத்தில் எனக்கு நைனா ராஜா கதாபாத்திரம் கிடைத்ததே ஒரு சுவாரசியமான அனுபவம். மாதங்கி மூலம் இயக்குநர் தீரன் அறிமுகமானார். அவருடைய முந்தைய படத்தைப் பார்த்த பிறகு, ஆறு மாதங்கள் கழித்து என்னை அழைத்துக் கதை சொன்னார். கதாபாத்திரத்தின் தோற்றம் முதல் நெற்றியில் வைக்கும் செந்தூரம், அணியும் ஆபரணங்கள் வரை ஒவ்வொன்றையும் மிக நுணுக்கமாகத் திட்டமிட்டு உருவாக்கியிருந்தார். அந்தத் தோற்றத்திற்காக மேக்கப் கலைஞர் உமாசங்கருடன் இணைந்து பல முயற்சிகள் மேற்கொண்டோம். சண்டைக் காட்சிகளுக்காக ஸ்டண்ட் மாஸ்டர் மெட்ரோ மகேஷிடம் ஏழு நாட்கள் முறையான பயிற்சியும் பெற்றேன். இயக்குநரும் உதவி இயக்குநர்களும் பயிற்சியின்போது உடனிருந்து ஊக்கமளித்தது மறக்க முடியாத அனுபவம்.

இயக்குநர் தீரனின் எழுத்து எனக்கு மிகவும் பிடித்திருக்கிறது. வசனங்களை மனப்பாடம் செய்ய வேண்டிய அவசியமே இல்லாத அளவுக்கு இயல்பாகவும், எளிதில் தொடர்புபடுத்திக்கொள்ளும் வகையிலும் அவர் எழுதியிருக்கிறார். படத்தின் முன்திட்டமிடலும் மிகச் சிறப்பாக இருந்தது. குறைந்த கால்ஷீட்டில் பல காட்சிகளைப் படமாக்கியிருப்பது அவரது திட்டமிடலுக்குச் சான்று. சில கட்டுப்பாடுகளுக்கு மத்தியிலும் படக்குழுவினர் மிகுந்த உழைப்பைக் கொடுத்திருக்கிறார்கள். எனது கதாபாத்திரம் சிறப்பாக வந்திருக்கிறது என்ற நம்பிக்கை இருக்கிறது. இயக்குநர் தீரன் இன்னும் ஐந்து ஆண்டுகளில் தமிழ் சினிமாவின் முன்னணி மூன்று இயக்குநர்களில் ஒருவராக இருப்பார் என்று நம்புகிறேன். இந்தப் படத்திற்கும் எனது நடிப்பிற்கும் ஊடகங்கள் ஆதரவு அளிக்க வேண்டும். நன்றி.

எக்ஸிகியூட்டிவ் புரொடியூசர் கலை பேசியதாவது,

தயாரிப்பாளர் மூர்த்தி சார் பல நிறுவனங்களிடம் இந்தக் கதையைச் சொல்லியும், அதன் வித்தியாசமான களத்தைக் கருத்தில் கொண்டு யாரும் தயாரிக்க முன்வரவில்லை. அப்போது இயக்குநர் தீரன் அருண்குமார் எங்களிடம் வந்து கதையைச் சொன்னார். கதை பிடித்திருந்ததால் மூர்த்தி சார் தனது மனைவி, மகளிடம் ஆலோசித்து இப்படத்தைத் தயாரிக்க முடிவெடுத்தார். அதன் விளைவாகத்தான் இன்று ‘பிளாக் கோல்டு’ திரைப்படம் உங்கள் முன்னால் நிற்கிறது. படத்தின் தலைப்புக்குப் பின்னால் இருக்கும் அர்த்தம் என்ன என்பதைப் படம் பார்க்கும்போது தெரிந்துகொள்வீர்கள்.

நடிகர் வெற்றி படப்பிடிப்புக்கு எப்போதும் குறித்த நேரத்திற்கு முன்பாகவே வந்து தயாராகக் காத்திருப்பார். ஏ. வெங்கடேஷ், கராத்தே வெங்கடேஷ், ஸ்ரீபா, கிருஷ்டி, அருள் டி. சங்கர், வியாழக்காரன் உள்ளிட்ட நடிகர்கள் அனைவரும் சிறப்பாகப் பணியாற்றினார்கள். இசையமைப்பாளர் கவாஸ்கர் அவினாஷ் மூன்று பாடல்களையும் சிறப்பாக அமைத்துள்ளார். ஒளிப்பதிவாளர் சந்தோஷ் குமார் தனது முதல் படமாக இருந்தாலும் சிறப்பான பங்களிப்பை வழங்கியுள்ளார். எடிட்டர் தினேஷ் மற்றும் இயக்குநர் இணைந்து மிகுந்த ஈடுபாட்டுடன் பணியாற்றினர். ஸ்டண்ட் மாஸ்டர் மெட்ரோ மகேஷ், நடன இயக்குநர் ரிச் சாம்சன் உள்ளிட்ட அனைத்து தொழில்நுட்பக் கலைஞர்களுக்கும் எங்கள் நன்றியைத் தெரிவித்துக்கொள்கிறேன்.

நடிகரும் தயாரிப்பாளருமான மூர்த்தி சார் எப்போதும் நேர்மறையாகப் பேசக்கூடியவர். இயக்குநர் கேட்ட அனைத்து விஷயங்களையும் செய்து கொடுத்து, படத்தின் உருவாக்கத்திற்கு முழு ஆதரவு அளித்தார். இயக்குநர் தீரன் அருண்குமார் இந்தப் படத்தின் கதையை எழுதி, திரைக்கதை, வசனம் அமைத்து இயக்கியிருக்கிறார். படத்தின் போஸ்ட் புரொடக்‌ஷன் பணிகள் ஒரே நேரத்தில் மூன்று இடங்களில் நடைபெற்றபோதும், அவர் பைக்கிலேயே ஒவ்வொரு இடத்திற்கும் சென்று தொழில்நுட்பக் கலைஞர்களுடன் இருந்து பணிகளைச் செய்து முடித்தார். அந்த அளவுக்கு கடினமாக உழைத்திருக்கிறார். அவருக்கும் தயாரிப்பு நிறுவனம் சார்பாக நன்றியைத் தெரிவித்துக்கொள்கிறேன்.

இந்தப் படத்தில் பணியாற்றிய அனைத்து நடிகர்கள், தொழில்நுட்பக் கலைஞர்கள் மற்றும் ஊடக நண்பர்கள் அனைவருக்கும் நன்றி. மீண்டும் இப்படத்தின் வெற்றிக் கொண்டாட்டத்தில் அனைவரையும் சந்திப்போம். நன்றி, வணக்கம்.

நடிகை அபிராமி பேசியதாவது,

ஒரு காவல்துறை அதிகாரி கதாபாத்திரத்தில் நடிப்பது மிகவும் சவாலான விஷயம். அந்தக் கதாபாத்திரத்தை அபிராமி மிகவும் அழகாகவும் சிறப்பாகவும் செய்திருக்கிறார் என்று பாராட்டிய அனைவருக்கும் நன்றி. இந்தப் படத்தில் நடிக்க அழைப்பு வந்தபோது, வெற்றி நடிக்கிறார் என்று தெரிந்ததும் கதை நிச்சயம் சிறப்பாக இருக்கும் என்ற நம்பிக்கை ஏற்பட்டது. இயக்குநர் தீரன் கதையை மிகவும் தெளிவாகவும் வித்தியாசமாகவும் விளக்கினார். ஒரு அறிவியல் ஆசிரியர் பாடம் நடத்துவது போல அவ்வளவு நேர்த்தியாகக் கதையை எடுத்துச் சொன்னார்.

முன்பு சில படங்களில் நடிப்பதற்கான வாய்ப்புகள் உறுதியாகும் என்று எதிர்பார்த்தும், கடைசி நேரத்தில் கைநழுவிய அனுபவங்கள் எனக்கு இருந்திருக்கின்றன. அதனால் இந்தப் படத்திலும் எனது கதாபாத்திரம் உறுதியாக இருக்கிறதா என்று பலமுறை இயக்குநரிடம் கேட்டேன். ஆனால் அவர் என் மீது முழு நம்பிக்கையுடன் இருந்தார். இந்தக் கதாபாத்திரத்திற்கு அபிராமிதான் நடிக்க வேண்டும் என்று தயாரிப்பாளரும் இயக்குநரும் உறுதியாக முடிவெடுத்து என்னை அழைத்தது ஒரு நடிகையாக எனக்கு மிகப்பெரிய மகிழ்ச்சியையும் நம்பிக்கையையும் அளித்தது. அதற்காக இருவருக்கும் எனது மனமார்ந்த நன்றியைத் தெரிவித்துக்கொள்கிறேன்.

இதுவரை எனக்குக் கிடைத்த வாய்ப்புகளையும், எனது பயணத்தையும் ஊடகங்கள்தான் தொடர்ந்து மக்களிடம் கொண்டு சேர்த்திருக்கின்றன. அடுத்த படம் எப்போது, ஏன் புதிய படங்களில் நடிக்கவில்லை என்று தொடர்ந்து கேட்டு எனக்கு ஊக்கம் அளித்திருக்கிறீர்கள். அதற்காக அனைவருக்கும் நன்றி. ‘பிளாக் கோல்டு’ திரைப்படம் வெளியாகும்போதும் ஊடக நண்பர்கள் ஆதரவும் ஒத்துழைப்பும் அளிக்க வேண்டும். உங்கள் ஆதரவின் மூலம்தான் எங்களைப் போன்ற கலைஞர்கள் தொடர்ந்து வளர முடியும் என்று நம்புகிறேன்.

இயக்குநர் தீரன் அருண்குமார் பேசியதாவது,

கிட்டத்தட்ட ஐந்து ஆண்டுகளுக்குப் பிறகு மீண்டும் இதே அரங்கில் உங்களைச் சந்திப்பது, காணாமல் போன குழந்தை மீண்டும் கிடைத்தது போன்ற உணர்வைத் தருகிறது. எனது முதல் படமான ‘தீர்ப்புகள் விற்கப்படும்’ படத்தின் ஆடியோ வெளியீட்டு விழாவில்தான் உங்களைச் சந்தித்தேன். தற்போது எனது இரண்டாவது படமான ‘பிளாக் கோல்டு’ மூலம் மீண்டும் உங்கள் முன்னால் நிற்கிறேன். முதல் படத்திற்குப் பிறகு அடுத்த படத்திற்கான முயற்சியில் இருந்தபோது, தெலுங்கில் ஒரு பெரிய பட்ஜெட் படத்திற்கான கதையைச் சொல்லியிருந்தேன். சில கட்டங்களைக் கடந்தும் அந்தப் படம் தொடங்க முடியாத சூழல் ஏற்பட்டது. அதனால் தமிழுக்கே திரும்பி, புதுமையான ஒரு கதையைத் திரைப்படமாக உருவாக்க முடிவு செய்தேன். பல தயாரிப்பாளர்களிடம் கதையைச் சொன்னபோதும் யாரும் துணிவாக முன் வரவில்லை.  மலையாள சினிமா போல வித்தியாசமான கதைகளுக்கான வரவேற்பு தமிழிலும் இன்னும் அதிகரிக்க வேண்டும் என்ற எண்ணம் எனக்கு இருந்தது. அந்தச் சூழலில்தான் ‘பிளாக் கோல்டு’ உருவானது.

இந்தப் படத்திற்கு வெற்றியைத் தேர்வு செய்ததற்குக் காரணம், குறைந்த பட்ஜெட்டிலும் குறைந்த நாட்களிலும் பணியாற்றக்கூடிய அதே நேரத்தில் கதைக்கு ஏற்ற கதையின் நாயகனாக அவர் இருப்பார் என்று நம்பியதுதான். அவரிடம் கதையைச் சொன்னதும் மிகவும் மகிழ்ச்சியுடன் ஏற்றுக்கொண்டு உடனடியாகப் படத்தைத் தொடங்கலாம் என்றார். படத்தின் நாயகி உடல்நலக் குறைவால் இன்றைய நிகழ்ச்சிக்கு வர முடியவில்லை. அபிராமி காவல்துறை அதிகாரி கதாபாத்திரத்தில் வித்தியாசமான தோற்றத்தில் நடித்திருக்கிறார். அருள் டி. சங்கர் நடித்த சுருள் ஆயுதச் சண்டைக் காட்சிக்காக எட்டு முதல் ஒன்பது நாட்கள் பயிற்சி அளித்தோம். படத்தில் சுமார் ஒன்றரை நிமிடம் மட்டுமே வரும் அந்தக் காட்சிக்காகவும் அவர் கடுமையாக உழைத்தார். அதற்காக ஸ்டண்ட் மாஸ்டர் “மெட்ரோ” மகேஸ் மாஸ்டருக்கு நன்றியை சொல்லிக்கொள்கிறேன். ஏ. வெங்கடேஷ் போன்ற அனுபவமிக்க கலைஞர் எங்களுடன் மிகவும் நட்பாகவும் அர்ப்பணிப்புடனும் பணியாற்றியது மகிழ்ச்சி. சபீதா ராய், கராத்தே வெங்கடேஷ், ஜப்பான் குமார் உள்ளிட்ட மற்ற நடிகர்களும் கதாபாத்திரங்களுக்கு ஏற்ற பங்களிப்பை வழங்கியுள்ளனர். குறிப்பாக ஜப்பான் குமாருக்கு வசனங்கள் இல்லாத கதாபாத்திரம். பேசாமல் உணர்வுகளை வெளிப்படுத்துவது எளிதான விஷயமல்ல; அதை அவர் சிறப்பாகச் செய்திருக்கிறார்.

ஒரு திரைப்படத்தின் தரத்தைத் தீர்மானிப்பதில் ஒளிப்பதிவாளர், எடிட்டர், இசையமைப்பாளர் ஆகிய மூவரின் பங்களிப்பும் மிகவும் முக்கியமானது. இந்தப் படத்தில் ஒளிப்பதிவாளர் சந்தோஷ் குமார் தனது முதல் படத்திலேயே சிறப்பாகப் பணியாற்றியிருக்கிறார். எடிட்டர் தினேசிற்கும் எனக்கும் நல்ல புரிதல் இருந்ததால் படத்தைச் சிறப்பாக முடிக்க முடிந்தது. இசையமைப்பாளர் கவாஸ்கர் அவினாஷும் படத்திற்கு மிகவும் வலு சேர்த்துள்ளார். எனது நண்பர் ராம் பல ஆண்டுகளாகப் பழக்கமானவர்; அவரையும் இந்தப் படத்தின் மூலம் சரியான நேரத்தில் அறிமுகப்படுத்தியிருக்கிறேன். புதிய கலைஞர்களை நம்பி வாய்ப்பளிப்பதில் எங்களுக்கு மகிழ்ச்சி. படத்தைப் பார்த்தவர்கள் நல்ல முறையில் கருத்துகளைத் தெரிவித்துள்ளனர். ஆனால் இறுதித் தீர்ப்பு நவம்பர் 13ஆம் தேதி படம் வெளியாகும்போது ரசிகர்களிடமிருந்தும் ஊடகங்களிடமிருந்தும்தான் கிடைக்கும். சிறிய படம், பெரிய படம் என்ற பிரிவுகளில் எனக்கு நம்பிக்கை இல்லை. கதையின் உள்ளடக்கம்தான் ஒரு படத்தின் மதிப்பைத் தீர்மானிக்கிறது. நல்ல உள்ளடக்கம் கொண்ட படங்களைத் தமிழ் ரசிகர்கள் எப்போதும் ஆதரித்திருக்கிறார்கள்; அதே ஆதரவை எங்களுக்கும் வழங்குவீர்கள் என்று நம்புகிறேன்.

இந்தப் படத்தின் மிகப்பெரிய பலம் தயாரிப்பாளர் மூர்த்தி சார்தான். ஆரம்பம் முதல் இன்று வரை அவர் ஒரு தயாரிப்பாளராக மட்டுமல்லாமல், மிகப்பெரிய சினிமா ரசிகராகவே என்னுடன் பயணித்திருக்கிறார். படத்தில் வரும் காட்சிகள், வசனங்கள் என அனைத்தையும் ஆர்வத்துடன் கேட்டுத் தெரிந்துகொள்வார். அதிகாலை ஐந்து மணிக்குப் படப்பிடிப்பை முடித்துவிட்டுச் சென்றாலும், அன்றைய படப்பிடிப்பு எப்படி நடந்தது, காட்சிகள் நன்றாக வந்ததா என்று விசாரிப்பார். இப்படிப்பட்ட சினிமா மீதான ஆர்வம் கொண்ட தயாரிப்பாளர்கள் தமிழ் சினிமாவுக்கு மிகவும் அவசியம். பணம் இல்லாமல் பல நல்ல கதைகள் திரைப்படமாக முடியாமல் நிற்கின்றன. அப்படிப்பட்ட சூழலில் எனக்கு மூர்த்தி சார் கிடைத்தது மிகப்பெரிய பாக்கியம். எனது வெற்றியை விட அவர் வெற்றி பெற வேண்டும் என்பதுதான் எனக்கு முக்கியம். அவர் வெற்றி பெற்றால் என்னைப் போன்ற பல புதிய இயக்குநர்களுக்கும் வாய்ப்பளிக்க முடியும். இந்தப் படத்தின் தொடக்கத்திலிருந்து பல தடைகளைச் சந்தித்தோம். படம் பாதியில் நின்றுவிடும், அடுத்த கட்டத்திற்குச் செல்லாது, வியாபாரம் ஆகாது என்று பலரும் கூறினார்கள். ஆனால் ஒவ்வொரு தடையையும் கடந்து படத்தை முடித்தோம். தற்போது வியாபாரமும் முடிந்து, திரையரங்க வெளியீட்டிற்குத் தயாராக இருக்கிறோம்.

இந்தப் படத்தைத் தொடங்கியதும் இதே வளாகத்தில் உள்ள பிள்ளையார் கோயிலில் சிறிய பூஜை நடத்தினோம். அப்போது இந்தப் படம் நிற்கும் என்று கூறியவர்கள் பலர் இருந்தார்கள். ஆனால் இன்று அனைத்து தடைகளையும் கடந்து உங்கள் முன்னால் வந்திருக்கிறோம். படத்தின் அடுத்தகட்ட விளம்பரப் பணிகளையும் தொடங்கவிருக்கிறோம். எங்கள் குழுவினர் ஒவ்வொருவரும் தங்களால் முடிந்த உழைப்பைக் கொடுத்து ஒரு கட்டடத்தைச் செங்கல் செங்கலாக உருவாக்குவது போல இந்தப் படத்தை உருவாக்கியிருக்கிறோம். அதன் வெற்றியைத் தீர்மானிப்பது உங்கள் ஆதரவுதான். நவம்பர் 13ஆம் தேதி வெளியாகும் ‘பிளாக் கோல்ட்’ படத்தைப் பார்த்து எனது உழைப்பும், எங்கள் குழுவின் முயற்சியும் உங்களுக்குப் பிடித்திருக்கிறதா என்பதை அறிய ஆவலாக இருக்கிறேன். மீண்டும் உங்கள் அனைவரையும் வெற்றிக் கொண்டாட்டத்தில் சந்திப்பேன் என்ற நம்பிக்கையுடன் நன்றி தெரிவித்துக்கொள்கிறேன்.

நடிகர் வெற்றி பேசியதாவது,

‘பிளாக் கோல்டு’ திரைப்படம் எனது திரைப்பயணத்தில் மிகவும் முக்கியமான படம். பொதுவாக பிளாக் கோல்டு என்றால் கச்சா எண்ணெய் அல்லது மிளகு என்று பலரும் நினைக்கலாம். ஆனால் இந்தப் படத்தில் நாங்கள் குறிப்பிடுவது மனிதர்களின் தலைமுடியைத்தான். தலைமுடிக்குப் பின்னால் ஒவ்வொரு நாளும் நடைபெறும் மிகப்பெரிய வணிகமும், அதன் பின்னணியில் இயங்கும் வலையமைப்பும்தான் இந்தப் படத்தின் கதைக்களம். இந்தப் பின்னணியில் ஒரு குடும்பக் கதையையும், அப்பா – மகன் இடையிலான உணர்வுப்பூர்வமான உறவையும் இணைத்து இயக்குநர் தீரன் உருவாக்கியிருக்கிறார்.

இந்தக் கதையை முதன்முதலில் கேட்டபோதே எனக்கு மிகவும் பிடித்திருந்தது. வித்தியாசமான கதைக்களத்துடன் உணர்வுகளுக்கும் முக்கியத்துவம் கொடுத்து இப்படம் உருவாகியுள்ளது. இதில் பணியாற்றிய அனைத்து தொழில்நுட்பக் கலைஞர்கள், சக நடிகர்கள், இயக்குநர் குழுவினர் மற்றும் தயாரிப்பாளர் மூர்த்தி உள்ளிட்ட அனைவருக்கும் எனது வாழ்த்துகளையும் நன்றியையும் தெரிவித்துக்கொள்கிறேன்.

‘பிளாக் கோல்டு’ திரைப்படம் நவம்பர் 13ஆம் தேதி திரையரங்குகளில் வெளியாகிறது. அனைவரும் படத்தைப் பார்த்துவிட்டு உங்களது கருத்துகளைப் பகிர்ந்துகொள்ளுங்கள். எப்போதும் அளிக்கும் ஆதரவைப் போல இந்தப் படத்திற்கும் ஊடக நண்பர்களும் ரசிகர்களும் ஆதரவு தர வேண்டும். நன்றி.

இப்படத்திற்கு சந்தோஷ் குமார் வீராசாமி ஒளிப்பதிவு செய்துள்ளார். கவாஸ்கர் அவினாஷ் இசையமைத்துள்ளார். இப்படம் வரும் நவம்பர் 13-ம் தேதி திரையரங்குகளில் வெளியாகும் எனப் படக்குழு அதிகாரப்பூர்வமாக அறிவித்துள்ளது.