Cinema

சாம் சி எஸ் இசையில் ரசிகர்களை முணுமுணுக்க வைக்கும் “லவ் யூ லவ் யூ காட்டேரி” பாடல்

deccanwebtv Jun 27, 2026

இசையமைப்பாளர் Sam C. S. தொடர்ந்து வித்தியாசமான இசை அனுபவங்களை வழங்கி ரசிகர்களின் கவனத்தை ஈர்த்து வரும் நிலையில், தற்போது AK Film Factory சார்பில் Arunkumar Dhanasekaran தயாரிப்பில், ஜிவி பிரகாஷ், கயாடு லோஹர் நடிப்பில், அறிமுக இயக்குநர் மாரியப்பன் சின்னா இயக்கத்தில் உருவாகும் ‘இம்மார்டல்’ (Immortal) திரைப்படத்திலிருந்து வெளியாகியுள்ள “லவ் யூ லவ் யூ காட்டேரி” பாடல் இசை ரசிகர்களிடம் நல்ல வரவேற்பைப் பெற்று வருகிறது.

ஃபேண்டஸி திரில்லர் ஜானரில் உருவாகி வரும் இப்படத்திற்கு இசையமைத்துள்ள சாம் சி எஸ், இந்தப் பாடலில் தனது தனித்துவமான இசை பாணியை மீண்டும் ஒருமுறை நிரூபித்துள்ளார். கேட்டவுடன் மனதில் பதியும் மெலடி, டார்க் தீமில் வடிவமைக்கப்பட்ட இசை அமைப்பு மற்றும் புதுமையான சவுண்ட் டிசைன் ஆகியவை பாடலுக்கு தனி அடையாளத்தை வழங்குகின்றன.

இந்தப் பாடலை சாம் சி எஸ் மற்றும் Reshma Shyam இணைந்து பாடியுள்ளனர். பாடல் வரிகளை Shali C எழுதியுள்ளார். காதலியை ஒரு “காட்டேரி”யாக கற்பனை செய்து வர்ணிக்கும் இந்தப் பாடல், வழக்கமான காதல் பாடல்களிலிருந்து முற்றிலும் மாறுபட்ட அனுபவத்தை வழங்குகிறது.

சிவப்பு நிற பின்னணியில், டார்க் விஷுவல் டோனில், அழகான நடன அசைவுகளுடன் பாடல் படமாக்கப்பட்டுள்ளது. இசை, காட்சிகள், நடனம் ஆகிய மூன்றும் ஒன்றோடொன்று கலந்த விதம் பாடலின் ஈர்ப்பை மேலும் அதிகரிக்கிறது. குறிப்பாக இளைஞர்களை கவரும் வகையில் உருவாக்கப்பட்டுள்ள இந்தப் பாடல், வெளியான குறுகிய நேரத்திலேயே சமூக வலைதளங்களில் கவனம் பெற்று வருகிறது.

இசை என்பது கதையின் உணர்வுகளை ரசிகர்களிடம் கொண்டு சேர்க்கும் மொழி என்பதை பலமுறை நிரூபித்துள்ள சாம் சி எஸ், இந்தப் பாடலிலும் புதுமையான மெலடி மற்றும் நவீன இசை அமைப்பின் மூலம் ரசிகர்களை கவர்ந்துள்ளார். பாடல் முடிந்த பிறகும் அதன் தாளம் மற்றும் மெலடி மனதில் நீடிக்கும் வகையில் அமைந்துள்ளது.

ரோமியோ பிக்சர்ஸ் தயாரிப்பில் விக்ரம் பிரபுவின் 26வது

deccanwebtv Jun 27, 2026

யுவன் சங்கர் ராஜா இசையில் விக்ரம் பிரபு – அறிமுக இயக்குநர் சித்தார்த் கூட்டணி; புதிய கமர்ஷியல் படம் தொடக்கம்!

தமிழ் சினிமாவில் தரமான மற்றும் வித்தியாசமான படைப்புகளை தொடர்ந்து வழங்கி வரும் தயாரிப்பாளர் ராகுல் அவர்களின் ரோமியோ பிக்சர்ஸ் நிறுவனம், தனது அடுத்த பிரம்மாண்ட தயாரிப்பை அதிகாரப்பூர்வமாக அறிவித்துள்ளது. நடிகர் விக்ரம் பிரபு கதாநாயகனாக நடிக்கும் இந்த புதிய படத்தை அறிமுக இயக்குநர் சித்தார்த் இயக்குகிறார். இப்படத்தின் படப்பிடிப்பு இம்மாத இறுதியில் தொடங்கவுள்ளது.

தங்க மார்க்கெட் பின்னணியில் நடைபெறும் சம்பவங்களை மையமாகக் கொண்டு உருவாகும் இப்படம், விறுவிறுப்பான திரைக்கதை, அதிரடி மற்றும் கமர்ஷியல் அம்சங்கள் நிறைந்த, ஆக்சன் திரில்லர் படைப்பாக உருவாக உள்ளது. சென்னையில் முதல் கட்ட படப்பிடிப்புகளை நடத்த படக்குழு திட்டமிடப்பட்டுள்ளது. தற்போது படத்தில் நடிக்கவுள்ள நடிகர், நடிகையர் தேர்வு பரபரப்பாக நடைபெற்று வருகிறது.

நடிகர் விக்ரம் பிரபு, தனது தனித்துவமான கதைத்தேர்வுகள் மூலம் ரசிகர்களின் பாராட்டைப் பெற்று வருகிறார். குறிப்பாக டாணாக்காரன் மற்றும் சிறை போன்ற படங்களின் பிரம்மாண்ட வெற்றிக்குப் பிறகு அவர் தேர்வு செய்யும் கதைகளின் மீதான எதிர்பார்ப்பு அதிகரித்துள்ளது. அந்த வரிசையில் உருவாகும் இந்த புதிய திரைப்படம், விக்ரம் பிரபுவின் திரைப்பயணத்தில் 26வது படமாக அமைந்துள்ளது. வித்தியாசமான களத்தில் உருவாகும் இந்த படம் அவரது திரை வாழ்க்கையில் மேலும் ஒரு முக்கிய மைல்கல்லாக அமையும் என எதிர்பார்க்கப்படுகிறது.

வித்தியாசமான கதைக்களங்களைத் தேர்வு செய்து தரமான திரைப்படங்களை தயாரித்தும், வெற்றிகரமாக விநியோகம் செய்தும் வரும் ரோமியோ பிக்சர்ஸ் நிறுவனம், இந்த புதிய படத்தையும் பிரம்மாண்ட பொருட்செலவில் உருவாக்கவுள்ளது. தரமான தொழில்நுட்பம் மற்றும் வலுவான கதையம்சத்துடன் உருவாகும் இப்படம், ரசிகர்களுக்கு ஒரு புதிய அனுபவத்தை வழங்கும் வகையில் திட்டமிடப்பட்டுள்ளது.

இப்படத்திற்கு முன்னணி இசையமைப்பாளர் யுவன் சங்கர் ராஜா இசையமைக்கிறார். ஒளிப்பதிவை கார்த்திக் ஷராஜ் கவனிக்க, படத்தொகுப்பை அருள் மோசஸ் மேற்கொள்கிறார்.

மேலும், ரோமியோ பிக்சர்ஸ் நிறுவனத்தின் சார்பில் ரவி மோகன் நடிப்பில் ஒரு படமும், ஆகாஷ் முரளி நடிப்பில் மற்றொரு படமும், தற்போது தயாரிப்பில் இருப்பது குறிப்பிடத்தக்கது.

சிறந்த சமூக மாற்றத்தை நிகழ்த்திய படமாக ‘நந்தன்’ தேர்வு. டெல்லி தமிழ்ச் சங்கம் கௌரவம்!

deccanwebtv Jun 23, 2026

சமூக மாற்றத்தை நிகழ்த்திய படமாக சசிகுமார் நடிப்பில் வெளியான ‘நந்தன்’ படத்தைத் தேர்ந்தெடுத்து கௌரவித்திருக்கிறது டெல்லி தமிழ்ச் சங்கம். 2024ல் இரா.சரவணன் இயக்கத்தில் வெளியான படம் ‘நந்தன்’. தலித் பஞ்சாயத்து தலைவர்கள் பதவிக்கு வந்தும் உரிய அங்கீகாரத்தை அடைய முடியாமல் போராடும் நிஜத்தை ‘நந்தன்’ படத்தில் கதையாக்கி இருந்தார்கள். படத்தின் க்ளைமாக்ஸில் தமிழ்நாட்டில் உள்ள தலித் பஞ்சாயத்து தலைவர்கள் பலரும் தங்களின் வேதனையான நிலையை வாக்குமூலமாக வெளியிட்டிருந்தார்கள். இது படம் வெளியான போது தமிழகம் முழுக்க பரபரப்பைக் கிளப்பியது. ‘நந்தன்’ படத்தின் சமூக நீதிக் கருத்தை இயக்குநர் பாரதிராஜா, பாக்யராஜ், நடிகர் ரஜினிகாந்த், கவிஞர் வைரமுத்து உள்ளிட்ட திரைத்துறையினரும் திருமாவளவன், அண்ணாமலை, சீமான், அன்புமணி ராமதாஸ், ஆதவ் அர்ஜூனா உள்ளிட்ட அரசியல் கட்சித் தலைவர்களும் வரவேற்று இருந்தார்கள். படம் வெளியான பிறகு தமிழகம் முழுக்க தலித் பஞ்சாயத்து தலைவர்கள் சுதந்திரமாகக் கொடியேற்றவும், உரிய அதிகாரங்களை அடையவும் அதிரடியாக உத்தரவிட்டது தமிழக அரசு. கடந்த வருட குடியரசு தினத்தில் இதுகாலம் வரை நடக்காத அதிசயமாகத் தமிழ்நாட்டில் உள்ள தலித் பஞ்சாயத்து தலைவர்கள் அனைவரும் கொடியேற்றினர். “நந்தன் திரைப்படம் உருவாக்கிய சமூக புரட்சி இது” என சீமான் உள்ளிட்ட அரசியல் கட்சித் தலைவர்கள் பலரும் அதனை வரவேற்று இருந்தார்கள். இந்நிலையில், சமூக மாற்றத்தை நிகழ்த்திய திரைப்படமாக ‘நந்தன்’ படத்தைத் தேர்ந்தெடுத்து நடிகர் சசிகுமார், இயக்குநர் இரா.சரவணன் இருவருக்கும் பாராட்டு விழா நடத்தி இருக்கிறது டெல்லி தமிழ்ச் சங்கம்.

கடந்த 20.6.26 அன்று மாலை டெல்லி தமிழ்ச் சங்கம் நடத்திய பாராட்டு விழாவில் இந்திய கலாச்சார அமைச்சகத்தின் இயக்குநர் Shah Faesal IAS சிறப்பு விருந்தினராகக் கலந்து கொண்டார். டெல்லி தமிழ் சங்கத்தின் பொதுச் செயலாளர் சத்யா அசோகன், இணைத் தலைவர் மகேந்திரன், தயாரிப்பாளர் சிவா மற்றும் டெல்லி தமிழ்ச் சங்க நிர்வாகிகள் பலரும் கலந்து கொண்டனர். “தமிழ்த் திரைப்படங்கள் மகத்தான உணர்வைக் கொடுக்கின்றன. சமூகத்தைச் சரியாகப் பிரதிபலிக்கின்றன. நல்ல படங்களைக் கொண்டாடுவதுதான் சமூகம் சிறக்க உதவும்”  என இந்திய கலாச்சார அமைச்சகத்தின் இயக்குநர் Shah Faesal IAS பேசினார். இணைத் தலைவர் மகேந்திரன், “நந்தன் மாதிரியான படத்தில் நடிக்க ஹீரோக்களுக்கு தனி தைரியம் தேவை. சசிகுமார் அதனை சமூக அக்கறையோடு செய்திருக்கிறார். வாயில் வெற்றிலை எச்சில் ஒழுக அவர் நடித்த காட்சிகளைப் பார்த்தபோது திகைத்துப் போய்விட்டேன். கமலுக்கு சப்பாணி என்றால், சசிகுமாருக்கு நந்தன். அந்தளவுக்கு அடி உதை வாங்கி தலித் பஞ்சாயத்து தலைவராக தன்னை அப்படியே காட்டி இருக்கிறார் சசிகுமார். டெல்லி தமிழ்ச் சங்கத்தின் அங்கீகாரம் மட்டுமல்ல, இன்னும் பல விருதுகள் ‘நந்தன்’ படத்திற்கு வந்து சேரும். சமூகத்தை வலிமைப்படுத்தும் இத்தகைய படைப்புகள்தான் இன்றைய தலைமுறையின் அவசிய தேவை…” என்றார். நிகழ்வில் நடிகர் சசிகுமாரும் இயக்குநர் இரா.சரவணனும் திரண்டிருந்த தமிழ்ச் சங்க நிர்வாகிகளின் கேள்விகளுக்குப் பதில் அளித்தனர். “படத்தில் நான் பட்ட சிரமங்கள் யாவும் டெல்லி மக்களின் பாராட்டில் சரியாகிவிட்டன. ‘நந்தன்’ படம் வெளியான பிறகு எங்களுக்கு விடிவு பிறந்திருப்பதாக ஒரு பெண் பஞ்சாயத்து தலைவர் என் கைகளைப் பிடித்து அழுதார். அந்தக் கண்ணீர் தேசிய விருதுக்கு நிகரானது” என்றார் சசிகுமார். “எப்போதுமே சினிமா தமிழ் மக்களின் ரத்தத்துடன் கலந்தது. அதனால்தான் முதலமைச்சரையே தமிழ் மக்கள் சினிமாவில் இருந்து தேர்ந்தெடுக்கிறார்கள். ‘நந்தன்’ படத்திற்குக் கிடைத்திருக்கும் இந்தப் பாராட்டு அடுத்தடுத்த படைப்புகளை இன்னும் பொறுப்போடு செய்ய வைக்கும்” என்றார் இயக்குநர் இரா.சரவணன்.

சமூக மாற்றத்தை நிகழ்த்திய படமாக ‘நந்தன்’ தேர்ந்தெடுக்கப்பட்டு சசிகுமார், இரா.சரவணன் இருவருக்கும் விருது கொடுக்கப்பட்டது. ஜென்ஸி தலைமுறையினரும் இத்தகைய சமூக அக்கறையான படங்களைப் பார்க்க வேண்டும் என்பதால் வரும் வாரத்தில் ‘நந்தன்’ படத்தை பிரத்யேகமாகத் திரையிடவும் டெல்லி தமிழ்ச் சங்கம் ஏற்பாடு செய்து வருகிறது.

அபிஷேக் நாமாவின் ‘நாகபந்தம்- (Nagabhandham) ‘ திரைப்படம் ஜூலை 3ஆம் தேதி பிரம்மாண்டமாக வெளியாகிறது

deccanwebtv Jun 23, 2026

அபிஷேக் நாமாவின் இயக்கத்தில் உருவான ‘நாகபந்தம் ‘( Nagabhandham) திரைப்படம் வெளியாவதற்கு இன்னும் இரண்டு வாரங்களே உள்ள நிலையில் படக் குழுவினர் இந்தியா முழுவதும் படத்தினை விளம்பரப்படுத்தும் பணிகளை தீவிரப்படுத்தி உள்ளனர்.

விராட் கர்ணா( Virat Karna) நடிப்பில் உருவாகியுள்ள இப்படத்தின் ட்ரெய்லர் வெளியிடப்பட்டது. இது படத்தின் கதைக்களம் மற்றும் அதன் விவரிக்கும் உலகத்தை விரிவாக அறிமுகப்படுத்துகிறது.

இந்த முன்னோட்டத்தின் தொடக்கத்தில் திருவனந்தபுரத்தில் உள்ள புனிதமான அனந்தபத்மநாப சுவாமி கோயில் இடம் பிடித்திருக்கிறது. அங்கு அனைவராலும் போற்றப்படும் ‘பிரம்ம கமலம்’ என்பது சாதாரண தங்க தாமரை மலர் மட்டுமல்ல என்பதை ஒரு பூசாரி வெளிப்படுத்துகிறார்.

பல நூற்றாண்டுகளாக படையெடுப்பாளர்கள் மற்றும் புதையல் வேட்டையர்களின் எண்ணற்ற தொடர் முயற்சிகள் இருந்த போதிலும்… அந்த தெய்வீக பொருள் ஒருபோதும் திருடப்படவில்லை.

கற்பனைக்கு எட்டாத-  கற்பனை செய்து பார்த்திட இயலாத-  சக்திகளை பெறுவதற்காக ஒரு வலிமை வாய்ந்த தீய சக்தி அதை கைப்பற்ற முயலும் போது, சிவபெருமான் அங்கு தோன்றி அதை பாதுகாக்க நாக சாதுக்களுடன் கைகோர்க்கிறார்.

கோயிலை பாதுகாக்கும் மர்மமான ‘நாக பந்தம்’ பற்றிய குறிப்புடன் இப்படத்தின் முன்னோட்டம் நிறைவடைகிறது. இது தெய்வீக சக்திக்கும், தீமைக்கும் இடையிலான ஒரு காவிய மோதலுக்கான களத்தை அமைக்கிறது.

இந்திய புராணங்கள் வரலாறு மற்றும் கோயில் சார்ந்த மரபுகள் குறித்து இயக்குநர் அபிஷேக் நாமா மேற்கொண்ட விரிவான ஆய்வுகள்… இந்த முன்னோட்டம் முழுவதும் வெளிப்படுகிறது.

சுவாரசியமான விவரங்கள் மற்றும் மெய்சிலிர்க்க வைக்கும் தருணங்கள் நிறைந்த இது… பல காலகட்டங்களை உள்ளடக்கிய ஒரு கதைக்களத்தை முன்னிறுத்துகிறது.

புராணம்- வரலாறு- மர்மம் மற்றும் சாகசம் -ஆகியவற்றை ஒரே சினிமா அனுபவத்துடன் இணைக்கும் வகையில் இதன் கதை சொல்லும் விதம் பிரம்மாண்டமாக அமைந்துள்ளது.

மிகப்பெரிய அளவில் உருவாக்கப்பட்டுள்ள’ நாக பந்தம்’ தனது பிரம்மாண்டமான விஷுவல்கள் மூலம்  பார்வையாளர்களை கவர்கிறது.

படத்தின் பிரம்மாண்டமான கதைக்களம் ஒவ்வொரு காட்சியிலும் பிரதிபலிக்கிறது. தயாரிப்பு வடிவமைப்பாளர் அசோக் குமார் பிரம்மாண்டமான மற்றும் நுட்பமான விவரங்களுடன் கூடிய அரங்குகளை உருவாக்கியுள்ளார்.

அனந்த பத்மநாப சுவாமி கோயில் மற்றும் அதன் கம்பீரமான மூலவர் சிலை ஆகியவை மீண்டும் உருவாக்கப்பட்டுள்ள விதம்…. படத்தின் முதன்மையான சிறப்பம்சங்களில் ஒன்றாக திகழ்கிறது.

ஒளிப்பதிவாளர் எஸ். சௌந்தர்ராஜன் படத்தின் ஆன்மீக சாராம்சத்தையும், பிரம்மாண்ட அளவையும் அழகாக நேர்த்தியுடன் படம்பிடித்து பிரமிக்க வைக்கும் காட்சிகளுடன் கதையை அடுத்த கட்டத்திற்கு கொண்டு செல்கிறார்.

காட்சிகளுக்கு வலு சேர்க்கும் வகையில் இசையமைப்பாளர்கள் ஜூனைத் கான் மற்றும் அபே ( Abhe) ஆகியோரின் இசை அமைந்துள்ளது. இவர்களின் பின்னணி இசை-  கதையின் பக்தி உணர்வையும், உணர்வுபூர்வமான ஆழத்தையும் ஒரு சேர மேம்படுத்துகிறது.

படத்தின் சண்டைக் காட்சிகளும் வலுவான தாக்கத்தை ஏற்படுத்துகின்றன.

இத்தகைய பிரம்மாண்டமான மற்றும் லட்சியமிக்க படைப்பிற்காக சமரசமற்ற தயாரிப்பு தரத்துடன் படைப்பை வழங்கிய என் ஐ கே ஸ்டுடியோவின் ( NIK Studio)   தயாரிப்பாளர்கள் கிஷோர் அன்னபுரெட்டி மற்றும் நிஷிதா நாகி ரெட்டி ஆகியோர் பாராட்டுக்கு உரியவர்கள். குறிப்பாக இதில் இடம் பிடித்துள்ள வி எஃப் எக்ஸ் VFX பணிகள் சர்வதேச தரத்தில் அமைந்துள்ளன.

இப்படத்தில் விராட் கர்ணா கதாநாயகனாக நடிக்கிறார். ஒரே ஒரு படத்தில் மட்டுமே நடித்திருந்தாலும் அவர் தனது குறிப்பிடத்தக்க திரை தோற்றத்தையும் ,வசீகரத்தையும் வெளிப்படுத்துகிறார்.

சாதாரணமான மனிதனாகவும் … சிவபெருமானாகவும்… என இரண்டு வித தோற்றங்களைக் கொண்ட கதாபாத்திரத்தில் விராட் கர்ணா தோன்றுகிறார் என முன்னோட்டம் தெரிவிக்கிறது. அவரது உடல் மாற்றம்,  கம்பீரமான தோற்றம் மற்றும் கதாபாத்திரத்தின் மீதான அர்ப்பணிப்புடன் கூடிய உழைப்பு ஆகியவை படம் முழுவதும் தெளிவாக தெரிகிறது.

மேலும் கதையில் முக்கிய பங்குவகிக்கவிருக்கும் ஒரு வலுவான நட்சத்திரக் கூட்டத்தையும் குறிக்கும் வகையில் பல முக்கிய துணை கதாபாத்திரங்களின் தோற்றத்தையும் இந்த ட்ரெய்லர் வழங்குகிறது.

மொத்தத்தில் பழங்கால புராணங்கள் – மறைக்கப்பட்ட புதையல்கள் – தெய்வீக மர்மங்கள் – ஆகியவை அடங்கிய கண்களுக்கு விருந்தளிக்கும் ஒரு புராண சாகச படமாக ‘நாகபந்தம் ‘ இருக்கும் என ட்ரெய்லர் உறுதிப்படுத்துகிறது.

இந்தியாவில் ‘ஸ்பைடர்-மேன்: பிராண்ட் நியூ டே’ (Spider-Man: Brand New Day) படத்திற்கான முன்பதிவு தொடங்கியது

deccanwebtv Jun 18, 2026

இந்தியாவில் ‘ஸ்பைடர்-மேன்: பிராண்ட் நியூ டே’ (Spider-Man: Brand New Day) படத்திற்கான முன்பதிவு தொடங்கியது; ரசிகர்கள் பிரீமியம் பெரிய திரை வடிவங்களில் (Premium Large Format) படத்தைப் பார்க்கும் வாய்ப்பைப் பெறுகின்றனர்

‘ஸ்பைடர்-மேன்: பிராண்ட் நியூ டே’ படத்திற்கான முன்பதிவு அதிகாரப்பூர்வமாகத் தொடங்கியுள்ளது! டாம் ஹாலண்ட் நடிப்பில் உருவாகியுள்ள இப்படம், ஜூலை 30 அன்று ஆங்கிலம், இந்தி, தமிழ், தெலுங்கு, கன்னடம் மற்றும் மலையாளம் ஆகிய மொழிகளில் இந்தியாவில் வெளியாகிறது.

நீண்ட காத்திருப்பு முடிவுக்கு வந்தது! இந்தியா முழுவதும் ‘ஸ்பைடர்-மேன்: பிராண்ட் நியூ டே’ படத்திற்கான முன்பதிவு இப்போது அதிகாரப்பூர்வமாகத் தொடங்கியுள்ளது. பெரிதும் எதிர்பார்க்கப்படும் டாம் ஹாலண்ட் நடித்த இப்படத்தை, சோனி பிக்சர்ஸ் என்டர்டெயின்மென்ட் இந்தியா நிறுவனம் ஜூலை 30 அன்று ஆங்கிலம், இந்தி, தமிழ், தெலுங்கு, கன்னடம் மற்றும் மலையாளம் ஆகிய மொழிகளில் வெளியிடுகிறது. இந்த ஆண்டின் மிகவும் எதிர்பார்க்கப்படும் பிரம்மாண்டமான வெளியீடான ‘ஸ்பைடர்-மேன்: பிராண்ட் நியூ டே’, மறக்க முடியாத ஒரு பெரிய திரை சாகச அனுபவத்தை உறுதியளிக்கிறது. இந்த அனுபவத்தை முன்னெப்போதையும் விட பிரம்மாண்டமாகவும், சிறப்பானதாகவும் மற்றும் முழுமையான ஈடுபாட்டைத் தரும் வகையிலும் மாற்ற, சோனி பிக்சர்ஸ் என்டர்டெயின்மென்ட் இந்தியா இப்படத்தை பல்வேறு பிரீமியம் பெரிய திரை வடிவங்களில் (Premium Large Formats) வெளியிடுகிறது. இதன் மூலம் ரசிகர்கள் ஒவ்வொரு ‘ஸ்விங்’ (swing) அசைவு, சண்டைக்காட்சி மற்றும் பிரம்மாண்டமான காட்சிகளைப் பெரிய அளவில் அனுபவிக்க முடியும்.

P[XL], Big Pix, Screen X, ICE, 4DX மற்றும் MX4D உள்ளிட்ட பிரீமியம் பெரிய திரை வடிவங்களில் ‘ஸ்பைடர்-மேன்: பிராண்ட் நியூ டே’ படத்திற்கான முன்பதிவு தொடங்கியுள்ளதாக சோனி பிக்சர்ஸ் என்டர்டெயின்மென்ட் இந்தியா அறிவித்துள்ளது. இது ரசிகர்களுக்குக் கிடைக்கும் மிகப்பெரிய மற்றும் மிகச்சிறந்த திரையரங்கு அனுபவத்தை வழங்கும் திரைகளில் இப்படத்தைப் பார்க்கும் வாய்ப்பை அளிக்கிறது.

வெளியீட்டை உறுதிப்படுத்தும் வகையில், சோனி பிக்சர்ஸ் ரிலீசிங் இன்டர்நேஷனல் (SPRI) இந்தியாவின் பொது மேலாளரும் தலைவருமான ஷோனி பஞ்சிகரன் பேசுகையில், ஸ்பைடர்-மேனின் பெரிய திரை வருகையை ஒரு பிரம்மாண்டமான நிகழ்வாக மாற்றவே இந்த பிரீமியம் பெரிய திரை வடிவ வெளியீடு மேற்கொள்ளப்படுவதாகக் கூறினார். “இந்திய ரசிகர்களின் இதயங்களில் ஸ்பைடர்-மேன் ஒரு சிறப்பான இடத்தைப் பிடித்துள்ளார்; ஒவ்வொரு புதிய பாகமும் பல தலைமுறை ரசிகர்களுக்கு ஒரு கூட்டு கொண்டாட்டமாக அமைகிறது. ‘ஸ்பைடர்-மேன்: பிராண்ட் நியூ டே’ படத்தின் மூலம், அந்த உற்சாகத்திற்கு ஈடு இணையான மிகச்சிறந்த திரையரங்கு அனுபவத்தை வழங்க விரும்பினோம். அதே வேளையில், ரசிகர்கள் முன்கூட்டியே டிக்கெட்டுகளை முன்பதிவு செய்து, படத்தின் அதிரடி, உணர்ச்சிகள் மற்றும் பிரம்மாண்டமான காட்சிகளைப் பிரீமியம் பெரிய திரை வடிவங்களில் அனுபவிக்கும் வாய்ப்பையும் நாங்கள் வழங்குகிறோம்,” என்று அவர் கூறினார். “‘Spider-Man: Brand New Day’ திரைப்படத்தைச் சுற்றியுள்ள உற்சாகம், இன்றைய காலக்கட்டத்தில் ரசிகர்கள் பிரம்மாண்டமான திரைப்படங்களை (blockbuster cinema) எவ்வாறு அனுபவிக்க விரும்புகிறார்கள் என்பதைப் பிரதிபலிக்கிறது. மிகப்பெரிய திரைப்படங்கள் மக்களை ஒன்றிணைக்கும் கலாச்சார நிகழ்வுகளாக மாறியுள்ளன; இது திரையரங்க அனுபவத்தை முன்னெப்போதையும் விட மிக முக்கியமானதாக மாற்றியுள்ளது. ‘Spider-Man’ உலகின் மிகவும் விரும்பப்படும் திரைப்படத் தொடர்களில் ஒன்றாகும், மேலும் இதன் ஒவ்வொரு புதிய பாகத்தையும் பல தலைமுறை ரசிகர்களும் ஆவலுடன் எதிர்பார்க்கின்றனர். மிகவும் எதிர்பார்க்கப்படும் இந்தப் பட வெளியீட்டிற்காக ‘Sony Pictures Entertainment India’-வுடன் இணைவதில் நாங்கள் மகிழ்ச்சியடைகிறோம். ரசிகர்கள் இந்தப் படத்தை அதற்கென உருவாக்கப்பட்ட சூழலில் – அதாவது பெரிய திரையில், சக ரசிகர்களுடன் இணைந்து – அனுபவிக்க ‘PVR INOX’ திரையரங்குகளுக்கு வருகை தருவதை ஆவலுடன் எதிர்பார்க்கிறோம்; அங்கு ஒவ்வொரு தருணமும் பிரம்மாண்டமாகவும், ஆழ்ந்த அனுபவத்தைத் தருவதாகவும், உண்மையிலேயே மறக்க முடியாததாகவும் அமையும்,” என்று ‘PVR INOX Limited’-ன் வருவாய் மற்றும் செயல்பாட்டுப் பிரிவு தலைமை நிர்வாக அதிகாரி (CEO) திரு. கௌதம் தத்தா கூறுகிறார்.

டெஸ்டின் டேனியல் கிரெட்டன் (Destin Daniel Cretton) இயக்கும் ‘Spider-Man: Brand New Day’ திரைப்படத்தில், பீட்டர் பார்க்கர்/ஸ்பைடர்-மேனாக டாம் ஹாலண்ட் (Tom Holland) நடிக்கிறார்; இவருடன் ஜெண்டயா (Zendaya), ஜேக்கப் பட்டலோன் (Jacob Batalon), ஜான் பெர்ன்தால் (Jon Bernthal) மற்றும் சேடி சிங்க் (Sadie Sink) ஆகியோரும் நடிக்கின்றனர்.

‘Sony Pictures Entertainment India’ நிறுவனம் ‘Spider-Man: Brand New Day’ திரைப்படத்தை 2026 ஜூலை 30 அன்று திரையரங்குகளில் வெளியிடுகிறது. இப்படம் ஆங்கிலம், இந்தி, தமிழ், தெலுங்கு, கன்னடம் மற்றும் மலையாளம் ஆகிய மொழிகளில், 2D மற்றும் 3D வடிவங்களிலும், அனைத்து பிரீமியம் பெரிய திரை வடிவங்களிலும் (premium large formats) வெளியிடப்படும்.

‘Spider-Man: Brand New Day’ பற்றிய குறிப்பு: பீட்டர் பார்க்கருக்கு இது ஒரு முற்றிலும் புதிய நாள் (Brand New Day). தன்னை நினைவில் கொள்ளாத உலகில் ஸ்பைடர்-மேனாக முழுநேரமும் குற்றங்களுக்கு எதிராகப் போராடுவது மற்றும் தன்னை விட்டுவிட்டுத் தங்கள் வாழ்க்கையைத் தொடரும் பழைய நண்பர்களைப் பார்க்கும் சூழல் ஆகியவை பீட்டரிடம் ஒரு மாற்றத்தை ஏற்படுத்துகின்றன; அந்த மாற்றத்தைக் கட்டுப்படுத்தும் ஆற்றல் அவனிடம் இல்லாமல் போகலாம். ஆனால், அந்த மாற்றமே நகரத்திற்கும் அவன் நேசிப்பவர்களுக்கும் ஏற்படவிருக்கும் அதிர்ச்சியூட்டும் புதிய அச்சுறுத்தலைத் தடுப்பதற்கான ஒரே வழியாகவும் அமையலாம் – அந்த அச்சுறுத்தல் யாராலும் பார்க்க முடியாத ஒரு சக்திவாய்ந்த வில்லனிடமிருந்து வருகிறது. உலகம் பீட்டர் பார்க்கரை மறந்திருக்கலாம், ஆனால் அவன் அவர்களை மறக்கவில்லை.

Sony Pictures Entertainment பற்றிய குறிப்பு: ‘Sony Pictures Entertainment’ (SPE) என்பது டோக்கியோவை மையமாகக் கொண்ட ‘Sony Group Corporation’-ன் துணை நிறுவனமாகும். SPE-யின் உலகளாவிய செயல்பாடுகளில் திரைப்படத் தயாரிப்பு, கையகப்படுத்தல் மற்றும் விநியோகம்; தொலைக்காட்சித் தயாரிப்பு, கையகப்படுத்தல் மற்றும் விநியோகம்; தொலைக்காட்சி நெட்வொர்க்குகள்; டிஜிட்டல் உள்ளடக்க உருவாக்கம் மற்றும் விநியோகம்; ஸ்டுடியோ வசதிகளை நிர்வகித்தல்; மற்றும் புதிய பொழுதுபோக்கு தயாரிப்புகள், சேவைகள் மற்றும் தொழில்நுட்பங்களின் மேம்பாடு ஆகியவை அடங்கும். ‘Sony Pictures Television’ உலகம் முழுவதும் டஜன் கணக்கான முழு உரிமையுள்ள அல்லது கூட்டு முயற்சியிலான தயாரிப்பு நிறுவனங்களை இயக்கி வருகிறது. SPE-யின் மோஷன் பிக்சர் குழுமத்தின் (Motion Picture Group) தயாரிப்பு நிறுவனங்களில் Columbia Pictures, Screen Gems, TriStar Pictures, 3000 Pictures, Sony Pictures Animation, Stage 6 Films, AFFIRM Films, Sony Pictures International Productions மற்றும் Sony Pictures Classics ஆகியவை அடங்கும். கூடுதல் தகவல்களுக்கு, http://www.sonypictures.com/corp/divisions.html என்ற இணையதளத்தைப் பார்வையிடவும்.