Breaking
November 21, 2026

Cinema

‘பிளாக் கோல்டு’ படத்தின் பத்திரிகையாளர் சந்திப்பு நிகழ்வு !!

உண்மைச் சம்பவங்களின் பின்னணியில் உருவாகியுள்ள ‘பிளாக் கோல்டு’ – நவம்பர் 13-ம் தேதி திரையரங்குகளில் வெளியாகிறது!

எம்.எம். ஸ்டூடியோஸ் சார்பில் எம். மூர்த்தி தயாரிப்பில், தீரன் அருண்குமார் இயக்கத்தில் நடிகர் வெற்றி கதாநாயகனாக நடித்துள்ள திரைப்படம் ‘பிளாக் கோல்டு’. இப்படத்தில் லிவிங்ஸ்டன், ப்ரியாலயா,துளசி, பிக்பாஸ் அபிராமி, ஏ.வெங்கடேஷ் உள்ளிட்ட பலர் முக்கிய கதாபாத்திரங்களில் நடித்துள்ளனர்.

யாருக்கும் தெரியாத பெரிய நிழல் வணிகம், ஒரு நடுத்தர குடும்பத்தைச் சேர்ந்த இளைஞனை   எவ்வாறு பாதிக்கிறது என்பதே இப்படத்தின் கதை.உண்மைச் சம்பவங்களின் அடிப்படையில் இப்படம் உருவாக்கப்பட்டிருப்பது கூடுதல் கவனம் பெற்றுள்ளது.

இப்படம் வரும் நவம்பர் 13-ம் தேதி திரையரங்குகளில் வெளியாகவுள்ள நிலையில், படத்தின் வெளியீட்டை முன்னிட்டு நடைபெற்ற பத்திரிகையாளர் சந்திப்பில் படக்குழுவினர் கலந்துகொண்டு படத்தின் உருவாக்கம், கதைக்களம், நட்சத்திரங்களின் பங்களிப்பு மற்றும் படப்பிடிப்பு அனுபவங்கள் குறித்து பகிர்ந்துகொண்டனர்.

இந்நிகழ்வினில்…,

தயாரிப்பாளர் எம். மூர்த்தி பேசியதாவது,

“நான் முதலில் நடிகராக வேண்டும் என்றுதான் சினிமாவுக்கு வந்தேன். இன்று தயாரிப்பாளராக உங்கள் முன்னால் நிற்கிறேன். இயக்குநர் தீரன் அருண்குமார் இந்தக் கதையை என்னிடம் சொன்னபோது, மிகவும் புதுமையான கதைக்களமாக இருந்தது. வேறு சில தயாரிப்பாளர்களிடமும் கதையைச் சொல்லியிருந்தாலும், அதிக காலம் எடுத்துக்கொண்டதால், இந்தப் படத்தைத் நானே தயாரிக்க சம்மதித்தேன். இந்தப் படம் உருவாக எனது முழு ஆதரவையும் கொடுத்தேன்.

இதுபோன்ற புதுமையான கதையைப் படமாக்கும்போது ரசிகர்களிடம் வரவேற்பு கிடைக்குமா என்ற தயக்கம் இருந்தது. ஆனால் எனது மனைவி, மகளிடம் கதையைப் பற்றிக் கூறியபோது, இது வித்தியாசமான முயற்சி என்றும், நம்மைச் சுற்றி நடக்கும் விஷயங்களைப் பேசும் கதை என்றும் ஊக்கமளித்தார்கள். இந்தப் படத்தை உருவாக்குவதில் கதாநாயகன் வெற்றியின் பங்களிப்பு மிக முக்கியமானது. மற்ற நடிகர்கள் மற்றும் தொழில்நுட்பக் கலைஞர்கள் அனைவரும் இரவு, பகல் பாராமல் மிகுந்த அர்ப்பணிப்புடன் பணியாற்றினார்கள்.

நான் இதுவரை ஆயிரக்கணக்கான படங்களை பார்த்திருப்பேன். அந்த அனுபவத்தில் சொல்கிறேன், ‘பிளாக் கோல்டு’ இந்திய சினிமாவில் ஒரு புதுமையான படமாக இருக்கும். படத்தின் மேக்கிங்கும் மிக சிறப்பாக வந்துள்ளது. ஒரு படத்தைச் சிறிய படம், பெரிய படம் என்று பார்ப்பதைவிட நல்ல படமா என்பதுதான் முக்கியம். இயக்குநர் ஏ. வெங்கடேஷ் உள்ளிட்ட அனைவரும் இந்தப் படத்தில் சிறப்பான கதாபாத்திரங்களில் நடித்துள்ளனர்.

இந்தப் படம் நிச்சயம் ரசிகர்களுக்குப் புதிய அனுபவத்தைக் கொடுக்கும். ஊடக நண்பர்கள், பத்திரிகையாளர்கள் மற்றும் யூடியூப் சேனல் நண்பர்கள் அனைவரும் இப்படத்திற்குத் தங்களது ஆதரவை வழங்க வேண்டும். இந்தப் படத்தைப் பற்றிய செய்திகளை மக்களிடம் கொண்டு சேர்க்க வேண்டும். அனைவருக்கும் நன்றி.”

இசையமைப்பாளர் கவாஸ்கர் அவினாஷ் பேசியதாவது,

“‘பிளாக் கோல்டு’ படக்குழு சார்பாக ஊடக நண்பர்கள், பத்திரிகையாளர்கள் மற்றும் யூடியூப் சேனல் நண்பர்கள் அனைவருக்கும் நன்றியைத் தெரிவித்துக் கொள்கிறேன். நடிகர் வெற்றியுடன் இது எனக்கு இரண்டாவது படம். அவர் இந்த மூன்று ஆண்டுகளில் ஏராளமான படங்களில் நடித்திருக்கிறார். ‘பிளாக் கோல்ட்’ படம் அவருக்குப் பெரிய திருப்புமுனையாக இருக்கும். நடிகை அபிராமியின் நடிப்புக்கு நான் ஏற்கெனவே ரசிகன். இந்தப் படத்தில் அவர் ஏற்றிருக்கும் துணிச்சலான காவல்துறை அதிகாரி கதாபாத்திரத்தில் மிகச் சிறப்பாக நடித்திருக்கிறார்.

இயக்குநர் ஏ. வெங்கடேஷ், ஜப்பான் குமார் உள்ளிட்டவர்களின் கதாபாத்திரங்களும் குறிப்பிடத்தக்கவை. குறிப்பாக, நகைச்சுவை கதாபாத்திரங்களில் பார்த்துப் பழகிய ஜப்பான் குமாரை இந்தப் படத்தில் முற்றிலும் மாறுபட்ட தீவிரமான கதாபாத்திரத்தில் பார்க்கலாம். நடிகர்கள் அனைவரும் இயல்பான நடிப்பை வெளிப்படுத்தியிருக்கிறார்கள். இந்தப் படத்திற்குப் பிறகு அவர்களைப் பார்க்கும் இயக்குநர்களின் பார்வையும் மாறும் என்று நம்புகிறேன்.

பாடலாசிரியர் மோகன் ராஜாவுடன் பணியாற்றியது மகிழ்ச்சியான அனுபவம். ‘வெங்காட்டு பூமி’ பாடலுக்காக அவர் எழுதிய வரிகளில் எந்தத் திருத்தமும் செய்யத் தேவையில்லை. அவருடைய எழுத்து எனக்கு மிகவும் பிடித்திருந்தது. பாடகர்கள் சைந்தவி, சத்யா கபூர், சத்யா பிரகாஷ், சஞ்சனா கல்மஞ்சி உள்ளிட்ட அனைவருக்கும் நன்றி. குறிப்பாக, சைந்தவி இந்தப் படத்தில் வழக்கமான பாணியிலிருந்து மாறுபட்டு உயர்ந்த ஸ்வரத்தில் பாடியிருப்பது சிறப்பு.

தயாரிப்பாளர் மூர்த்தி சாரின் ஆதரவு இல்லாமல் இந்தப் படம் சாத்தியமாகியிருக்காது. நல்ல கதையை தேர்வு செய்திருக்கிறார்.  இயக்குநர் தீரன் அருண்குமார் என்னுடைய ‘ஸ்மைல் மேன்’ படத்தைப் பார்த்துவிட்டு என்னைத் தொடர்புகொண்டு இந்தப் படத்திற்கு இசையமைக்க வாய்ப்பளித்தார். பெரிய இசையமைப்பாளர்களைப் பரிந்துரைத்தபோதும், கதைக்கும் களத்திற்கும் நான் பொருத்தமாக இருப்பேன் என்று நம்பி தேர்வு செய்தார். அதற்காக அவருக்கு நன்றி. தொடர்ந்து வெற்றி உள்ளிட்ட படக்குழுவினருடன் பல படங்களில் இணைந்து பணியாற்ற விரும்புகிறேன்.” நன்றி.

ஒளிப்பதிவாளர் சந்தோஷ் குமார் வீராசாமி பேசியதாவது,

“‘பிளாக் கோல்டு’ திரைப்படம் எனக்கு முதல் படம். இந்தப் படத்தில் பணியாற்ற வாய்ப்பளித்த இயக்குநர் தீரன் அருண்குமார் மற்றும் தயாரிப்பாளர் மூர்த்தி ஆகியோருக்கு எனது மனமார்ந்த நன்றியைத் தெரிவித்துக் கொள்கிறேன். இப்படத்தில் நடித்த அனைத்து நடிகர்களுக்கும், பணியாற்றிய தொழில்நுட்பக் கலைஞர்கள் அனைவருக்கும் எனது நன்றிகள். விரைவில் இதே இடத்தில் நடைபெறும் படத்தின் வெற்றிச் சந்திப்பில் மீண்டும் அனைவரையும் சந்திக்கிறேன். நன்றி, வணக்கம்.”

எடிட்டர் தினேஷ்குமார் பேசியதாவது,

“ஒரு கதையைத் தொடங்குவதில் இருந்து படம் வெளியாகி முடிவடையும் வரை நிறைய பேருடைய உழைப்பு இருக்கும். அந்த வகையில் ‘பிளாக் கோல்டு’ படத்தில் என்னுடைய பங்களிப்பும் இருப்பது மகிழ்ச்சியையும் திருப்தியையும் அளிக்கிறது. இந்தப் படத்தில் பணியாற்ற வாய்ப்பளித்த இயக்குநர் தீரன் அருண்குமார் அவர்களுக்கு நன்றி. எடிட்டிங்கில் எனக்கு முழுமையான சுதந்திரம் கொடுத்திருந்தார். முதலில் என்னுடைய பாணியில் ஒரு காட்சியை எடிட் செய்து கொடுத்த பிறகு, அதில் என்ன மாற்றங்கள் செய்யலாம் என்பதை மட்டுமே ஆலோசிப்போம். இதே சுதந்திரத்தை ஒளிப்பதிவாளர் மற்றும் இசையமைப்பாளருக்கும் அவர் வழங்கியிருந்தார்.

இயக்குநர், ஒளிப்பதிவாளர், இசையமைப்பாளர் மற்றும் உதவி இயக்குநர்கள் என அனைவருக்குள்ளும் நல்ல புரிதலும் ஒருங்கிணைப்பும் இருந்தது. ஒரு நல்ல படத்தைக் கொடுக்க வேண்டும், இன்னும் எப்படிச் சிறப்பாக உருவாக்கலாம் என்பதில்தான் எங்களுடைய கவனம் இருந்தது. தயாரிப்பாளர் மூர்த்தி சாரும் எங்களுக்கு முழுமையான ஆதரவு அளித்தார். பட்ஜெட் அல்லது வேறு கட்டுப்பாடுகள் குறித்து அதிகம் பேசாமல், படம் நன்றாக வருமா, நீங்கள் திருப்தியாக இருக்கிறீர்களா என்று மட்டுமே கேட்பார். அந்த ஆதரவு படத்தின் தரத்தை மேம்படுத்த உதவியது.

இந்தப் படத்தில் பணியாற்றும் வாய்ப்பையும் படக்குழுவினரிடம் என்னை அறிமுகப்படுத்தியதற்காகவும் துரை ப்ரோவுக்கு எனது தனிப்பட்ட நன்றியைத் தெரிவித்துக் கொள்கிறேன். மேலும், ஒரு நல்ல படம் அதிகமான ரசிகர்களைச் சென்றடைவதில் ஊடகங்களுக்கும் பத்திரிகையாளர்களுக்கும் முக்கியப் பங்கு இருக்கிறது. நீங்கள் அளிக்கும் ஆதரவும் பகிர்வும்தான் நல்ல படங்களை ரசிகர்களிடம் கொண்டு சேர்க்கிறது.

‘பிளாக் கோல்டு’ படத்தின் கதையிலோ, காட்சிகளிலோ எந்தவிதமான விஷயத்தையும் நாங்கள் முன்கூட்டியே வெளிப்படுத்தவில்லை. ரசிகர்கள் திரையரங்கில் பார்த்து அந்த ஆச்சரியத்தை அனுபவிக்க வேண்டும். படம் பார்த்துவிட்டு வெளியே வரும்போது ஒரு நல்ல படத்தைப் பார்த்த திருப்தியுடன் வருவீர்கள் என்று நம்புகிறேன். இப்படம் மேலும் மேலும் வெற்றிபெற வாழ்த்துகிறேன். நன்றி.”

பாடகர் ராம் பேசியதாவது,

“இங்கு வந்திருக்கும் பத்திரிகையாளர்கள், ஊடகவியலாளர்கள் மற்றும் நண்பர்கள் அனைவருக்கும் எனது வணக்கத்தைத் தெரிவித்துக் கொள்கிறேன். கடந்த 16 ஆண்டுகளாக என்டர்டெயின்மென்ட் துறையில் இயங்கி வருகிறேன். இசைப் பயிற்சிப் பள்ளி ஒன்றையும் நடத்தி வருகிறேன். அதில் சுமார் 20 மாணவர்கள் பயின்று வருகிறார்கள். அதேபோல், இன்டிபென்டன்ட் மியூசிக் துறையிலும் கடந்த 16 ஆண்டுகளாகப் பயணித்து வருகிறேன்.

இயக்குநர் தீரன் அருண்குமார் எனக்கு கடந்த நான்கு ஆண்டுகளாகப் பழக்கம். எடிசன் விருது விழாவில் நான் இசை நிகழ்ச்சி நடத்தியபோது அவரைச் சந்தித்தேன். அன்றிலிருந்து எங்களுக்குள் நல்ல நட்பு இருந்து வருகிறது. என்னுடைய இசைப் பயணம் மற்றும் முயற்சிகளை அவர் தொடர்ந்து கவனித்து வந்தார்.

என்னுடைய 16 ஆண்டுகால கனவை நனவாக்கும் வகையில் ‘பிளாக் கோல்டு’ திரைப்படத்தில் வாய்ப்பளித்த இயக்குநர் தீரன் அருண்குமார் மற்றும் தயாரிப்பாளர் மூர்த்தி ஆகிய இருவருக்கும் எனது மனமார்ந்த நன்றியைத் தெரிவித்துக் கொள்கிறேன். இந்தப் படத்தின் மூலம் எனது நீண்ட நாள் கனவு நிறைவேறியிருப்பது மிகுந்த மகிழ்ச்சியளிக்கிறது. அனைவருக்கும் நன்றி, வணக்கம்.”

பாடலாசிரியர் மோகன் ராஜன் பேசியதாவது,

“இயக்குநர் தீரன் அருண்குமார் இந்தப் படத்தின் கதையைச் சொன்னபோதே எனக்கு மிகவும் பிடித்துவிட்டது. ‘பிளாக் கோல்டு’ என்ற தலைப்பைக் கேட்டதும் மிளகு அல்லது நிலக்கரி என்று நினைக்கலாம். ஆனால் அதைத்தாண்டி தலைமுடியை மையமாகக் கொண்ட வித்தியாசமான கதைக்களம் இதில் இருக்கிறது. தலைமுடியைச் சுற்றியுள்ள வணிகம், அரசியல் எனப் பல விஷயங்களைப் படத்தில் பேசியிருக்கிறார்கள். சாதாரணமாக நாம் ஒரு விஷயமாகக் கடந்து செல்லும் தலைமுடிக்குப் பின்னால் இவ்வளவு பெரிய அறிவியல் மற்றும் வணிகப் பின்னணி இருப்பது ஆச்சரியமாக இருந்தது. அதைப் பற்றி மேலும் படிக்கவும் ஆராயவும் இந்தப் படம் தூண்டியது.

இந்தப் படத்தில் இரண்டு பாடல்களை எழுதியிருக்கிறேன். இசையமைப்பாளர் கவாஸ்கர் அவினாஷுடன் பணியாற்றியது மகிழ்ச்சியான அனுபவம். அவர் இசையமைத்த மெட்டுக்கு ஏற்ப வார்த்தைகளை மிகவும் கவனமாகப் பொருத்தி எழுத வேண்டியிருந்தது. குறிப்பாக, ‘தினம் தினம் நீ பார்க்கும் வரம் வாங்குவேன், மனதினில் அதை கோர்த்து உனைத் தாங்குவேன்’ என்ற வரிகள் எனக்கு மிகவும் பிடித்தமானவை. அதேபோல், ‘வெங்காட்டு பூமியிலே’ பாடலும் ஒரு கதையைச் சொல்லும் விதமாக அமைந்துள்ளது.

அந்தப் பாடலில் இடம்பெற்றுள்ள ‘வெங்காட்டு பூமியிலே புழுதிக் காற்று வீசுது, வெஞ்சோகம் நெஞ்சிலே பெருகிப் பாயுதே’, ‘மண்ணாளும் போகும் ஈரம் எழுதில் காய்வதில்லை, நெஞ்சோடு வாழும் நேசம் வலியில் வீழ்வதில்லை’ போன்ற வரிகளை எழுதியது மனநிறைவாக இருந்தது. மேலும், ‘பொல்லாத ஊருக்குள்ள சந்தேகம் குறையவில்லை, சொல்லாத விடுகதையில் விடை தெரியல ஏனோ’ என்ற வரிகளும் படத்தின் மர்மமான கதைக்களத்துடன் பொருந்தும்.

தலைமுடியை மையமாகக் கொண்டு உருவாக்கப்பட்டிருக்கும் இந்தப் படம் ரசிகர்களுக்கு நிச்சயம் மிகப்பெரிய ஆச்சரியத்தையும் பல திருப்பங்களையும் கொடுக்கும். நடிகர் வெற்றிக்கு இப்படம் வெற்றிப் படமாக அமைய வேண்டும். இயக்குநர் தீரன் அருண்குமார், இசையமைப்பாளர் கவாஸ்கர் அவினாஷ் மற்றும் படக்குழுவினர் அனைவருக்கும் என்னுடைய வாழ்த்துகள். இந்தப் படத்தில் பணியாற்றியது மகிழ்ச்சி. நன்றி.”

ஜே.ஆர். ரமேஷ் பேசியதாவது,

“ஊடக நண்பர்கள், பத்திரிகையாளர்கள் அனைவருக்கும் முதலில் எனது வணக்கத்தைத் தெரிவித்துக் கொள்கிறேன். இயக்குநர் தீரன் அருண்குமார் எனக்கு கடந்த ஐந்து ஆண்டுகளாகப் பழக்கம். அவ்வப்போது சந்தித்து அடுத்ததாக என்ன படம் செய்யப் போகிறீர்கள் என்று பேசிக்கொள்வோம்.

என்னுடைய அடிப்படைத் தொழில் தினமலர் விநியோகஸ்தராக இருப்பதுதான். திரைப்பட விநியோகம் தொடர்பான பணிகளிலும் ஈடுபட்டு வருகிறேன். தீரன் படம் எடுக்கப் போகிறேன் என்று கூறியபோது, என்ன படம் எடுக்கப் போகிறார் என்பதைத் தெரிந்துகொள்ள ஆர்வமாக இருந்தேன்.

அவருடைய அலுவலகத்துக்கு அடிக்கடி சென்று வந்த நிலையில், இந்தப் படத்தின் விநியோகப் பணிகளிலும் என்னால் ஈடுபட முடிந்தது மகிழ்ச்சியாக இருக்கிறது. ‘பிளாக் கோல்டு’ படத்துடன் இணைந்து பணியாற்றும் வாய்ப்பளித்த இயக்குநர் மற்றும் தயாரிப்பாளருக்கு எனது நன்றியைத் தெரிவித்துக் கொள்கிறேன். நன்றி.”

விநியோகஸ்தர் ஆதவா பேசியதாவது,

“இங்கு வந்திருக்கும் பத்திரிகை மற்றும் ஊடக நண்பர்கள் அனைவருக்கும் எனது வணக்கத்தைத் தெரிவித்துக் கொள்கிறேன். ‘பிளாக் கோல்டு’ படத்தின் விநியோக உரிமையை எங்களுக்கு வழங்கிய தயாரிப்பாளர் மூர்த்தி சாருக்கு எனது நன்றியைத் தெரிவித்துக் கொள்கிறேன். எனது நண்பர் இயக்குநர் தீரன் அருண்குமார் ஏற்கெனவே வெற்றியைச் சந்தித்துள்ளார். இந்தப் படமும் வெற்றிபெற ஊடக நண்பர்கள் அனைவரும் ஆதரவு தர வேண்டும் என்று கேட்டுக்கொள்கிறேன்.

சமீபத்தில் வெளியான ‘மண்டாடி’ படத்தில் இடம்பெறும் ஒரு வசனம் நினைவுக்கு வருகிறது. நம்முடைய முன்னோர்கள் காற்றையும் கடலையும் நம்பி வாழ்ந்தவர்கள் என்பதால், அவை ஒருபோதும் நம்மைக் கைவிடாது என்ற கருத்து அதில் இடம்பெற்றிருக்கும். அதேபோல், தீரன் அருண்குமார் சினிமாவைத் தனது மூச்சாகச் சுவாசித்துக் கொண்டிருக்கிறார். எனவே, இந்தத் திரையுலகமும் ஊடகங்களும் அவரைக் கைவிடாது என்று நம்புகிறேன். அவர் தொடர்ந்து பல வெற்றிப் படங்களை வழங்க என்னுடைய வாழ்த்துகள்.

மேலும், தயாரிப்பாளர் மூர்த்தி சாரைப் பற்றியும் குறிப்பிட வேண்டும். ‘ஜெயிலர் 2’ படத்தில் மூர்த்தி என்ற பெயர் பேசப்பட்டது. ஆனால் இந்தப் படத்தைப் பொறுத்தவரை அனைத்தும்  எங்களுடைய மூர்த்தி அண்ணன்தான். அவருடன் இணைந்து பணியாற்றுவதில் பெருமைப்படுகிறோம். ‘பிளாக் கோல்டு’ திரைப்படம் வெற்றிபெற அனைவரும் ஆதரவு தர வேண்டும். நன்றி.”

இப்ராஹிம்  பேசியதாவது,

“இங்கு வந்திருக்கும் அனைவருக்கும் என்னுடைய வணக்கத்தைத் தெரிவித்துக் கொள்கிறேன். நான் சென்னைக்கு ஒரு வியாபார விஷயமாக வந்திருந்தபோது, ரமேஷ் சார் என்னைச் சந்தித்து, இயக்குநர் தீரன் அருண்குமார் தனது நண்பர் என்றும், அவர் ஒரு நல்ல படம் இயக்கியிருப்பதாகவும் கூறி பார்க்க அழைத்தார். அப்போது நேரமில்லாததால் என்னால் பார்க்க முடியவில்லை. பின்னர் இயக்குநர் தனது முதல் படமான ‘தீர்ப்புகள் விற்கப்படும்’ படத்தை எனக்கு அனுப்பி வைத்தார். சத்யராஜ் நடித்த அந்தப் படத்தைப் பார்த்தபோது, ஒவ்வொரு காட்சியும் ரசிக்கும்படியாக இருந்தது.

எனக்கு இப்போது 60 வயதாகிறது. என்னுடைய 21 வயதில் சினிமாவில் நடிக்க வேண்டும் என்ற ஆசையில் ஊரை விட்டு சென்னைக்கு வந்தேன். ஆனால் சினிமாவில் நுழைய முடியாமல் பல கஷ்டங்களைச் சந்தித்தேன். கையில் இரண்டு ரூபாய் கூட இல்லாமல், பேருந்தில் பயணம் செய்யக்கூட முடியாத சூழ்நிலையிலும் இருந்திருக்கிறேன். சினிமாவில் வாய்ப்பு கிடைக்காததால் சுமார் 20 ஆண்டுகளுக்குப் பிறகு மீண்டும் ஊருக்கே திரும்பிச் சென்றேன். இருந்தாலும் சினிமாவில் சாதிக்க வேண்டும் என்ற ஆசையை மட்டும் ஒருபோதும் கைவிடவில்லை.

இப்போது மீண்டும் சினிமாவுக்குள் வந்திருக்கிறேன். எனக்கான தகுதியையும் அனுபவத்தையும் வளர்த்துக் கொண்டு, இயக்குநர் தீரன் அருண்குமாருடன் இணைந்து படங்களைத் தயாரிக்கவும் திட்டமிட்டிருக்கிறேன். ‘பிளாக் கோல்டு’ படத்தின் விநியோக உரிமையையும் பெற்றிருக்கிறேன். நிச்சயமாக நானும் திரைப்படங்களைத் தயாரிப்பேன்.

சினிமா என்னை வாழவைக்கும் என்ற நம்பிக்கை எனக்கு இருக்கிறது.

என்னைப் போல சினிமாவில் சாதிக்க வேண்டும் என்று ஆசைப்பட்டு, பல கஷ்டங்களால் ஊருக்குத் திரும்பியவர்கள் ஏராளமானோர் இருக்கிறார்கள். அவர்களுக்கு மீண்டும் ஒரு வாய்ப்பு கிடைக்க வேண்டும். ஒரு திரைப்படத்தை மக்களிடம் கொண்டு சேர்த்து, அதை வாழ வைக்கும் சக்தி பத்திரிகையாளர்கள் மற்றும் ஊடக நண்பர்களின் கைகளில்தான் இருக்கிறது. என்னைப் போன்றவர்களின் முயற்சிகளுக்கும் நீங்கள் ஆதரவு அளிக்க வேண்டும். நன்றி, வணக்கம்.”

ஜனீஷ் பேசியதாவது,

“தயாரிப்பாளர் மூர்த்தி சார் மிகவும் நேர்மையானவர், வெளிப்படையாகப் பேசக்கூடியவர். இந்தப் படத்தின் படப்பிடிப்பு பாதியில் இருந்தபோதுதான் அவருடன் எனக்குப் பழக்கம் ஏற்பட்டது. ஆனால் படத்தின் வெளியீடு வரை எங்களுடன் பயணிக்க வேண்டும் என்ற ஆர்வத்துடன் அவர் தொடர்ந்து ஆதரவளித்தார். இந்தப் படத்தில் என்னுடைய பங்களிப்பும் இருப்பதை மகிழ்ச்சியுடன் தெரிவித்துக் கொள்கிறேன்.

இயக்குநர், எக்ஸிகியூட்டிவ் புரொடியூசர் மற்றும் அலுவலகத்தில் பணியாற்றிய அனைவரும் மிகவும் சுறுசுறுப்பாகச் செயல்பட்டார்கள். பல தொழில்நுட்பக் கலைஞர்கள் தங்களுடைய ஆரம்பகட்டப் பயணத்தில் இருந்தாலும், அனைவரும் தங்களால் முடிந்த சிறந்த உழைப்பைக் கொடுத்திருக்கிறார்கள். இயக்குநர் ஒவ்வொரு விஷயத்திலும் மிகுந்த மெனக்கெடல் எடுத்திருப்பது படத்தைப் பார்க்கும்போது தெரிகிறது. இந்தப் படம் இயக்குநருக்கும் தொழில்நுட்பக் கலைஞர்கள் அனைவருக்கும் அடுத்தகட்ட வளர்ச்சியைப் பெற்றுத் தர வேண்டும் என்று வாழ்த்துகிறேன்.

ஏ. வெங்கடேஷ், லிவிங்ஸ்டன் உள்ளிட்ட அனுபவமிக்க கலைஞர்களிலிருந்து வெற்றி வரை அனைவரும் தங்களுடைய நேரத்தை ஒதுக்கி படத்தின் விளம்பர நிகழ்ச்சிகளிலும் கலந்துகொண்டது மகிழ்ச்சியளிக்கிறது. இந்தப் படம் ரசிகர்களுக்குச் சிறந்த திரையரங்க அனுபவத்தைக் கொடுக்கும். ஒரு கருத்தைச் சொல்வதைத் தாண்டி, முழுமையான பொழுதுபோக்குப் படமாகவும் நிச்சயம் இருக்கும்.

விரைவில் திரையரங்குகளில் வெளியாகவுள்ள ‘பிளாக் கோல்டு’ படத்திற்கு திரையரங்குகள் மட்டுமின்றி மற்ற வணிகப் பிரிவுகளிலும் நல்ல வரவேற்பு கிடைத்து வருவது மகிழ்ச்சியாக இருக்கிறது. இந்தப் படத்தின் வெற்றிக்கு ஊடக நண்பர்கள் தொடர்ந்து ஆதரவு அளிக்க வேண்டும். அனைவருக்கும் நன்றி.”

நடிகர் ஜப்பான் குமார் பேசியதாவது,

“இந்தப் படத்தில் ஒரு சிறிய கதாபாத்திரத்தில் நடிக்க இயக்குநர் தீரன் அருண்குமார் என்னை அழைத்துப் பேசினார். நான் இதுவரை சிறிய காமெடி கதாபாத்திரங்களில்தான் நடித்து வருகிறேன் என்று கூறினேன். ஆனால், இந்தக் கதாபாத்திரத்தில் நான் நடித்தால் நன்றாக இருக்கும் என்று அவர் நம்பிக்கையுடன் கூறினார். அவருடைய நம்பிக்கைக்காகவே இந்தப் படத்தில் நடிக்கச் சம்மதித்தேன்.

இந்தப் படம் எப்படி வந்திருக்கிறது என்பதைவிட, படத்தைப் பார்த்தவர்கள் நன்றாக இருக்கிறது என்று சொல்வதைக் கேட்கும்போது மகிழ்ச்சியாக இருக்கிறது. ஆனால், இந்தப் படத்தை வெற்றிபெறச் செய்வது உங்கள் கைகளில்தான் இருக்கிறது. இதுபோன்ற தயாரிப்பாளர்களுக்கும் இயக்குநர்களுக்கும் ஊடக நண்பர்களும் ரசிகர்களும்தான் தொடர்ந்து ஆதரவு அளிக்க வேண்டும்.

இப்போதெல்லாம் சிறிய படங்கள் நன்றாக இருந்தாலும், திரையரங்குகளில் அவற்றைப் பார்க்க ரசிகர்கள் வருவது குறைவாக இருக்கிறது. சில நேரங்களில் நல்ல படங்களாக இருந்தாலும் விரைவிலேயே திரையரங்குகளில் இருந்து எடுக்கப்பட்டு விடுகின்றன. எனவே, ‘பிளாக் கோல்டு’ படத்திற்கு அனைவரும் ஆதரவு அளித்து வெற்றிபெறச் செய்ய வேண்டும். அனைவருக்கும் நன்றி.”

நடிகர் கராத்தே வெங்கடேஷ் பேசியதாவது,

“இந்தப் படக்குழுவில் இடம்பெற்றுள்ள மூத்த கலைஞர்கள், இளம் கலைஞர்கள், தொழில்நுட்பக் கலைஞர்கள் உள்ளிட்ட அனைவருக்கும் என்னுடைய நன்றியையும் வாழ்த்துகளையும் தெரிவித்துக் கொள்கிறேன். இயக்குநர் தீரன் அருண்குமார் என்னிடம் முதலில் கதையைச் சொன்னபோதே, எனக்கு ஒரு வித்தியாசமான கதாபாத்திரம் கொடுத்திருந்தார். குறிப்பாக, உயிரைப் பறிக்கும் கதாபாத்திரமாக இருந்தால்தான் உங்களுக்கு நன்றாக இருக்கும் என்று கூறினார்.

‘பரியேறும் பெருமாள்’ படத்திற்குப் பிறகு இதுபோன்ற கதாபாத்திரங்களில் நடிக்கும் வாய்ப்பு மீண்டும் கிடைத்திருக்கிறது. இயக்குநர் என்ன சொன்னாலும் அதைச் செய்யத் தயாராக இருக்கிறேன். இந்தப் படத்திலும் இரண்டு, மூன்று உயிர்களை எடுத்திருக்கிறோம். அதை ரசிகர்கள் திரையில் பார்த்து ரசிப்பார்கள் என்று நம்புகிறேன். அனைவரும் ‘பிளாக் கோல்டு’ படத்திற்கு ஆதரவு அளித்து வெற்றிபெறச் செய்ய வேண்டும். நன்றி.”

நடிகர் டெலிபோன் ராஜ் பேசியதாவது,

“எல்லாப் படங்களுக்கும் படப்பிடிப்புக்குச் செல்வதைப் போலத்தான் இந்தப் படத்திற்கும் சென்றேன். ஆனால், இதில் எனக்குக் கொடுக்கப்பட்ட கதாபாத்திரம் சற்று வித்தியாசமானது. ஒரு சிறிய கதாபாத்திரமாக இருந்தாலும், அதில் ஒரு முக்கியமான விஷயம் இருந்தது. இயக்குநர் தீரன் அருண்குமார் மிகவும் பொறுமையாக, ஒரு குழந்தைக்குச் சொல்லிக் கொடுப்பதைப் போல எனக்குக் காட்சிகளை விளக்கிக் கொடுத்தது மிகவும் பிடித்திருந்தது.

படப்பிடிப்பிலும் டப்பிங் பணியின்போதும் ஒவ்வொரு கதாபாத்திரத்தையும் பார்த்து ஆச்சரியப்பட்டேன். ஒவ்வொரு நடிகரையும் அந்தந்தக் கதாபாத்திரத்திற்குப் பொருத்தமாகத் தேர்வு செய்திருக்கிறார்கள். சில கதாபாத்திரங்களின் தோற்றத்தைப் பார்த்தபோது எனக்கே பயமாக இருந்தது. அந்த அளவுக்கு ஒவ்வொருவருடைய தோற்றமும் கதாபாத்திரங்களும் வித்தியாசமாக அமைந்துள்ளன.

நடிகர் வெற்றியைப் பார்க்கும்போது மிகவும் மென்மையான, சாக்லேட் பாய் போன்ற தோற்றத்தில் இருக்கிறார். அவருடைய படங்கள் தொடர்ந்து வெற்றிபெற்று வருகின்றன. அந்த வரிசையில் ‘பிளாக் கோல்டு’ படமும் நிச்சயம் வெற்றிபெறும் என்று நம்புகிறேன். தயாரிப்பாளர் மூர்த்தி மிகவும் நல்ல மனிதர். எனக்கும் நல்ல முறையில் சம்பளம் வழங்கினார். இந்தப் படத்தில் பணியாற்றிய அனைவருக்கும் என்னுடைய வாழ்த்துகள். ஊடக நண்பர்கள் அனைவரும் படத்திற்கு ஆதரவு அளிக்க வேண்டும். நன்றி.”

நடிகை சபீதா ராய் பேசியதாவது,

“இங்கு வந்திருக்கும் திரைப்பட உறவுகளுக்கும், பத்திரிகையாளர்கள் மற்றும் ஊடக நண்பர்கள் அனைவருக்கும் என்னுடைய மாலை வணக்கத்தைத் தெரிவித்துக் கொள்கிறேன். பல ஆண்டுகளாக சினிமாவை நேசித்து, அதில் ஒரு நல்ல வாய்ப்புக்காகப் போராடி வருகிறேன். அந்த வகையில் ‘பிளாக் கோல்டு’ திரைப்படம் எனக்கு ஒரு முக்கியமான மேடையாக அமைந்துள்ளது. இந்தப் படத்தில் மல்லி என்ற கதாபாத்திரத்தில் நடித்திருக்கிறேன். இந்தப் படத்திற்குப் பிறகு மல்லி என்ற கதாபாத்திரத்தின் மூலம் எனக்கு நல்ல அங்கீகாரம் கிடைக்கும் என்று நம்புகிறேன். வாய்ப்பளித்த இயக்குநர் தீரன் அருண்குமாருக்கு எனது மனமார்ந்த நன்றி.

இயக்குநர் தீரன் அருண்குமார் ஒரு சிறந்த கேப்டன். எவ்வளவு பரபரப்பான சூழ்நிலையாக இருந்தாலும் மிகவும் அமைதியாகவும் பொறுமையாகவும் செயல்படுவார். படப்பிடிப்புத் தளத்தில் அனைவரையும் இயல்பாகவும் மகிழ்ச்சியாகவும் வைத்திருப்பார். அவருடைய இயக்கத்தில் உருவாகியுள்ள இந்தப் படம் அவருக்கு மிகப்பெரிய வெற்றியைத் தரும் என்று நம்புகிறேன். ஒளிப்பதிவாளர் சந்தோஷ் குமார் வீராசாமியின் பணி மிகவும் சிறப்பாக இருக்கிறது. தமிழ் சினிமாவில் அவர் முக்கியமான ஒளிப்பதிவாளராக வருவார் என்ற நம்பிக்கை எனக்கு இருக்கிறது.

நடிகர் வெற்றி படப்பிடிப்புத் தளத்தில் மிகவும் எளிமையாகவும் அமைதியாகவும் இருப்பார். ஆனால் கேமரா முன்பு நடிக்கும்போது அவருடைய நடிப்பும் ஹீரோயிசமும் வியக்க வைக்கும். நடிகர் ஏ. வெங்கடேஷுடன் இணைந்து நடிக்க வேண்டும் என்பது எனது நீண்ட நாள் ஆசை. இந்தப் படத்தின் மூலம் அந்த வாய்ப்பு கிடைத்தது மகிழ்ச்சி. அதேபோல், என்னுடைய கதாபாத்திரத்துடன் தொடர்புடைய நைனா கதாபாத்திரத்தில் நடித்த அருள் சங்கருடனும் நல்ல நட்பு உருவாகியுள்ளது. தயாரிப்பாளர் மூர்த்தி போன்ற ஆதரவான தயாரிப்பாளர்கள் தமிழ் சினிமாவுக்குக் கிடைப்பது உண்மையிலேயே ஒரு வரம். இசையமைப்பாளர் கவாஸ்கர் அவினாஷ், பாடலாசிரியர் மோகன் ராஜா உள்ளிட்ட தொழில்நுட்பக் கலைஞர்கள் அனைவருக்கும் நன்றி.

சிறிய படம், பெரிய படம் என்று இனிமேல் படங்களைப் பிரித்துப் பார்க்க வேண்டாம். சிறிய படங்கள்தான் இன்றைக்குப் பல வெற்றிகளையும் சாதனைகளையும் படைத்து வருகின்றன. நல்ல கதையும் உழைப்பும் இருந்தால் எந்தப் படமும் பெரிய வெற்றியைப் பெற முடியும். ‘பிளாக் கோல்டு’ படமும் ரசிகர்களுக்குப் பிடித்தமான படமாக இருக்கும் என்று நம்புகிறேன். வரும் நவம்பர் 13-ம் தேதி திரையரங்குகளில் வெளியாகும் இப்படத்திற்கு அனைவரும் ஆதரவு அளித்து வெற்றிபெறச் செய்ய வேண்டும். நன்றி.”

இயக்குநரும் நடிகருமான ஏ. வெங்கடேஷ் பேசியதாவது,

“இங்கு வந்திருக்கும் பத்திரிகை மற்றும் ஊடக நண்பர்கள் அனைவருக்கும் என்னுடைய மாலை வணக்கத்தைத் தெரிவித்துக் கொள்கிறேன். இந்தப் படத்தை வெளியிடும் ஆதவா ரமேஷ், ஆகியோருக்கு முதலில் நன்றி.

 ‘பிளாக் கோல்டு’ முழுக்க முழுக்க இயக்குநர் தீரன் அருண்குமாரின் படைப்பு. ஒரு நாள் செய்தித்தாளில் தலைமுடி தொடர்பான ஒரு செய்தியைப் படித்தபோது, அதை வைத்து ஒரு திரைப்படம் உருவாக்கலாம் என்று நான் நினைத்தேன். சில நாட்களுக்குப் பிறகு தீரன் இந்தப் படத்தின் கதையைச் சொன்னபோது, நான் படித்த அதே செய்தியின் பின்னணியில் கதையை உருவாக்கியிருப்பதை அறிந்து ஆச்சரியப்பட்டேன். இதுவரை தமிழ் சினிமாவில் பேசப்படாத ஒரு விஷயத்தைப் புதுமையான முறையில் அணுகியிருக்கிறார். ‘பிளாக் கோல்டு’ என்ற தலைப்பும் கதைக்கு மிகவும் பொருத்தமாக இருக்கிறது.

ஒரு படத்தின் வெற்றிக்கு முக்கியமானது சரியான நடிகர் தேர்வு. அந்த வகையில் தீரன் இந்தப் படத்தில் ஒவ்வொரு கதாபாத்திரத்திற்கும் பொருத்தமான நடிகர்களைத் தேர்வு செய்திருக்கிறார். குறிப்பாக, அருள் டி. சங்கர் உள்ளிட்ட நடிகர்களின் தேர்வு சிறப்பாக அமைந்துள்ளது. அபிராமி, சபீதா ராய், ஜப்பான் குமார் உள்ளிட்ட அனைவரும் தங்களுடைய கதாபாத்திரங்களுக்கு நியாயம் செய்திருக்கிறார்கள். கதாநாயகன் வெற்றி மிகவும் அமைதியானவர். ஆனால் கேமரா முன்பு அவருடைய நடிப்பு வியக்க வைக்கும். என்னுடன் இணைந்து நடித்த காட்சியிலும் மிகக் குறைவான ரியாக்ஷன்களைக் கொண்டே சிறப்பான நடிப்பை வெளிப்படுத்தியிருந்தார். ஒளிப்பதிவாளர் சந்தோஷ் குமார் வீராசாமி, தயாரிப்பின் தேவைகளையும் இயக்குநரின் எதிர்பார்ப்பையும் சமநிலைப்படுத்தி சிறப்பாகப் பணியாற்றியிருக்கிறார். எடிட்டர் தினேஷ்குமாரின் பணியும் சிறப்பாக உள்ளது. இசையமைப்பாளர் கவாஸ்கர் அவினாஷ் இசையிலும் பாடல்களிலும் நல்ல பங்களிப்பைக் கொடுத்திருக்கிறார். பாடலாசிரியர் மோகன் ராஜாவின் வரிகளும் குறிப்பிடத்தக்கவை.

தயாரிப்பாளர் மூர்த்தி சாருக்கு நன்றி சொல்வதுடன், இந்தப் படத்தை உருவாக்குவதற்கு ஊக்கமளித்த அவரது மனைவி மற்றும் மகளுக்கும் நன்றி தெரிவிக்க வேண்டும். அவர்களுடைய ஆதரவும் இந்தப் படம் உருவாக முக்கியக் காரணமாக இருந்திருக்கிறது. இயக்குநர் தீரன் இந்தப் படத்திற்காக ஆரம்பம் முதல் இன்றுவரை எவ்வளவு உழைத்திருக்கிறார் என்பதை நான் நேரடியாகப் பார்த்திருக்கிறேன். இது அவருக்கு இரண்டாவது படம் என்றாலும், முதல் படம் போலவே மிகுந்த அர்ப்பணிப்புடன் பணியாற்றியிருக்கிறார். படத்தின் உருவாக்கத்தில் ஒவ்வொரு கட்டத்திலும் அவர் எடுத்துக்கொண்ட முயற்சிகள் பாராட்டுக்குரியவை.

நான் இன்னும் முழுப் படத்தையும் பார்க்கவில்லை. எனது காட்சிகளை மட்டுமே பார்த்திருக்கிறேன். இருந்தாலும் கதையின் மீது எனக்கு மிகப்பெரிய நம்பிக்கை இருக்கிறது. இறைவனின் அருளாலும், இயற்கையின் துணையாலும், ஊடக நண்பர்கள் மற்றும் ரசிகர்களின் ஆதரவாலும் ‘பிளாக் கோல்டு’ திரைப்படம் மிகப்பெரிய அளவில் ரசிகர்களைச் சென்றடைய வேண்டும் என்று விரும்புகிறேன். அனைவருக்கும் நன்றி.”

நடிகர் அருள் டி. சங்கர் பேசியதாவது,

சினிமாவில் எனது 16 ஆண்டுகால பயணத்தில் பல்வேறு கதாபாத்திரங்களில் நடித்திருக்கிறேன். ஆனால் ‘பிளாக் கோல்டு’ திரைப்படம் எனக்கு மிகவும் முக்கியமான படம். ஒரு டூயட் பாடல் இல்லாமல், என்னை எந்த மாதிரியான கதாபாத்திரத்தில் வேண்டுமானாலும் வெளிப்படுத்துங்கள் என்று இயக்குநர் தீரணிடம் கூறினேன். அதற்கேற்ற வகையில் நைனா ராஜா என்ற கதாபாத்திரத்தை அவர் உருவாக்கியிருக்கிறார். இதுவரை ஊடகங்களிடம் எனக்காக எழுதும்படி கேட்டதில்லை. ஆனால் முதல்முறையாக, இந்தப் படத்தில் எனது நடிப்பு நன்றாக இருந்தால் அதைப் பற்றி எழுதுங்கள் என்று கேட்டுக்கொள்கிறேன்.

தயாரிப்பாளர் மூர்த்தி ஒரு சிறந்த தயாரிப்பாளர். முறையான திட்டமிடலும், சினிமா மீதான கலை உணர்வும் கொண்டவர். படத்தை ஒரு நடிகராகத் தொடங்கி இந்த நிலைக்குக் கொண்டு வந்திருப்பது பாராட்டுக்குரியது. உடன் நடித்த ஷீபானு, சபீதா ராய், ஏ. வெங்கடேஷ், வெற்றி, டெலிபோன் ராஜ், ஜப்பான் குமார் உள்ளிட்ட அனைவரும் சிறப்பாக நடித்துள்ளனர். குறிப்பாக வெற்றி மிகவும் அமைதியான, நேர்மையான மனிதர். ஒரு கதாபாத்திரத்தின் எல்லையைத் தாண்டி அவர் தலையிடுவதில்லை. இயக்குநர் என்ன நினைக்கிறாரோ அதைச் செயல்படுத்துவதுதான் தனது வேலை என்பதில் தெளிவாக இருக்கிறார். ஏ. வெங்கடேஷ் சாரின் நடிப்பும், சக நடிகர்களுடன் பணியாற்றிய அனுபவமும் மகிழ்ச்சியாக இருந்தது. கவாஸ்கர் அவினாஷின் இசையில் ‘வெங்காட்டு’ பாடல் மனதைத் தொடும் வகையில் அமைந்துள்ளது.

இந்தப் படத்தில் எனக்கு நைனா ராஜா கதாபாத்திரம் கிடைத்ததே ஒரு சுவாரசியமான அனுபவம். மாதங்கி மூலம் இயக்குநர் தீரன் அறிமுகமானார். அவருடைய முந்தைய படத்தைப் பார்த்த பிறகு, ஆறு மாதங்கள் கழித்து என்னை அழைத்துக் கதை சொன்னார். கதாபாத்திரத்தின் தோற்றம் முதல் நெற்றியில் வைக்கும் செந்தூரம், அணியும் ஆபரணங்கள் வரை ஒவ்வொன்றையும் மிக நுணுக்கமாகத் திட்டமிட்டு உருவாக்கியிருந்தார். அந்தத் தோற்றத்திற்காக மேக்கப் கலைஞர் உமாசங்கருடன் இணைந்து பல முயற்சிகள் மேற்கொண்டோம். சண்டைக் காட்சிகளுக்காக ஸ்டண்ட் மாஸ்டர் மெட்ரோ மகேஷிடம் ஏழு நாட்கள் முறையான பயிற்சியும் பெற்றேன். இயக்குநரும் உதவி இயக்குநர்களும் பயிற்சியின்போது உடனிருந்து ஊக்கமளித்தது மறக்க முடியாத அனுபவம்.

இயக்குநர் தீரனின் எழுத்து எனக்கு மிகவும் பிடித்திருக்கிறது. வசனங்களை மனப்பாடம் செய்ய வேண்டிய அவசியமே இல்லாத அளவுக்கு இயல்பாகவும், எளிதில் தொடர்புபடுத்திக்கொள்ளும் வகையிலும் அவர் எழுதியிருக்கிறார். படத்தின் முன்திட்டமிடலும் மிகச் சிறப்பாக இருந்தது. குறைந்த கால்ஷீட்டில் பல காட்சிகளைப் படமாக்கியிருப்பது அவரது திட்டமிடலுக்குச் சான்று. சில கட்டுப்பாடுகளுக்கு மத்தியிலும் படக்குழுவினர் மிகுந்த உழைப்பைக் கொடுத்திருக்கிறார்கள். எனது கதாபாத்திரம் சிறப்பாக வந்திருக்கிறது என்ற நம்பிக்கை இருக்கிறது. இயக்குநர் தீரன் இன்னும் ஐந்து ஆண்டுகளில் தமிழ் சினிமாவின் முன்னணி மூன்று இயக்குநர்களில் ஒருவராக இருப்பார் என்று நம்புகிறேன். இந்தப் படத்திற்கும் எனது நடிப்பிற்கும் ஊடகங்கள் ஆதரவு அளிக்க வேண்டும். நன்றி.

எக்ஸிகியூட்டிவ் புரொடியூசர் கலை பேசியதாவது,

தயாரிப்பாளர் மூர்த்தி சார் பல நிறுவனங்களிடம் இந்தக் கதையைச் சொல்லியும், அதன் வித்தியாசமான களத்தைக் கருத்தில் கொண்டு யாரும் தயாரிக்க முன்வரவில்லை. அப்போது இயக்குநர் தீரன் அருண்குமார் எங்களிடம் வந்து கதையைச் சொன்னார். கதை பிடித்திருந்ததால் மூர்த்தி சார் தனது மனைவி, மகளிடம் ஆலோசித்து இப்படத்தைத் தயாரிக்க முடிவெடுத்தார். அதன் விளைவாகத்தான் இன்று ‘பிளாக் கோல்டு’ திரைப்படம் உங்கள் முன்னால் நிற்கிறது. படத்தின் தலைப்புக்குப் பின்னால் இருக்கும் அர்த்தம் என்ன என்பதைப் படம் பார்க்கும்போது தெரிந்துகொள்வீர்கள்.

நடிகர் வெற்றி படப்பிடிப்புக்கு எப்போதும் குறித்த நேரத்திற்கு முன்பாகவே வந்து தயாராகக் காத்திருப்பார். ஏ. வெங்கடேஷ், கராத்தே வெங்கடேஷ், ஸ்ரீபா, கிருஷ்டி, அருள் டி. சங்கர், வியாழக்காரன் உள்ளிட்ட நடிகர்கள் அனைவரும் சிறப்பாகப் பணியாற்றினார்கள். இசையமைப்பாளர் கவாஸ்கர் அவினாஷ் மூன்று பாடல்களையும் சிறப்பாக அமைத்துள்ளார். ஒளிப்பதிவாளர் சந்தோஷ் குமார் தனது முதல் படமாக இருந்தாலும் சிறப்பான பங்களிப்பை வழங்கியுள்ளார். எடிட்டர் தினேஷ் மற்றும் இயக்குநர் இணைந்து மிகுந்த ஈடுபாட்டுடன் பணியாற்றினர். ஸ்டண்ட் மாஸ்டர் மெட்ரோ மகேஷ், நடன இயக்குநர் ரிச் சாம்சன் உள்ளிட்ட அனைத்து தொழில்நுட்பக் கலைஞர்களுக்கும் எங்கள் நன்றியைத் தெரிவித்துக்கொள்கிறேன்.

நடிகரும் தயாரிப்பாளருமான மூர்த்தி சார் எப்போதும் நேர்மறையாகப் பேசக்கூடியவர். இயக்குநர் கேட்ட அனைத்து விஷயங்களையும் செய்து கொடுத்து, படத்தின் உருவாக்கத்திற்கு முழு ஆதரவு அளித்தார். இயக்குநர் தீரன் அருண்குமார் இந்தப் படத்தின் கதையை எழுதி, திரைக்கதை, வசனம் அமைத்து இயக்கியிருக்கிறார். படத்தின் போஸ்ட் புரொடக்‌ஷன் பணிகள் ஒரே நேரத்தில் மூன்று இடங்களில் நடைபெற்றபோதும், அவர் பைக்கிலேயே ஒவ்வொரு இடத்திற்கும் சென்று தொழில்நுட்பக் கலைஞர்களுடன் இருந்து பணிகளைச் செய்து முடித்தார். அந்த அளவுக்கு கடினமாக உழைத்திருக்கிறார். அவருக்கும் தயாரிப்பு நிறுவனம் சார்பாக நன்றியைத் தெரிவித்துக்கொள்கிறேன்.

இந்தப் படத்தில் பணியாற்றிய அனைத்து நடிகர்கள், தொழில்நுட்பக் கலைஞர்கள் மற்றும் ஊடக நண்பர்கள் அனைவருக்கும் நன்றி. மீண்டும் இப்படத்தின் வெற்றிக் கொண்டாட்டத்தில் அனைவரையும் சந்திப்போம். நன்றி, வணக்கம்.

நடிகை அபிராமி பேசியதாவது,

ஒரு காவல்துறை அதிகாரி கதாபாத்திரத்தில் நடிப்பது மிகவும் சவாலான விஷயம். அந்தக் கதாபாத்திரத்தை அபிராமி மிகவும் அழகாகவும் சிறப்பாகவும் செய்திருக்கிறார் என்று பாராட்டிய அனைவருக்கும் நன்றி. இந்தப் படத்தில் நடிக்க அழைப்பு வந்தபோது, வெற்றி நடிக்கிறார் என்று தெரிந்ததும் கதை நிச்சயம் சிறப்பாக இருக்கும் என்ற நம்பிக்கை ஏற்பட்டது. இயக்குநர் தீரன் கதையை மிகவும் தெளிவாகவும் வித்தியாசமாகவும் விளக்கினார். ஒரு அறிவியல் ஆசிரியர் பாடம் நடத்துவது போல அவ்வளவு நேர்த்தியாகக் கதையை எடுத்துச் சொன்னார்.

முன்பு சில படங்களில் நடிப்பதற்கான வாய்ப்புகள் உறுதியாகும் என்று எதிர்பார்த்தும், கடைசி நேரத்தில் கைநழுவிய அனுபவங்கள் எனக்கு இருந்திருக்கின்றன. அதனால் இந்தப் படத்திலும் எனது கதாபாத்திரம் உறுதியாக இருக்கிறதா என்று பலமுறை இயக்குநரிடம் கேட்டேன். ஆனால் அவர் என் மீது முழு நம்பிக்கையுடன் இருந்தார். இந்தக் கதாபாத்திரத்திற்கு அபிராமிதான் நடிக்க வேண்டும் என்று தயாரிப்பாளரும் இயக்குநரும் உறுதியாக முடிவெடுத்து என்னை அழைத்தது ஒரு நடிகையாக எனக்கு மிகப்பெரிய மகிழ்ச்சியையும் நம்பிக்கையையும் அளித்தது. அதற்காக இருவருக்கும் எனது மனமார்ந்த நன்றியைத் தெரிவித்துக்கொள்கிறேன்.

இதுவரை எனக்குக் கிடைத்த வாய்ப்புகளையும், எனது பயணத்தையும் ஊடகங்கள்தான் தொடர்ந்து மக்களிடம் கொண்டு சேர்த்திருக்கின்றன. அடுத்த படம் எப்போது, ஏன் புதிய படங்களில் நடிக்கவில்லை என்று தொடர்ந்து கேட்டு எனக்கு ஊக்கம் அளித்திருக்கிறீர்கள். அதற்காக அனைவருக்கும் நன்றி. ‘பிளாக் கோல்டு’ திரைப்படம் வெளியாகும்போதும் ஊடக நண்பர்கள் ஆதரவும் ஒத்துழைப்பும் அளிக்க வேண்டும். உங்கள் ஆதரவின் மூலம்தான் எங்களைப் போன்ற கலைஞர்கள் தொடர்ந்து வளர முடியும் என்று நம்புகிறேன்.

இயக்குநர் தீரன் அருண்குமார் பேசியதாவது,

கிட்டத்தட்ட ஐந்து ஆண்டுகளுக்குப் பிறகு மீண்டும் இதே அரங்கில் உங்களைச் சந்திப்பது, காணாமல் போன குழந்தை மீண்டும் கிடைத்தது போன்ற உணர்வைத் தருகிறது. எனது முதல் படமான ‘தீர்ப்புகள் விற்கப்படும்’ படத்தின் ஆடியோ வெளியீட்டு விழாவில்தான் உங்களைச் சந்தித்தேன். தற்போது எனது இரண்டாவது படமான ‘பிளாக் கோல்டு’ மூலம் மீண்டும் உங்கள் முன்னால் நிற்கிறேன். முதல் படத்திற்குப் பிறகு அடுத்த படத்திற்கான முயற்சியில் இருந்தபோது, தெலுங்கில் ஒரு பெரிய பட்ஜெட் படத்திற்கான கதையைச் சொல்லியிருந்தேன். சில கட்டங்களைக் கடந்தும் அந்தப் படம் தொடங்க முடியாத சூழல் ஏற்பட்டது. அதனால் தமிழுக்கே திரும்பி, புதுமையான ஒரு கதையைத் திரைப்படமாக உருவாக்க முடிவு செய்தேன். பல தயாரிப்பாளர்களிடம் கதையைச் சொன்னபோதும் யாரும் துணிவாக முன் வரவில்லை.  மலையாள சினிமா போல வித்தியாசமான கதைகளுக்கான வரவேற்பு தமிழிலும் இன்னும் அதிகரிக்க வேண்டும் என்ற எண்ணம் எனக்கு இருந்தது. அந்தச் சூழலில்தான் ‘பிளாக் கோல்டு’ உருவானது.

இந்தப் படத்திற்கு வெற்றியைத் தேர்வு செய்ததற்குக் காரணம், குறைந்த பட்ஜெட்டிலும் குறைந்த நாட்களிலும் பணியாற்றக்கூடிய அதே நேரத்தில் கதைக்கு ஏற்ற கதையின் நாயகனாக அவர் இருப்பார் என்று நம்பியதுதான். அவரிடம் கதையைச் சொன்னதும் மிகவும் மகிழ்ச்சியுடன் ஏற்றுக்கொண்டு உடனடியாகப் படத்தைத் தொடங்கலாம் என்றார். படத்தின் நாயகி உடல்நலக் குறைவால் இன்றைய நிகழ்ச்சிக்கு வர முடியவில்லை. அபிராமி காவல்துறை அதிகாரி கதாபாத்திரத்தில் வித்தியாசமான தோற்றத்தில் நடித்திருக்கிறார். அருள் டி. சங்கர் நடித்த சுருள் ஆயுதச் சண்டைக் காட்சிக்காக எட்டு முதல் ஒன்பது நாட்கள் பயிற்சி அளித்தோம். படத்தில் சுமார் ஒன்றரை நிமிடம் மட்டுமே வரும் அந்தக் காட்சிக்காகவும் அவர் கடுமையாக உழைத்தார். அதற்காக ஸ்டண்ட் மாஸ்டர் “மெட்ரோ” மகேஸ் மாஸ்டருக்கு நன்றியை சொல்லிக்கொள்கிறேன். ஏ. வெங்கடேஷ் போன்ற அனுபவமிக்க கலைஞர் எங்களுடன் மிகவும் நட்பாகவும் அர்ப்பணிப்புடனும் பணியாற்றியது மகிழ்ச்சி. சபீதா ராய், கராத்தே வெங்கடேஷ், ஜப்பான் குமார் உள்ளிட்ட மற்ற நடிகர்களும் கதாபாத்திரங்களுக்கு ஏற்ற பங்களிப்பை வழங்கியுள்ளனர். குறிப்பாக ஜப்பான் குமாருக்கு வசனங்கள் இல்லாத கதாபாத்திரம். பேசாமல் உணர்வுகளை வெளிப்படுத்துவது எளிதான விஷயமல்ல; அதை அவர் சிறப்பாகச் செய்திருக்கிறார்.

ஒரு திரைப்படத்தின் தரத்தைத் தீர்மானிப்பதில் ஒளிப்பதிவாளர், எடிட்டர், இசையமைப்பாளர் ஆகிய மூவரின் பங்களிப்பும் மிகவும் முக்கியமானது. இந்தப் படத்தில் ஒளிப்பதிவாளர் சந்தோஷ் குமார் தனது முதல் படத்திலேயே சிறப்பாகப் பணியாற்றியிருக்கிறார். எடிட்டர் தினேசிற்கும் எனக்கும் நல்ல புரிதல் இருந்ததால் படத்தைச் சிறப்பாக முடிக்க முடிந்தது. இசையமைப்பாளர் கவாஸ்கர் அவினாஷும் படத்திற்கு மிகவும் வலு சேர்த்துள்ளார். எனது நண்பர் ராம் பல ஆண்டுகளாகப் பழக்கமானவர்; அவரையும் இந்தப் படத்தின் மூலம் சரியான நேரத்தில் அறிமுகப்படுத்தியிருக்கிறேன். புதிய கலைஞர்களை நம்பி வாய்ப்பளிப்பதில் எங்களுக்கு மகிழ்ச்சி. படத்தைப் பார்த்தவர்கள் நல்ல முறையில் கருத்துகளைத் தெரிவித்துள்ளனர். ஆனால் இறுதித் தீர்ப்பு நவம்பர் 13ஆம் தேதி படம் வெளியாகும்போது ரசிகர்களிடமிருந்தும் ஊடகங்களிடமிருந்தும்தான் கிடைக்கும். சிறிய படம், பெரிய படம் என்ற பிரிவுகளில் எனக்கு நம்பிக்கை இல்லை. கதையின் உள்ளடக்கம்தான் ஒரு படத்தின் மதிப்பைத் தீர்மானிக்கிறது. நல்ல உள்ளடக்கம் கொண்ட படங்களைத் தமிழ் ரசிகர்கள் எப்போதும் ஆதரித்திருக்கிறார்கள்; அதே ஆதரவை எங்களுக்கும் வழங்குவீர்கள் என்று நம்புகிறேன்.

இந்தப் படத்தின் மிகப்பெரிய பலம் தயாரிப்பாளர் மூர்த்தி சார்தான். ஆரம்பம் முதல் இன்று வரை அவர் ஒரு தயாரிப்பாளராக மட்டுமல்லாமல், மிகப்பெரிய சினிமா ரசிகராகவே என்னுடன் பயணித்திருக்கிறார். படத்தில் வரும் காட்சிகள், வசனங்கள் என அனைத்தையும் ஆர்வத்துடன் கேட்டுத் தெரிந்துகொள்வார். அதிகாலை ஐந்து மணிக்குப் படப்பிடிப்பை முடித்துவிட்டுச் சென்றாலும், அன்றைய படப்பிடிப்பு எப்படி நடந்தது, காட்சிகள் நன்றாக வந்ததா என்று விசாரிப்பார். இப்படிப்பட்ட சினிமா மீதான ஆர்வம் கொண்ட தயாரிப்பாளர்கள் தமிழ் சினிமாவுக்கு மிகவும் அவசியம். பணம் இல்லாமல் பல நல்ல கதைகள் திரைப்படமாக முடியாமல் நிற்கின்றன. அப்படிப்பட்ட சூழலில் எனக்கு மூர்த்தி சார் கிடைத்தது மிகப்பெரிய பாக்கியம். எனது வெற்றியை விட அவர் வெற்றி பெற வேண்டும் என்பதுதான் எனக்கு முக்கியம். அவர் வெற்றி பெற்றால் என்னைப் போன்ற பல புதிய இயக்குநர்களுக்கும் வாய்ப்பளிக்க முடியும். இந்தப் படத்தின் தொடக்கத்திலிருந்து பல தடைகளைச் சந்தித்தோம். படம் பாதியில் நின்றுவிடும், அடுத்த கட்டத்திற்குச் செல்லாது, வியாபாரம் ஆகாது என்று பலரும் கூறினார்கள். ஆனால் ஒவ்வொரு தடையையும் கடந்து படத்தை முடித்தோம். தற்போது வியாபாரமும் முடிந்து, திரையரங்க வெளியீட்டிற்குத் தயாராக இருக்கிறோம்.

இந்தப் படத்தைத் தொடங்கியதும் இதே வளாகத்தில் உள்ள பிள்ளையார் கோயிலில் சிறிய பூஜை நடத்தினோம். அப்போது இந்தப் படம் நிற்கும் என்று கூறியவர்கள் பலர் இருந்தார்கள். ஆனால் இன்று அனைத்து தடைகளையும் கடந்து உங்கள் முன்னால் வந்திருக்கிறோம். படத்தின் அடுத்தகட்ட விளம்பரப் பணிகளையும் தொடங்கவிருக்கிறோம். எங்கள் குழுவினர் ஒவ்வொருவரும் தங்களால் முடிந்த உழைப்பைக் கொடுத்து ஒரு கட்டடத்தைச் செங்கல் செங்கலாக உருவாக்குவது போல இந்தப் படத்தை உருவாக்கியிருக்கிறோம். அதன் வெற்றியைத் தீர்மானிப்பது உங்கள் ஆதரவுதான். நவம்பர் 13ஆம் தேதி வெளியாகும் ‘பிளாக் கோல்ட்’ படத்தைப் பார்த்து எனது உழைப்பும், எங்கள் குழுவின் முயற்சியும் உங்களுக்குப் பிடித்திருக்கிறதா என்பதை அறிய ஆவலாக இருக்கிறேன். மீண்டும் உங்கள் அனைவரையும் வெற்றிக் கொண்டாட்டத்தில் சந்திப்பேன் என்ற நம்பிக்கையுடன் நன்றி தெரிவித்துக்கொள்கிறேன்.

நடிகர் வெற்றி பேசியதாவது,

‘பிளாக் கோல்டு’ திரைப்படம் எனது திரைப்பயணத்தில் மிகவும் முக்கியமான படம். பொதுவாக பிளாக் கோல்டு என்றால் கச்சா எண்ணெய் அல்லது மிளகு என்று பலரும் நினைக்கலாம். ஆனால் இந்தப் படத்தில் நாங்கள் குறிப்பிடுவது மனிதர்களின் தலைமுடியைத்தான். தலைமுடிக்குப் பின்னால் ஒவ்வொரு நாளும் நடைபெறும் மிகப்பெரிய வணிகமும், அதன் பின்னணியில் இயங்கும் வலையமைப்பும்தான் இந்தப் படத்தின் கதைக்களம். இந்தப் பின்னணியில் ஒரு குடும்பக் கதையையும், அப்பா – மகன் இடையிலான உணர்வுப்பூர்வமான உறவையும் இணைத்து இயக்குநர் தீரன் உருவாக்கியிருக்கிறார்.

இந்தக் கதையை முதன்முதலில் கேட்டபோதே எனக்கு மிகவும் பிடித்திருந்தது. வித்தியாசமான கதைக்களத்துடன் உணர்வுகளுக்கும் முக்கியத்துவம் கொடுத்து இப்படம் உருவாகியுள்ளது. இதில் பணியாற்றிய அனைத்து தொழில்நுட்பக் கலைஞர்கள், சக நடிகர்கள், இயக்குநர் குழுவினர் மற்றும் தயாரிப்பாளர் மூர்த்தி உள்ளிட்ட அனைவருக்கும் எனது வாழ்த்துகளையும் நன்றியையும் தெரிவித்துக்கொள்கிறேன்.

‘பிளாக் கோல்டு’ திரைப்படம் நவம்பர் 13ஆம் தேதி திரையரங்குகளில் வெளியாகிறது. அனைவரும் படத்தைப் பார்த்துவிட்டு உங்களது கருத்துகளைப் பகிர்ந்துகொள்ளுங்கள். எப்போதும் அளிக்கும் ஆதரவைப் போல இந்தப் படத்திற்கும் ஊடக நண்பர்களும் ரசிகர்களும் ஆதரவு தர வேண்டும். நன்றி.

இப்படத்திற்கு சந்தோஷ் குமார் வீராசாமி ஒளிப்பதிவு செய்துள்ளார். கவாஸ்கர் அவினாஷ் இசையமைத்துள்ளார். இப்படம் வரும் நவம்பர் 13-ம் தேதி திரையரங்குகளில் வெளியாகும் எனப் படக்குழு அதிகாரப்பூர்வமாக அறிவித்துள்ளது.

எனிமி ஆஃப் தி ஸ்மக்ளர் – திரைப்பட விமர்சனம்

எழுதி, இயக்கி, தயாரித்தவர்: டி. சமய முரளி

எஸ்.ஆர். ட்ரீம் ஸ்டுடியோஸ் சார்பில் டி. சமய முரளி எழுதி, இயக்கி, தயாரித்துள்ள திரைப்படம் எனிமி ஆஃப் தி ஸ்மக்ளர்.

இப்படத்தில் ஜே.டி. சக்கரவர்த்தி – லிங்கம், லால் – மாத்யூ பாய், ராதிகா சரத்குமார் – சாரதா, சரண் சக்தி – அமர், பாலா சரவணன் – தீனா, ஸ்மேஹா – பவித்ரா, காளி வெங்கட் – செல்வம், ஜாஃபர் சாதிக் – ஜாஃபர், மைம் கோபி – ராஜன், டி. சமய முரளி – முரளி கிருஷ்ணா ஆகியோர் முக்கிய கதாபாத்திரங்களில் நடித்துள்ளனர்.

சென்னைத் துறைமுகத்தின் பின்னணியில் தொடங்குகிறது படத்தின் கதை.

துறைமுகத்தில் பணிபுரியும் செல்வம் (காளி வெங்கட்), அவருடன் இணைந்து செயல்படும் எளிய சுங்கத்துறை அனுமதி முகவரான தீனா (பாலா சரவணன்) ஆகியோரின் வாழ்க்கையைச் சுற்றி கதை நகர்கிறது.

செல்வத்தின் தங்கை பவித்ரா (ஸ்மேஹா), துறைமுகப் பின்னணியில் இயங்கும் இளைஞனான அமரை (சரண் சக்தி) காதலிக்கிறாள். அமரின் வறுமையான குடும்பச் சூழலும், கடன் சுமைகளும் அவளுக்குத் தெரிந்திருந்தாலும், அவன் மீது கொண்ட காதலில் எந்த மாற்றமும் இல்லை.

மறுபுறம், குடும்பத்தின் கடன் சுமையால் அமர் கடுமையான நெருக்கடியில் தவிக்கிறான். தந்தையின் வீட்டை மீட்கக்கூட முடியாத நிலையில், கடன் கொடுத்தவர்களால் தனது தாய் சாரதா (ராதிகா சரத்குமார்) அவமானப்படுத்தப்படுவதைப் பார்த்து மனம் உடைகிறான். இந்த அவமானமும் இயலாமையும் அவனுக்குள் ஆழமான கோபத்தை ஏற்படுத்துகின்றன.

உடனடியாகப் பணம் சம்பாதித்து குடும்பப் பிரச்சினைகளிலிருந்து மீள வேண்டும் என்ற எண்ணத்தில் அமரும் அவனது நண்பன் தீனாவும் குறுக்கு வழியில் பணம் சம்பாதிக்கத் திட்டமிடுகின்றனர்.

அதே நேரத்தில், வெளிநாட்டிலிருந்து போதைப்பொருள் கடத்தல் நெட்வொர்க்கை இயக்கும் மாத்யூ பாய் (லால்), இந்தியாவில் அதன் செயல்பாடுகளைக் கவனிக்கும் லிங்கம் (ஜே.டி. சக்கரவர்த்தி) ஆகியோர் இணைந்து மிகப்பெரிய கடத்தல் திட்டத்தைத் தீட்டுகின்றனர்.

இந்திய இளைஞர்களைத் தங்களது கடத்தல் வலையில் சிக்க வைத்து, சென்னைத் துறைமுகம் வழியாக சுமார் ₹25,000 கோடி மதிப்பிலான போதைப்பொருட்கள் அடங்கிய பிரம்மாண்ட கண்டெய்னரை நாட்டிற்குள் சட்டவிரோதமாகக் கொண்டுவர அவர்கள் திட்டமிடுகின்றனர்.

இந்த ஆபத்தான கடத்தல் கும்பலுடன் அமரும் தீனாவும் கைகோர்க்கின்றனர். துறைமுகத்திலிருந்து அந்த கண்டெய்னரை வெளியே கொண்டு வருவதற்காக, தீனாவைத் தனது திட்டத்திற்குப் பகடைக்காயாகப் பயன்படுத்துகிறான் அமர். போலி ஆவணங்கள் மூலம் ₹25,000 கோடி மதிப்பிலான அந்த கண்டெய்னருக்குச் சுங்கத்துறை அனுமதியையும் இருவரும் பெற்றுவிடுகின்றனர்.

ஆனால், யாரும் எதிர்பாராத ஒரு திருப்பம் நிகழ்கிறது. துறைமுகத்திலிருந்து வெளியேறிய அந்தப் பிரம்மாண்ட கண்டெய்னர் திடீரென மர்மமான முறையில் காணாமல் போகிறது!

இவ்வளவு பெரிய மதிப்புள்ள சரக்கு மாயமானதால் ஆத்திரமடையும் மாத்யூ பாய் மற்றும் லிங்கத்தின் ஆட்கள், இதற்குப் பின்னணியில் இருப்பதாகக் கருதப்படும் அமர், தீனா மற்றும் செல்வத்தின் குடும்பத்தினரைக் குறிவைக்கின்றனர்.

மறுபுறம், போலி ஆவணங்கள் மூலம் நடைபெற்ற இந்த மிகப்பெரிய கடத்தலைக் கண்டுபிடிக்க சுங்கத்துறை அதிகாரி முரளி கிருஷ்ணா (டி. சமய முரளி) தீவிர விசாரணையில் இறங்குகிறார். இந்த வழக்கில் செல்வம் முதன்மையான சந்தேக வளையத்திற்குள் சிக்கிக் கொள்கிறார்.

தான் செய்த தவறின் தீவிரத்தை உணரும் அமர், ஒருபுறம் கடத்தல் கும்பலின் கொடூரமான தாக்குதல்களையும், மறுபுறம் சட்டத்தின் பிடியையும் எதிர்கொள்ள வேண்டிய சூழலுக்குத் தள்ளப்படுகிறான்.

தவறான பாதையில் சென்ற அமர், அதிலிருந்து மீண்டு தனது நண்பன் தீனா, செல்வம் மற்றும் குடும்பத்தினரைக் காப்பாற்றினானா?

காணாமல் போன ₹25,000 கோடி மதிப்பிலான போதைப்பொருள் கண்டெய்னர் எங்கே சென்றது? சர்வதேசக் கடத்தல் கும்பலின் பின்னணியில் இருக்கும் மாத்யூ பாய் மற்றும் லிங்கத்தின் சதித்திட்டத்தை முரளி கிருஷ்ணா எவ்வாறு முறியடிக்கிறார்? அமரும் தீனாவும் இறுதியில் சட்டத்தின் முன் என்னவாகிறார்கள்?

இந்தக் கேள்விகளுக்கான பதில்களுடன், கடத்தல், துரோகம், பணத்தாசை, குற்ற உணர்வு மற்றும் குடும்பப் பாசம் ஆகிய அம்சங்களை இணைத்து விறுவிறுப்பாக நகர்கிறது ENEMY OF THE SMUGGLER திரைப்படத்தின் மீதிக்கதை.

ஜி.வி பிரகாஷ் குமார் வெளியிட்ட தகப்பன் படத்தின் ஃபர்ஸ்ட் சிங்கிள் ‘தங்கப்புள்ள’ பாடல்

மகனைப் பிரிந்து வாழும் தந்தையின் அன்பையும் ஏக்கத்தையும் உணர்வுபூர்வமாக வெளிப்படுத்தும் பாடல்!

நடிகர் ஜீவா நடிப்பில், லார்க் ஸ்டூடியோஸ் தயாரிப்பில், இயக்குநர் ரா. வெங்கட் இயக்கத்தில் உருவாகி வரும் ‘தகப்பன்’ திரைப்படத்திலிருந்து ‘தங்கப்புள்ள’ எனும் முதல் பாடலை (First Single) இசையமைப்பாளரும் நடிகருமான ஜி. வி பிரகாஷ் குமார் வெளியிட்டுள்ளார். மார்ஷல் ராபின்சன் இசையமைப்பில், பாடலாசிரியர் பா. விஜய் எழுதியுள்ள இப்பாடலை முருகவேல் பாடியுள்ளார். தந்தை – மகன் உறவின் ஆழத்தையும், பிரிவின் வலியையும், தந்தையின் அளவற்ற அன்பையும் உணர்வுபூர்வமாக வெளிப்படுத்தும் இப்பாடல் ரசிகர்களின் கவனத்தை ஈர்த்துள்ளது.

பொதுவாகத் தமிழ் சினிமாவில் அப்பா – மகன் அல்லது அப்பா – மகள் இருவரும் ஒன்றாக இருக்கும் தருணங்களையும், அவர்களுக்கிடையேயான பாசத்தையும் வெளிப்படுத்தும் பாடல்கள் அதிகம் இடம்பெற்றுள்ளன. ஆனால், மகனைப் பிரிந்து வாழும் தந்தை ஒருவர், தனது மகனின் வாழ்க்கையில் நிகழும் மகிழ்ச்சியான தருணங்களைத் தொலைவிலிருந்து யாருக்கும் தெரியாமல் ரசிக்கும் உணர்வுகளை  மையமாகக் கொண்டு ‘தங்கப்புள்ள’ பாடல் உருவாகியுள்ளது. மகனுடன் நேரடியாகத் தனது அன்பைப் பகிர்ந்துகொள்ள முடியாத ஒரு தந்தையின் ஏக்கத்தையும், மகனின் மகிழ்ச்சியை மறைந்திருந்து ரசிக்கும் பாசத்தையும் இப்பாடல் அழகாக வெளிப்படுத்துகிறது.

மென்மையான இசை, பா. விஜய்யின் உணர்வுப்பூர்வமான வரிகள், முருகவேலின் குரல் ஆகிய அனைத்தும் இணைந்து பாடலுக்கு உயிரூட்டியுள்ளன. தந்தையின் மனதில் புதைந்திருக்கும் அன்பையும், வார்த்தைகளால் வெளிப்படுத்த முடியாத உணர்வுகளையும் காட்சிகளுடன் இணைத்து வெளிப்படுத்தும் இப்பாடல், குடும்ப உறவுகளின் முக்கியத்துவத்தை மீண்டும் நினைவூட்டுகிறது. தற்போது வெளியாகியுள்ள ‘தங்கப்புள்ள’ பாடல் ரசிகர்கள் மத்தியில் வரவேற்பைப் பெற்று வருகிறது.

மதுரை மற்றும் அதன் சுற்றுவட்டாரப் பகுதிகளைப் பின்னணியாகக் கொண்டு, அப்பா – மகன் உறவு, குடும்பப் பாசம் மற்றும் மனித உணர்வுகளை மையமாகக் கொண்டு இப்படம் உருவாகியுள்ளது.

‘தெனாவட்டு’ படத்திற்குப் பிறகு முழுக்க முழுக்க கிராமத்துப் பின்னணியில் ஜீவா நடிக்கும் இப்படத்தில், ரஜிஷா விஜயன் கதாநாயகியாக நடிக்கிறார். K. குமார் தயாரிக்கும் இப்படத்திற்கு M. சுகுமார் ஒளிப்பதிவு செய்கிறார். நாகூரான் ராமச்சந்திரன் படத்தொகுப்புப் பணிகளைக் கவனிக்கிறார்.

இப்படத்தின் இசை வெளியீட்டு உரிமையை திங்க் மியூசிக் பெற்றுள்ளது. மேலும், படம் முடிவடைவதற்கு முன்பே படத்தின் சாட்டிலைட் ஒளிபரப்பு உரிமையை ZEE தமிழ் நிறுவனம் மற்றும் OTT உரிமையை Zee5 நிறுவனம் கைப்பற்றியுள்ளது குறிப்பிடத்தக்கது. டிசம்பர் 24-ம் தேதி வெளியாகவுள்ள இப்படத்தின் மீதான எதிர்பார்ப்பு அதிகரித்து வரும் நிலையில், தற்போது வெளியாகியுள்ள ‘தங்கப்புள்ள’ பாடலும் படத்திற்கு கூடுதல் கவனத்தை ஈர்த்துள்ளது.

லவ் 3. ஓ திரைப்படத்தின் மோஷன் போஸ்டர் வெளியீட்டு விழா!

அவர்கள் வாய்ப்பு கொடுக்காததால்தான் நான் இன்று வளர்ந்து இருக்கிறேன்: ‘லவ் 3. ஓ’ (Love 3. O ) திரைப்படத்தின் அறிமுக இயக்குநர் ஆர்னிகா கண்ணீர் மல்க பேச்சு!

வாய்ப்பு கொடுக்காதவர்களுக்கு நன்றி: ‘லவ் 3. ஓ’ (Love 3. O ) புதுமுக இயக்குநர் ஆர்னிகா கண்ணீருடன் உருக்கம்!

முழுக்க முழுக்க இன்ஸ்டாகிராம் பிரபலங்களைக் கொண்டு உருவாக்கப்பட்டு இருக்கும் படம் ‘லவ் 3. ஓ’

மூன்று தலைமுறையிலும் அந்தந்தத் தலைமுறையினர் காதலை எப்படி அணுகுகிறார்கள் என்பதைக் கூறுகிற இப்படம், காலமாற்றத்தில் வெளிப்படும் காதலின் மாறுபட்ட பரிமாணத்தைச் சித்தரிக்கும் வகையில் உருவாகியுள்ளது.

இந்தப் படத்தில் இன்ஸ்டாகிராமில் ‘ரீல்ஸ் அக்கா’ என்று பிரபலமான ஆர்னிகா கதை ,திரைக்கதை, வசனம், பாடல்கள், கலை இயக்கம், உடை அலங்காரம், இணைத் தயாரிப்பு என்று பல்வேறு பொறுப்புகளை ஏற்றதுடன் கதாநாயகியாகவும் நடித்து இயக்கியிருக்கிறார்.

இந்தப் படத்தில் தயாரிப்பாளர் சிவகுமார் முக்கியமான வேடம் ஏற்று நடித்துள்ளார்.

நாயகி ஆர்னிகாவுடன் இன்ஸ்டாகிராம் பிரபலங்கள் கோயம்புத்தூர் மாப்ள, கே என் ஸ்மைலி எனப்படும் கார்த்திகேயன் என இருவரும் பிரதான வேடங்களில் நடித்துள்ளனர்.

இப்படத்திற்கு வேதை பா. மகேஷ் ஒளிப்பதிவு செய்துள்ளார். வைகுந்த் ஸ்ரீனிவாசன் இசையமைத்துள்ளார். அரவிந்த் படத்தொகுப்பு செய்துள்ளார்.
நிர்வாகத் தயாரிப்பாளராக பிரசன்ன குமார் பங்கேற்றுள்ளார் .

மங்கி மைண்ட்ஸ் என்டர்டெய்ன்மென்ட் சார்பில் சிவகுமார் தயாரித்துள்ளார்.

இந்தப் படத்தின் மோஷன் போஸ்டர் வெளியீடு மற்றும் பத்திரிகையாளர் சந்திப்பு சென்னை பிரசாத் லேபில் இன்று நடைபெற்றது. இந்த சந்திப்பில் தமிழ்நாடு திரைப்பட இயக்குநர்கள் சங்கத்தின் செயலாளர் இயக்குநர் ஆர். வி. உதயகுமார் ,பொருளாளர் இயக்குநர் பேரரசு ,நடிகை வனிதா விஜயகுமார்,நடிகர் கூல் சுரேஷ் ஆகியோர் சிறப்பு விருந்தினர்களாகக் கலந்து கொண்டனர்.

ஊடக சந்திப்பில் படத்தின் கதாநாயகியும் இயக்குநருமான ஆர்னிகா பேசும் போது,

“இந்தப் படத்தில் பணியாற்றி பல வகையில் ஒத்துழைப்பு கொடுத்த படக்குழுவினர் அனைவருக்கும் முதலில் எனது நன்றியைத் தெரிவித்துக் கொள்கிறேன்.
நாங்கள் இன்ஸ்டாகிராம் உலகத்தில் இருந்து திரைப்படத்துறைக்கு வந்திருக்கிறோம்.

இன்று பிரபலமாக இருக்கும் ஏஐ – ஐ வைத்து நாங்கள் ஒரு கதையை உருவாக்கி இந்தப் படத்தை எடுத்திருக்கிறோம். ஏ ஐ தான் படத்தின் முக்கியமான உள்ளடக்கமாக இருப்பதால் இன்று காட்சிகளைத் திரையிடவில்லை. மோஷன் போஸ்டர் தயார் செய்து இந்த விழாவை ஏற்பாடு செய்திருக்கிறோம்.

அந்தக் காலத்தில் தாத்தா பாட்டி சொல்வதை வைத்துத் தகவல்களை அறிந்து கொள்வோம். பிறகு நமது அக்கம் பக்கம் நண்பர்கள் சொல்வதை வைத்துத் தெரிந்து கொள்வோம்.
அதற்குப் பிறகு தொலைக்காட்சி, வானொலி, எஃப் எம் ,ஒளியும் ஒலியும் போன்றவை மூலம் தெரிந்து கொண்டோம்.
அதற்குப் பிறகு வந்த யூடியூப் மூலம் நிறைய கற்றுக் கொண்டோம்.
அதற்குப் பிறகு இன்ஸ்டாகிராம் வந்த பிறகு அக்கம் பக்கத்தில் ,அடுத்த தெருவில் ,உலகத்தில் என்ன நடக்கிறது என்பதெல்லாம் தெரிந்து கொண்டார்கள்.
அதற்கு பிறகு சாட் ஜி பி டி வந்தது .அதற்குப் பிறகு நமது ஒவ்வொரு அசைவையும் அதில் தெரிந்து கொள்ள ஆரம்பித்தோம்.
நமது உணர்ச்சிகளை எல்லாம் சாட் ஜிபிடி யிடம் எப்போது பகிர்ந்து கொள்ள ஆரம்பித்தோமோ அப்போது ஏ ஐ யின் மீது காதல் வந்தது.இன்று ஏ ஐ பிரபலமாகிவிட்டது.

அப்படிப்பட்ட ஏஐ பெண்ணை இந்தப் படத்தின் கதாநாயகன் காதலிக்கிறான். அவர்களது காதல் எப்படி இருக்கிறது?
அந்தப் பெண்ணை திருமணம் செய்து கொள்கிறானா? பிரிந்து விடுகிறார்களா என்பது தான் கதை.

90களில் காதல் எப்படி இருந்தது அதை அவர்கள் எப்படி எதிர்கொண்டார்கள்? 2 கே கிட்ஸ் அதாவது இரண்டாயிரத்தில் காதல் எப்படி இருந்தது ? அதை அவர்கள் எப்படி எதிர்கொண்டார்கள்?அதே காதல் எதிர்காலத்தில் எப்படி இருக்கும் ? அதை எப்படி எதிர்கொள்ளப் போகிறார்கள் என்பதைக் கூறியிருக்கிறோம். பரமசிவன் பார்வதி காதல் அனைவருக்கும் தெரியும்.அவர்கள் காதலுக்கே முன்னுதாரணமாக இருப்பவர்கள்.

இங்கே நடக்கும் எல்லா காதல் பிரச்சினைகளையும் பார்த்துவிட்டு கயிலாயத்திலிருந்து இறங்கி வந்த சிவன் இதற்கான தீர்வாக என்ன சொல்கிறார் என்பதுதான் இந்த ‘லவ் 3.ஓ’ படத்தின் கதை.

இந்த உலகத்தை இணைப்பதே ஊடகங்கள் தான். அவர்கள் மூலம்தான் பெரிய பெரிய நட்சத்திரங்கள் எல்லாம் உருவாகி இருக்கிறார்கள்.அந்த நட்சத்திரங்கள் எல்லாம் அவர்களால் தான் மக்களிடம் போய் சேர்ந்திருக்கிறார்கள். எங்களுக்கும் அப்படி ஒரு ஆதரவைக் கொடுத்து மக்களிடம் சேர்க்க வேண்டும் என்று கேட்டுக்கொள்கிறேன்.நான் வாய்ப்புக்காக ஏழாண்டுகளாக ஆயிரம் ஆடிசனுக்குப் போயிருப்பேன்.
நீங்கள் மூக்கை அறுவை சிகிச்சை செய்து கொண்டு வாருங்கள், அதன் பிறகு ஒரு போட்டோ ஷூட் எடுத்துக்கொண்டு வாருங்கள் என்றார்கள். அப்படி நான் அறுவை சிகிச்சை செய்திருந்தால்? ஒரு குறும்படத்திற்குக் கூட நான் இரண்டு ஆண்டுகள் அவர்களைப் பின் தொடர்ந்து கொண்டிருந்தேன்.அந்த குறும்பட வாய்ப்பை இரண்டு ஆண்டுகள் தாமதமாக முடிக்காமல் முன்பே கொடுத்திருந்தால்?

ஒரு கண்டன்ட் வீடியோவிற்குச் சின்ன வசனம் பேசுவதற்குக் கூட நான் நாலு மணி நேரம் செலவிடுவேன்.
அவர்கள் நல்லதொரு கண்டன்ட் இருக்கிற மாதிரி ஒரு வாய்ப்பு கொடுத்திருந்தால்? நான் தேடி அலைந்து கொண்டிருந்த போது ஒரு தொலைக்காட்சித் தொடரில் நடிக்க வாய்ப்பு கொடுத்திருந்தால் ? பலமுறை தேடிச் சென்று கொண்டிருந்தபோது ஒரு திரைப்படத்தில் ஒரு துணைநடிகையாக நடிப்பதற்கு வாய்ப்பு கொடுத்திருந்தால்?

இன்று ‘லவ் 3. ஓ’ என்கிற படத்தில் நான் கதாசிரியராக பாடல் ஆசிரியராக உடையலங்கார நிபுணராக கலை இயக்குநராக இணைத் தயாரிப்பாளராக கதாநாயகியாக இயக்குநராக என்று உருவாகி இருக்க மாட்டேன்.

இவை எல்லாவற்றிற்கும் அவர்களுக்குத்தான் நன்றி சொல்ல வேண்டும்.அன்று நான் வாய்ப்பு தேடி அலைந்த போது வாய்ப்பு கொடுக்காதவர்களுக்கு நன்றி.

நமது வாழ்க்கையில்
எதிர்மறையாக ஒன்று நடக்கிறது என்றால், ஒன்று தாமதமாகிக் கொண்டே இருக்கிறது என்றால் ஒரு நல்ல விஷயத்திற்காகத்தான் அது அப்படிச் செல்கிறது என்று சொல்வார்கள்.
நாம் வாய்ப்பு கேட்டுத்தானே பல படிகள் ஏறிக் கொண்டிருந்தோம், இன்று நான் ஒரு நடிகையாக ஒரு இயக்குநராக ஆகியிருக்கிறோம் என்கிற போது இப்போது நினைத்துப் பார்த்தால் ஒன்று தோன்றுகிறது.
நமக்கு ஒன்று தேவைப்படுகிறது என்றால் நாம் தான் அதைச் செய்ய வேண்டும். வேறு யாரும் நமக்கு உதவி செய்ய வர மாட்டார்கள். நாம் ஒன்றை அடைவதற்கு நாம் தான் முயல வேண்டும்; போராட வேண்டும். அப்படி உங்களுக்கு எது வேண்டுமானாலும் நீங்கள் தான் போராட வேண்டும். யாரும் போராட வர மாட்டார்கள். இப்படிப் போராடி வந்து நான் நின்று இருக்கும் இந்த மேடையையே ஒரு வெற்றியாகத்தான் நினைக்கிறேன் .கண்டிப்பாக மக்கள் ஆதரவு தருவார்கள். இந்தப் படத்தில் நான் பணியாற்றி இருக்கிறேன் என்றால் சில குறைகள் இருக்கத்தான் செய்யும். போகப் போக அதைத் திருத்திக் கொள்கிறோம். அனைவருக்கும் நன்றி. அனைவரும் நன்றாகச் செய்திருக்கிறார்கள். இங்கே இந்த விழாவிற்கு சிறப்பு விருந்தினராக வந்து எங்களை வாழ்த்தி இருக்கும் திரை உலகப் பிரமுகர்கள் அனைவருக்கும் மிக்க நன்றி.

எங்களது ரீல்ஸ் களைப் பார்த்துதான் மக்கள் இவ்வளவு தூரம் எங்களைக் கொண்டு வந்திருக்கிறார்கள். இதிலும் எங்களுக்கு ஆதரவு கொடுக்காமலா இருப்பார்கள்? கண்டிப்பாகச் செய்வார்கள். எங்களுடைய சிறந்ததைக் கூடுமானவரையில் நாங்கள் செய்திருக்கிறோம். காலத்துக்கு ஏற்ற மாதிரி மக்களை சந்தோஷப்படுத்துவது போல ஒரு விஷயத்தை செய்திருக்கிறோம். அது கண்டிப்பாகப் பிடிக்கும் என்று நினைக்கிறேன். அனைவரும் ஆதரவு கொடுங்கள் .

எனக்கு எல்லா கதாநாயகர்கள் கதாநாயகிகளையும் பிடிக்கும். இது நாள் வரை கூட்டத்துக்குள் ஒருத்தியாக இருந்து கொண்டு கைதட்டிக் கொண்டிருந்தேன். இப்போது இந்த மேடைக்கு வந்திருக்கிறேன்.
எனக்கு ஒரு வெற்றி வாய்ப்பைக் கொடுத்தால் வெளியில் இருக்கும் பல திறமைசாலிகளையும் உள்ளே கொண்டு வருவேன்.

நான் பல இடங்களுக்கு வாய்ப்பு தேடி அலைந்திருக்கிறேன்.அதன் வலி எனக்குத் தெரியும். என்னைப் போல் உள்ளவர்களுக்கும் வாய்ப்பு கிடைக்க வேண்டும் என்றால் எனக்கு ஆதரவு கொடுங்கள். அதற்கு ஒரு சின்ன வாய்ப்பை கொடுங்கள் என்று கேட்டுக்கொள்கிறேன்’ என்றார் . அவர் பேசும்போது கண்கள் கலங்கின.

இந்த விழாவில் படக்குழுவினருடன் சிறப்பு விருந்தினர்களும் கலந்து கொண்டு பேசினர்.

ஹரிஷ் கல்யாண் நடிக்கும் ‘நூறு கோடி வானவில்’ திரைப்படம் நவம்பர் 6-ஆம் தேதி தமிழ் ZEE5-இல் பிரீமியர் ஆகிறது

சசி எழுதி இயக்கியுள்ள ‘நூறு கோடி வானவில்’ திரைப்படத்தில் ஹரிஷ் கல்யாண் மற்றும் சித்தி இத்னானி முன்னணி கதாபாத்திரங்களில் நடித்துள்ளனர். மாதவ் மீடியா சார்பில் பாலாஜி கபா மற்றும் அருண் அருணாசலம் புரொடக்ஷன் சார்பில் அருண் அருணாசலம் தயாரித்துள்ள இப்படம், காதல், உறவுகள் மற்றும் உணர்வுப்பூர்வமான முடிவுகளை மையமாகக் கொண்டுள்ளது. இப்படம் நவம்பர் 6, 2026 அன்று தமிழ் ZEE5 தளத்தில் நேரடியாக வெளியாகிறது. கட்டணம் செலுத்திப் பார்க்கும் (Pay-per-view) முறையில் இப்படத்தைக் காணலாம்.

‘சொல்லாமலே’ திரைப்படத்தின் மூலம் இயக்குநராக அறிமுகமானது முதல், அவரது சமீபத்திய வெற்றிப் படமான ‘நூறு சாமி’ வரை, மேலும் ‘பூ’, ‘பிச்சைக்காரன்’, ‘சிவப்பு மஞ்சள் பச்சை’ போன்ற பாராட்டுப் பெற்ற திரைப்படங்கள் மூலம் சசி தமிழ் சினிமாவில் தனக்கென ஒரு தனித்துவமான இடத்தைப் பிடித்துள்ளார். மனித உணர்வுகள், உறவுகள் மற்றும் அன்றாட வாழ்க்கையின் சிக்கல்களை ஆழமாகப் பேசும் கதைகளை உருவாக்குவதில் அவர் தனித்துவம் பெற்றவர்.

‘நூறு கோடி வானவில்’ திரைப்படத்தின் மூலம், காதலின் சிக்கல்கள், உறவுகளில் மனிதர்கள் கொண்டிருக்கும் எதிர்பார்ப்புகள் மற்றும் அவர்களின் எதிர்காலத்தைத் தீர்மானிக்கக்கூடிய கடினமான முடிவுகள் ஆகியவற்றை ஆராயும் காதல் கதையுடன் இயக்குநர் சசி மீண்டும் வந்துள்ளார். நேரடியாக OTT தளத்தில் வெளியாகும் இந்தத் திரைப்படத்தின் மூலம், சசியின் சமீபத்திய படைப்பை ரசிகர்கள் தங்கள் வீடுகளில் இருந்தபடியே டிஜிட்டல் தளத்தில் கண்டுகளிக்கும் வாய்ப்பைப் பெறுகின்றனர்.

‘நூறு கோடி வானவில்’ திரைப்படத்தின் மையக்கருவாக ஒரு காதல் உறவு அமைகிறது. இதில் வரும் முக்கியக் கதாபாத்திரங்கள் தங்களுக்கிடையிலான மாறுபட்ட எதிர்பார்ப்புகள், தனிப்பட்ட மனக்குழப்பங்கள் மற்றும் தங்களைச் சுற்றியுள்ளவர்களின் தாக்கம் ஆகியவற்றை எதிர்கொள்கின்றனர். காதலையும் குடும்ப உணர்வுகளையும் இணைத்துச் சொல்லும் இப்படம், வாழ்க்கையின் சூழ்நிலைகளும் மனிதர்கள் எடுக்கும் முடிவுகளும் காதலை எவ்வாறு சோதிக்கின்றன என்பதை ஆராய்கிறது.

ZEE5-இல் இப்படத்தின் பிரீமியர் குறித்து ZEE5-இன் கருத்து

ZEE5 நிறுவனத்தின் தமிழ், தெலுங்கு மற்றும் மலையாளப் பிரிவுகளுக்கான வணிகத் தலைவர் லாயிட் சி. சேவியர் கூறியதாவது:

“சில கதைகள் நம்முடன் நீண்ட காலம் தங்கிவிடுகின்றன. ஏனெனில், அவை நாம் அனைவரும் அனுபவித்த உணர்வுகளைப் பிரதிபலிக்கின்றன. ‘நூறு கோடி வானவில்’ அத்தகைய ஒரு திரைப்படம். காதல் மற்றும் உறவுகளுடன் தொடர்புடைய மென்மையான உணர்வுகள், மகிழ்ச்சி மற்றும் நிச்சயமற்ற தன்மை ஆகியவற்றை இந்தப் படம் அழகாகப் பதிவு செய்கிறது.

காதல் திரைப்படங்கள் எப்போதும் ரசிகர்களிடம் ஆழமான வரவேற்பைப் பெற்றுள்ளன. ‘நூறு கோடி வானவில்’ திரைப்படத்தின் மூலம், உறவுகளின் உணர்வுப்பூர்வமான யதார்த்தங்களை ஆராயும் ஒரு மனதைத் தொடும் காதல் கதையை தமிழ் ZEE5 வழியாக ரசிகர்களிடம் கொண்டு வருகிறோம்.

உணர்வுப்பூர்வமாக உண்மைத்தன்மை கொண்ட கதைகளின் மீது ரசிகர்கள் அதிக ஆர்வம் காட்டும் இந்தக் காலகட்டத்தில், காதலையும் நமது வாழ்க்கையைத் தீர்மானிக்கும் முடிவுகளையும் நுட்பமாகச் சித்தரிப்பதன் மூலம் ‘நூறு கோடி வானவில்’ தனித்துவம் பெறுகிறது. வழக்கமான காதல் கதைகளைக் கடந்து, நேர்மையாகவும் மனித உணர்வுகளுக்கு நெருக்கமாகவும் உறவுகளின் சிக்கல்களை இந்தத் திரைப்படம் ஆராய்கிறது.

எங்களது பிரீமியம் தமிழ் உள்ளடக்கங்களின் பட்டியலில் இந்தத் திரைப்படத்தைச் சேர்ப்பதில் நாங்கள் பெருமை கொள்கிறோம். இது ரசிகர்களின் மனதில் நீண்ட காலம் நீடிக்கும் தாக்கத்தை ஏற்படுத்தும் என்று நம்புகிறோம்.”

திரைப்படம் குறித்து இயக்குநர் சசி

இப்படத்தின் எழுத்தாளர் மற்றும் இயக்குநர் சசி தனது கருத்தைப் பகிர்ந்துகொண்டபோது கூறியதாவது:

“‘நூறு கோடி வானவில்’ என்பது காதலைப் பற்றியும், மனிதர்கள் வளர வளர உறவுகள் எவ்வாறு மாறுகின்றன, அவர்களின் எதிர்பார்ப்புகள் எவ்வாறு மாறுகின்றன, வாழ்க்கை அவர்களுக்கு எத்தகைய கடினமான முடிவுகளை முன்வைக்கிறது என்பதையும் பற்றிய கதை.

தங்களுடைய உணர்வுகளைக் கையாள்வதுடன், தங்களைச் சுற்றியுள்ள யதார்த்தங்களையும் எதிர்கொள்ள வேண்டிய இரு மனிதர்களின் உணர்வுப்பூர்வமான பயணத்தை ஆராய விரும்பினேன். காதல் என்பது எப்போதும் நேரான பாதையில் செல்லும் பயணமாக இருப்பதில்லை. நாம் எடுக்கும் முடிவுகள், நாம் அக்கறை கொண்டிருக்கும் மனிதர்களின் வாழ்க்கையில் நீண்டகாலத் தாக்கத்தை ஏற்படுத்தக்கூடும்.

ரசிகர்கள் இந்தக் கதாபாத்திரங்களுடனும் அவர்களின் அனுபவங்களுடனும் தங்களை இணைத்துப் பார்த்து, தங்களுடைய வாழ்க்கையின் சில அம்சங்களை இந்தத் திரைப்படத்தில் கண்டறிவார்கள் என்று நம்புகிறேன்.”

திரைப்படத்தில் நடித்த அனுபவம் குறித்து ஹரிஷ் கல்யாண்

இப்படத்தின் முன்னணி நடிகரான ஹரிஷ் கல்யாண் கூறியதாவது:

“‘நூறு கோடி வானவில்’ திரைப்படத்தில் வினோ என்ற கதாபாத்திரத்தில் நடித்தது எனக்கு அர்த்தமுள்ள அனுபவமாக இருந்தது. ஏனெனில், அந்தக் கதாபாத்திரத்தின் பயணம் காதல் மற்றும் உறவுகளுடன் தொடர்புடைய பல்வேறு உணர்வுகளை ஆராய்கிறது.

நாம் வளர வளர, காதலைப் பற்றிய நமது புரிதலும் மாறுகிறது. அதேபோல், நமது முன்னுரிமைகளும் எதிர்பார்ப்புகளும் மாறுகின்றன. இந்தக் கதையைச் சிறப்பானதாக மாற்றுவது என்னவென்றால், இது காதல் என்ற கருத்தை மட்டும் மையமாகக் கொள்ளாமல், உணர்வுகளும் சூழ்நிலைகளும் சிக்கலாகும்போது மனிதர்கள் எதிர்கொள்ளும் கடினமான முடிவுகளையும் ஆராய்கிறது.

இந்தத் திரைப்படம் தமிழ் ZEE5-இல் பிரீமியர் ஆவதன் மூலம், இன்னும் அதிகமான ரசிகர்கள் இந்தக் கதையை அனுபவிக்கும் வாய்ப்பைப் பெறுவார்கள் என்பதில் மகிழ்ச்சியடைகிறேன்.”

திரைப்படம் குறித்து சித்தி இத்னானி

இப்படத்தின் முன்னணி நடிகையான சித்தி இத்னானி தனது கருத்தைப் பகிர்ந்துகொண்டபோது கூறியதாவது:

“‘நூறு கோடி வானவில்’ திரைப்படம் உறவுகளை ஆழமான மனித உணர்வுகளுடன் அணுகுகிறது. காதல் அழகானதாக இருக்கலாம். ஆனால், அது நிச்சயமற்ற தன்மை, மாறுபட்ட எதிர்பார்ப்புகள் மற்றும் எப்போதும் எளிதாக எடுக்க முடியாத முடிவுகளையும் கொண்டுவருகிறது.

இந்தத் திரைப்படத்தில் என்னைக் கவர்ந்தது, உணர்வுகளின் நுட்பமான வேறுபாடுகளை வெளிப்படுத்தவும், தனிப்பட்ட முடிவுகளும் நம்மைச் சுற்றியுள்ள மனிதர்களும் நமது உறவுகளை எவ்வாறு பாதிக்கின்றனர் என்பதை ஆராயவும் கிடைத்த வாய்ப்புதான்.

ரசிகர்கள் இந்தக் கதாபாத்திரங்களுடன் தங்களை இணைத்துப் பார்த்து, அவர்களின் மனக்குழப்பங்களைப் புரிந்துகொண்டு, காதல் மற்றும் வாழ்க்கை குறித்து தங்களுக்கான பார்வைகளைப் பெற்றுக்கொள்வார்கள் என்று நம்புகிறேன். இந்தத் திரைப்படம் தமிழ் ZEE5 வழியாக ரசிகர்களைச் சென்றடைவதில் நான் மகிழ்ச்சியடைகிறேன்.”

‘நூறு கோடி வானவில்’ திரைப்படம் நவம்பர் 6, 2026 முதல் தமிழ் ZEE5-இல் பிரத்தியேகமாகக் கிடைக்கும்.


ZEE5 பற்றி

ZEE5 என்பது இந்தியாவில் உருவாக்கப்பட்ட மிகப்பெரிய வீடியோ ஸ்ட்ரீமிங் தளமாகவும், தெற்காசிய உள்ளடக்கங்களை உலகளாவிய ரசிகர்களிடம் கொண்டு சேர்க்கும் தளமாகவும் விளங்குகிறது. 190-க்கும் மேற்பட்ட நாடுகளில் உள்ள பார்வையாளர்களைச் சென்றடையும் இந்தத் தளம், Zee Entertainment Enterprises Ltd. நிறுவனத்தின் டிஜிட்டல் பொழுதுபோக்கு தளமாகச் செயல்படுகிறது.

மொழிக்கு முன்னுரிமை அளிக்கும் தள அனுபவம், குறிப்பிட்ட மொழிகளுக்கான உள்ளடக்கத் தொகுப்புகள் மற்றும் தனிப்பயனாக்கப்பட்ட அனுபவங்கள் ஆகியவற்றை அடிப்படையாகக் கொண்டு ZEE5 செயல்படுகிறது. இந்தி, தமிழ், தெலுங்கு, பெங்காலி, மலையாளம், கன்னடம் மற்றும் மராத்தி என ஏழு மொழிகளில் உள்ளடக்கங்களை வழங்குகிறது.

அசல் படைப்புகள், இந்திய மற்றும் சர்வதேசத் திரைப்படங்கள், தொலைக்காட்சித் தொடர்கள், நேரடி விளையாட்டு ஒளிபரப்புகள், குழந்தைகளுக்கான உள்ளடக்கங்கள், செய்திகள், நேரலைத் தொலைக்காட்சி நிகழ்ச்சிகள் மற்றும் குறுந்தொடர்கள் எனப் பல்வேறு வகையான உள்ளடக்கங்களைக் கொண்ட விரிவான தொகுப்பை ZEE5 வழங்குகிறது. இதன் மூலம், உலகெங்கிலும் உள்ள இந்தியர்களுக்கு பல்வேறு மொழிகளில் பொழுதுபோக்கு நிகழ்ச்சிகளையும் நேரடி விளையாட்டு அனுபவங்களையும் வழங்கும் தளமாக இது விளங்குகிறது.

2034-ஆம் ஆண்டு வரை FIFA அமைப்புடன் Zee Entertainment மேற்கொண்டுள்ள நீண்டகாலக் கூட்டாண்மையின் மூலம், FIFA-வின் முக்கிய கால்பந்துப் போட்டிகளும் இந்தியாவில் ZEE5 தளத்தில் ஒளிபரப்பப்படுகின்றன. இதில் FIFA உலகக் கோப்பை 2026™ மற்றும் 2030 போட்டிகளும் அடங்கும்.

‘கொலையாளி அல்ல..! நான் காதலன்..!’ என்ற அதிரடியான வாசகத்துடன் வெளியான நடிகர் ஷாருக்கானின் ‘கிங் – KING’ படத்தின் புதிய போஸ்டர்!

இந்தியா முழுவதிலும் ரசிகர்களின் பெரும் எதிர்பார்ப்பில் இருக்கும் பாலிவுட் சூப்பர் ஸ்டாரான ஷாருக்கான் நடிக்கும் ‘கிங்’ திரைப்படத்தின் புதிய போஸ்டர் வெளியிடப்பட்டிருக்கிறது. இது ரசிகர்கள் மத்தியில் பெரும் அதிர்வை ஏற்படுத்தி வருகிறது.

இந்த போஸ்டரில் ஷாருக்கானின் தோற்றம் ரசிகர்களை வெகுவாக வசீகரித்திருக்கிறது. அதிலும் ஆக்‌ஷன் + தீவிரம் + சிறிதளவு காதல் ஆகியவற்றை ஒன்றிணைத்திருப்பதுடன், உதடுகளுக்கு இடையே ஒரு ரோஜாப்பூவையும், கண்களில் கனல் கக்கும் தீப்பொறியையும், கைகளில் துப்பாக்கியையும் ஏந்தியபடி தோன்றும் ஷாருக்கானின் பிரமிக்க வைக்கும் தோற்றம் ரசிகர்களின் எதிர்பார்ப்பை அதிகரித்திருக்கிறது. அத்துடன், ஆக்‌ஷன் திரில்லர் என்டர்டெய்னராக உருவாகியிருக்கும் இந்தத் திரைப்படத்தில் அவரது மூர்க்கமான அவதாரத்தையும் இந்தப் போஸ்டர் பிரதிபலிப்பதால் ரசிகர்கள் உற்சாகமடைந்திருக்கிறார்கள்.

‘கொலையாளி அல்ல; நான் காதலன்!’ என்ற கவனம் ஈர்க்கும் வாசகத்துடன் வெளியாகியிருக்கும் இந்தப் போஸ்டர், ‘கிங்’ படத்தைப் பற்றிய எதிர்பார்ப்பை அதிகரிக்கச் செய்திருப்பதுடன், இந்த அவதாரத்தில் ஷாருக்கானை வெள்ளித்திரையில் கண்டு ரசிப்பதற்கு ரசிகர்கள் ஆவலுடன் காத்திருப்பதற்கான மற்றொரு காரணத்தையும் அளித்திருக்கிறது.

இயக்குநர் சித்தார்த் ஆனந்த் இயக்கத்தில் உருவாகியுள்ள ‘கிங்’ திரைப்படத்தில் ஷாருக்கான், சுஹானா கான், அபிஷேக் பச்சன், தீபிகா படுகோனே, அனில் கபூர், ராணி முகர்ஜி, ஜாக்கி ஷெராஃப் உள்ளிட்ட பலர் நடித்திருக்கிறார்கள். மேலும், இந்தத் திரைப்படத்தில் நடிகை கரீனா கபூர் சிறப்புத் தோற்றத்தில் நடித்திருக்கிறார். சச்சித் பாலோஸ் ஒளிப்பதிவு செய்திருக்கும் இந்தத் திரைப்படத்திற்கு அனிருத் மற்றும் சச்சின் – ஜிகர் ஆகியோர் இணைந்து இசையமைத்திருக்கிறார்கள். பிரம்மாண்டமான பட்ஜெட்டில் ஆக்‌ஷன் திரில்லராக உருவாகியிருக்கும் இந்தத் திரைப்படத்தை ரெட் சில்லீஸ் என்டர்டெய்ன்மென்ட் மற்றும் மார்ஃபிளிக்ஸ் பிக்சர்ஸ் நிறுவனங்கள் சார்பில் தயாரிப்பாளர்கள் கௌரி கான், சித்தார்த் ஆனந்த் மற்றும் மம்தா ஆனந்த் ஆகியோர் இணைந்து தயாரித்திருக்கிறார்கள்.

வரும் டிசம்பர் மாதம் 24ஆம் தேதி முதல் உலகம் முழுவதும் திரையரங்குகளில் வெளியாகும் என அறிவிக்கப்பட்டிருக்கும் இந்தத் திரைப்படத்தின் புதிய போஸ்டர் வெளியாகி, பார்வையாளர்களின் ஆர்வத்தை அதிகரிக்கச் செய்திருக்கிறது.

இதனிடையே, ‘பதான்’ படத்தின் ஆயிரம் கோடி ரூபாய் வசூலைத் தொடர்ந்து, மீண்டும் ஷாருக்கான் – சித்தார்த் ஆனந்த் கூட்டணி அமைத்திருப்பதாலும், நடிகர் ஷாருக்கானின் மகளான சுஹானா கான் இப்படத்தின் மூலம் திரையுலகில் முழு நீள திரைப்படத்தில் அறிமுகமாவதாலும், ‘கிங்’ படத்திற்கு ரசிகர்களிடத்திலும் சர்வதேசத் திரையுலக வணிகர்கள் மத்தியிலும் பெரும் எதிர்பார்ப்பு ஏற்பட்டிருக்கிறது என்பது குறிப்பிடத்தக்கது.

மித்துன் மாணிக்கம், கதையின் நாயகனாக அழுத்தமான வேடத்தில் நடித்திருக்கும் ‘ஃபேமிலி பாய்- Family Boy’

நடிகர் சூர்யாவால் ராமே ஆண்டாலும் ராவணே ஆண்டாலும் திரைப்படத்தில் கதாநாயகனாக அறிமுகமான இயக்குனர் மித்துன் மாணிக்கத்தின் திரைப்படம் ஃபேமிலி பாய் (Family Boy) – டீசர் வெளியீடு

நடிகர் சூர்யாவால் தமிழ் திரையுலகில் கதையின் நாயகனாக அறிமுகப்படுத்தப்பட்ட நடிகரும், இயக்குநருமான மித்துன் மாணிக்கம், கதையின் நாயகனாக அழுத்தமான வேடத்தில் நடித்திருக்கும் ‘ஃபேமிலி பாய்- Family Boy’ திரைப்படத்தின் டீசர் வெளியிடப்பட்டிருக்கிறது.

இயக்குநர் மித்துன் மாணிக்கம் இயக்கத்தில் உருவாகியுள்ள ‘ஃபேமிலி பாய்- Family Boy’ திரைப்படத்தில் மித்துன் மாணிக்கம், எம். சுகுமார், சரண் சுதாகரன், அனுகிரஹா எஸ். நம்பியார் , நிகிலா சங்கர், அனிதா சம்பத், ‘பசங்க’ சிவகுமார், சிவம், அருள் தாஸ், பி. எல். தேனப்பன் உள்ளிட்ட பலர் நடித்திருக்கிறார்கள். கார்த்திக் கே  கதிரவன் ஒளிப்பதிவு செய்திருக்கும் இந்த திரைப்படத்திற்கு நிர்மல் JP இசையமைத்திருக்கிறார். படத்தொகுப்பு பணிகளை ஜிஜேந்திரன். V கவனிக்க, கலை இயக்கத்தை C. K. முஜிபுர் ரஹ்மான் மேற்கொண்டிருக்கிறார். உண்மை சம்பவத்தை தழுவி ஃபேமிலி டிராமா ஆக்சன் திரில்லராக தயாராகி இருக்கும் இந்த திரைப்படத்தை மெக்கானிக் பிக்சர்ஸ் – (Mechanic Pictures) நிறுவனம் சார்பில் தயாரிப்பாளர் மித்துன் மாணிக்கம் தயாரித்திருக்கிறார். அவருடன் மில்லினியல்ஸ் மூவி புரொடக்ஷன் LLP – Milliennials Movie Production L L P நிறுவனம் சார்பில் தயாரிப்பாளர்கள் முஹம்மத் கனி ஃபைசல்- டாக்டர் கே. அருண் ஆறுமுகம் ஆகியோர் இணைந்து தயாரித்திருக்கிறார்கள். இந்த திரைப்படத்தை தமிழகம் முழுவதும் பலூன் பிக்சர்ஸ் நிறுவனம் வழங்குகிறது.

எதிர்வரும் டிசம்பர் மாதம் 11-ஆம் தேதி முதல் உலகம் முழுவதும் திரையரங்குகளில் வெளியாகும் என அறிவிக்கப்பட்டிருக்கும் இந்த திரைப்படத்தின் டீசர் வெளியிடப்பட்டிருக்கிறது.  சிலப்பதிகாரத்தில தொடங்கி சிங்கார சென்னை வரைக்கும், ஒரு பொருள் தொலையும் போது… அத தொலச்சவனுக்குத்தான் அதோட வலி புரியும்… என தொடங்கும் இந்த டீசர்,  2020 ஆம் ஆண்டு ஒரு குடும்பத்தில் நிகழ்ந்த உண்மை சம்பவத்தை அடிப்படையாகக் கொண்டு உருவாகி உள்ளது. காணாமல் போன ஒரு பொருளைத் தேடி நாயகன் மேற்கொள்ளும் ஒரு நாள் பயணத்தில் நிகழும் சுவாரசியமான சம்பவங்களையும், எதிர்பாராத திருப்பங்களையும்…. இந்த டீசர் வெளிப்படுத்துகிறது. அத்துடன் இதன் பின்னணி இசை ,காட்சி அமைப்பு  என அனைத்து அம்சங்களும் ரசிகர்களை வெகுவாக கவர்ந்திருப்பதால்.. படத்தைப் பற்றிய எதிர்பார்ப்பு அதிகரித்திருக்கிறது.

முகேன் ராவ் நடிக்கும் ‘மைலோ’ (Milo) படத்தின் டைட்டில் மற்றும் ஃபர்ஸ்ட் லுக் வெளியானது!

செல்ல நாயை மையமாகக் கொண்டு உருவாகியுள்ள ‘மைலோ’ திரைப்படத்தின் டைட்டில் மற்றும் ஃபர்ஸ்ட் லுக் போஸ்டர் வெளியாகி ரசிகர்கள் மத்தியில் வரவேற்பைப் பெற்று வருகிறது. SSR Entertainment சார்பில் K I சுரேஷ் தயாரித்துள்ள இப்படத்தில் முகேன் ராவ் (Mugen Rao) கதாநாயகனாக நடித்துள்ளார். இப்படத்தை கவின் மூர்த்தி எழுதி இயக்கியுள்ளார்.

தற்போது வெளியிடப்பட்டுள்ள ஃபர்ஸ்ட் லுக் போஸ்டரில் முகேன் ராவ் அடர் நீல நிற லெதர் ஜாக்கெட் அணிந்து கம்பீரமாக நிற்க, அவருக்கு அருகில் தங்க நிறத்திலான செல்ல நாய் இடம்பெற்றுள்ளது. மலைப்பகுதியையும் இயற்கைச் சூழலையும் பின்னணியாகக் கொண்ட போஸ்டரில், ‘MORE THAN A PET A SILENT WITNESS’ என்ற வாசகம் இடம்பெற்றிருப்பது படத்தின் மர்மம் நிறைந்த கதைக்களம் குறித்த எதிர்பார்ப்பை அதிகரித்துள்ளது.

18 ஆண்டுகளுக்கு முன்பு நடைபெற்ற ஒரு குற்றத்தையும், ‘மைலோ’ எனும் செல்ல நாயையும் மையமாகக் கொண்டு இப்படத்தின் கதை அமைக்கப்பட்டுள்ளது. பல ஆண்டுகளுக்கு முன்பு நடந்த குற்றத்தின் பின்னணியில் மறைந்திருக்கும் உண்மையைச் செல்ல நாயின் உதவியுடன் நாயகன் எவ்வாறு கண்டுபிடிக்கிறார் என்பதே இப்படத்தின் மையக்கருவாகும். அனைத்து விதமான கமர்ஷியல் அம்சங்களுடன், அனைத்து ரசிகர்களும் ரசிக்கும் வகையில் இப்படம் உருவாகியுள்ளது.

முகேன் ராவுடன் தேஜு அஸ்வினி, இளவரசு, முனீஷ்காந்த், பிக் பாஸ் புகழ் ஜனனி, ‘எங்கள் அண்ணா’ படத்தின் மூலம் கவனம் பெற்ற இந்திரஜா, 20 ஆண்டுகளுக்குப் பிறகு தமிழ் திரைப்படத்திற்கு ரீ-என்ட்ரி கொடுத்து முக்கிய வேடத்தில் நடித்துள்ளார். சுரேஷ் மேனன், ஆதித்யா கதிர் உள்ளிட்டோர் முக்கிய கதாபாத்திரங்களில் நடித்துள்ளனர்.

சென்னை, ஊட்டி, கொல்லிமலை, மூணாறு ,திருவனந்தபுரம், மலேசியா உள்ளிட்ட பகுதிகளில் இப்படத்தின் படப்பிடிப்பு முழுவதுமாக நிறைவடைந்துள்ளது. ஜென் மார்ட்டின் இசையமைக்க, ஜிஜு சன்னி ஒளிப்பதிவு செய்துள்ளார். வெங்கட் ராஜன் படத்தொகுப்புப் பணிகளைக் கவனித்துள்ளார். உமா சங்கர் – ஜெயமுருகன் கலை இயக்கத்தைக் கையாண்டுள்ளனர். கவின் மூர்த்தி, சந்திரன் வசனங்களை எழுதியுள்ளனர். ஏ. ராஜா இணை இயக்குநராகப் பணியாற்றியுள்ளார். மணி சந்திரா, விஜி நடன அமைப்பையும், ஃபீனிக்ஸ் பிரபு, மிராக்கிள் மைக்கேல் சண்டைப் பயிற்சியையும் மேற்கொண்டுள்ளனர்.

‘மைலோ’ படத்தின் இசை வெளியீடு மற்றும் திரையரங்க வெளியீட்டுத் தேதி குறித்த அறிவிப்புகள் விரைவில் வெளியாகும் என எதிர்பார்க்கப்படுகிறது. செல்ல நாயின் துணையுடன் 18 ஆண்டுகளுக்கு முந்தைய குற்றத்தின் மர்மத்தை நாயகன் கண்டறியும் வித்தியாசமான கதைக்களத்துடன் உருவாகியுள்ள இப்படத்தின் டைட்டில் மற்றும் ஃபர்ஸ்ட் லுக் தற்போது ரசிகர்களின் கவனத்தை ஈர்த்து வருகிறது.

‘ரெபெல் ஸ்டார்’ பிரபாஸ் நடிக்கும் ‘ஃபௌஜி’ படத்தின் பிரத்யேகக் காணொளி வெளியீடு!

‘ரெபெல் ஸ்டார்’ பிரபாஸ் – இயக்குநர் ஹனு ராகவபூடி – மைத்ரி மூவி மேக்கர்ஸ் – டி-சீரிஸ் கூட்டணியில் தயாராகி, பான் இந்திய அளவில் பெரும் எதிர்பார்ப்பில் உள்ள ‘ஃபௌஜி’ திரைப்படத்திலிருந்து, ‘ஃபைல் நம்பர் 25’ என்ற பெயரில் சக்திவாய்ந்த வரலாற்றுப் பின்னணியைக் கொண்ட முன்னோட்டம் வெளியாகியுள்ளது. தேசபக்தியின் காவியக் கதையாகத் தயாராகியுள்ள இந்தத் திரைப்படம் 2027 மார்ச் 19ஆம் தேதி முதல் திரையரங்குகளில் வெளியாகிறது.

படைப்பாற்றல் மிக்க திரைப்பட இயக்குநரான ஹனு ராகவபூடி இயக்கத்தில், மைத்ரி மூவி மேக்கர்ஸ் நிறுவனத்தின் தயாரிப்பில், டி-சீரிஸ் நிறுவனம் வழங்கும் பிரம்மாண்டமான பீரியட் ஆக்‌ஷன் திரைப்படமான ‘ஃபௌஜி’யில், ‘ரெபெல் ஸ்டார்’ பிரபாஸ் இதுவரை ஏற்றிராத ஒரு கதாபாத்திரத்தில் நடித்திருக்கிறார். இந்தத் திரைப்படத்தைத் தயாரிப்பாளர்கள் நவீன் யெர்னேனி, Y. ரவிசங்கர், பூஷன் குமார் ஆகியோர் இணைந்து தயாரித்துள்ளனர். இந்தப் படத்தின் தலைப்பு மற்றும் வெளியீட்டுத் தேதி தொடர்பான போஸ்டர்கள் ஏற்கெனவே ரசிகர்களிடையே வலுவான தாக்கத்தை ஏற்படுத்தியுள்ளன. இந்நிலையில், பிரபாஸின் பிறந்தநாளை முன்னிட்டு, தயாரிப்பாளர்கள் ‘ஃபைல் நம்பர் 25’ எனும் சக்திவாய்ந்த புதிய முன்னோட்டத்தை வெளியிட்டுள்ளனர். இது அவரது கதாபாத்திரத்தின் அடையாளம், புத்திசாலித்தனம், அசாதாரணமான நோக்கம் ஆகியவற்றைப் பற்றிய சுவாரசியமான விவரங்களை வெளிப்படுத்துகிறது.

இரண்டாம் உலகப் போரின் பின்னணியில் அமைந்துள்ள இந்த முன்னோட்டம், 1942 மே 29ஆம் தேதி பெர்லினில் நேதாஜி சுபாஷ் சந்திர போஸ் – அடால்ஃப் ஹிட்லர் ஆகியோருக்கு இடையே நடைபெற்ற வரலாற்றுச் சிறப்புமிக்க சந்திப்புடன் தொடங்குகிறது. இந்தியாவில் பிரிட்டிஷ் காலனி ஆதிக்கத்திற்கு எதிரான போராட்டத்தில், போஸ் ஜெர்மனியின் ஆதரவைக் கோருகிறார். இது, கிட்டத்தட்ட இரண்டு நூற்றாண்டு கால அடக்குமுறைக்குப் பிறகு சுதந்திரம் பெறுவதற்கான சாத்தியக்கூறுகள் குறித்த விறுவிறுப்பான உரையாடலுக்கு வழிவகுக்கிறது. இந்தியாவால் பிரிட்டிஷ் பேரரசை வெல்ல முடியுமா என்று ஹிட்லர் கேள்வி எழுப்புகிறார். அதற்குச் சுபாஷ் சந்திர போஸ், ‘சுதந்திரம் அடைவதற்கான உறுதியை ஒருபோதும் அணைக்க முடியாது’ என்று உறுதியாகக் கூறுகிறார்.

ராணுவ வலிமையைவிட உளவுத்துறை வலிமைமிக்கதாக நிரூபிக்க முடியும் என்று போஸ் வாதிடும்போது, இந்த உரையாடல் எதிர்பாராத சுவாரசியமான திருப்பத்தை அடைகிறது. தனது கருத்தை வலுப்படுத்தும் வகையில், கவனமாகத் திட்டமிடப்பட்ட செயல்பாடுகள் மூலம் பிரிட்டிஷ் உளவுத்துறைக்குள் பெரும் குழப்பத்தை ஏற்படுத்திவரும் ஓர் அசாதாரணமான இந்திய உளவாளியின் கதையை அவர் அறிமுகப்படுத்துகிறார். இந்த மர்மமான நபர், தனது அடையாளத்தை வெளிப்படுத்தாமல், ராணுவப் படைகளைத் திசைதிருப்பி, முக்கியப் பணிகளைச் சீர்குலைத்து, காலனித்துவ நிர்வாகத்தை மீண்டும் மீண்டும் சாமர்த்தியமாக முறியடித்தார் என கூறப்படுகிறது.

இந்தக் காட்சி, அந்தக் கதாபாத்திரத்தின் தனித்துவமான தகவல் தொடர்பு அமைப்பின் மூலம் அவருக்கு மற்றொரு வசீகரமான பரிமாணத்தை வழங்குகிறது. பகவத் கீதையால் ஈர்க்கப்பட்ட அந்த ரகசியக் குறியீடு, ஜெர்மனியின் ‘எனிக்மா’ குறியீட்டைவிடவும் புரிந்துகொள்வதற்கு மிகவும் கடினமானது என விவரிக்கப்படுகிறது. அந்த உளவாளியின் செல்வாக்கு அதிகரித்து வந்தபோதிலும், பிரிட்டிஷார் அவனது உண்மையான அடையாளத்தை அறியாமல் இருப்பதாக போஸ் வெளிப்படுத்துகிறார். இதன் மூலம், அந்த உளவாளி நிழலில் இயங்கும் ஒரு வலிமைமிக்க சக்தியாகச் சித்தரிக்கப்படுகிறார்.

‘ஃபைல் நம்பர் 25’ முன்னோட்டத்தின் மிகவும் ஈர்க்கக்கூடிய தருணங்களில் இந்த அடையாள வெளிப்பாடும் ஒன்றாகும். பிரிட்டிஷாரால் ‘ஃபௌஜி’ என அறியப்படும் அந்த வீரனின் உண்மையான பெயர் புதிராகவும் மர்மமாகவும் உள்ளது. 1932 முதல் காலனித்துவ அதிகாரிகளால் தேடப்பட்டுவரும் அவன், தனது தாய்நாட்டைப் பாதுகாப்பதையே நோக்கமாகக் கொண்ட அச்சமற்ற புரட்சியாளனாகச் சித்தரிக்கப்படுகிறான். பிடிபடாத அந்த உளவாளி தற்போது கல்கத்தாவில் பிரிட்டிஷ் ஆட்சிக்கு எதிரான தனது போராட்டத்தைத் தொடர்கிறான் என்றும் போஸ் விரிவாக எடுத்துரைக்கிறார்.

அந்தக் காட்சியின் இறுதியில் பிரபாஸின் அதிரடியான திரைத் தோற்றம் இடம்பெறுகிறது. காலனித்துவ அதிகாரத்திடம் சரணடைய மறுக்கும் இரக்கமற்ற புரட்சிவீரனாக அவர் உருமாறுகிறார். உதடுகளுக்கு இடையே ஒரு சிகரெட்டையும், கையில் ஒரு பெரிய துப்பாக்கியையும் ஏந்தியபடி, அவர் அப்பட்டமான ஆக்ரோஷத்தையும் எதிர்ப்பையும் வெளிப்படுத்துகிறார். பிரிட்டிஷாருக்குக் கடுமையாகச் சவால் விடுக்கும் அவரது தோற்றம் இந்த முன்னோட்டத்திற்கு முன்னதாய் அமைகிறது. மேலும், இந்தத் திரைப்படத்தில் பார்வையாளர்கள் எதிர்பார்க்கக்கூடிய கம்பீரமான திரைத் தோற்றம் மற்றும் தீவிரமான ஆக்‌ஷன் காட்சிகளின் சிறு தொகுப்பையும் இந்த முன்னோட்டம் வழங்குகிறது.

உடல் வலிமை மற்றும் போர்க்களத்தின் வீரதீரச் செயல்களைக் கடந்து, கதாநாயகனைப் பரந்த கண்ணோட்டத்தில் கட்டமைக்க முயல்வதே ‘ஃபைல் நம்பர் 25’ முன்னோட்டத்தைத் தனித்துவமாக்குகிறது. ரகசிய நடவடிக்கைகள், உளவுப் போர், குறியீட்டுத் தகவல் தொடர்பு மற்றும் வெளிப்படுத்தப்படாத அடையாளம் ஆகியவற்றுக்கு அளிக்கப்படும் முக்கியத்துவம், கதையில் சுவாரசியமான மர்ம அடுக்குகளை அறிமுகப்படுத்துகிறது. இரண்டாம் உலகப் போரின் பின்னணியை இந்திய சுதந்திரப் போராட்டத்துடன் இணைப்பதன் மூலம், இந்த முன்னோட்டம் ‘ஃபௌஜி’யைத் தனித்துவமான வரலாற்றுப் பின்னணியும் கற்பனைக்கு அப்பாற்பட்ட மையக் கதாபாத்திரமும் கொண்ட பீரியட் ஆக்‌ஷன் திரைப்படமாக நிலைநிறுத்துகிறது.

இயக்குநர் ஹனு ராகவபூடி வரலாற்றுத் தொடர்புகள், உளவு, தேசபக்தி மற்றும் தாக்கத்தை ஏற்படுத்தும் பிரம்மாண்டமான சண்டைக் காட்சிகள் ஆகியவற்றை ஒன்றிணைத்து, பிரபாஸை வழக்கத்திற்கு மாறான ஒரு கதாபாத்திரத்தில் நடிக்க வைத்திருப்பது இந்த முன்னோட்டத்தின் மூலம் தெரியவருகிறது. இந்த முன்னோட்டம் கதாநாயகனின் உலகத்தைப் பற்றிய ஒரு சிறிய பார்வையை மட்டுமே வழங்குகிறது. அவரது தோற்றம், செயல்படும் விதம், பிரிட்டிஷ் பேரரசால் பிடிக்க முடியாத எதிரியாக அவரை உருவாக்கிய நிகழ்வுகள் ஆகியவை குறித்த பல கேள்விகளுக்கு இது விடையளிக்காமல் விட்டுவிடுகிறது.

‘ஃபௌஜி’ திரைப்படத்தில் இமான்வி கதாநாயகியாக நடிக்கிறார். இவர்களுடன் அனுபம் கேர்,மிதுன் சக்கரபோர்த்தி, ஜெயப்பிரதா, பானு சந்தர் ஆகியோர் முக்கிய வேடங்களில் நடித்துள்ளனர். சுதீப் சட்டர்ஜி ISC ஒளிப்பதிவு செய்துள்ள இந்தத் திரைப்படத்திற்கு விஷால் சந்திரசேகர் இசையமைத்துள்ளார். படத்தொகுப்புப் பணிகளை கோத்தகிரி வெங்கடேஸ்வர ராவ் மேற்கொள்ள, தயாரிப்பு வடிவமைப்புப் பணிகளை அனில் விலாஸ் ஜாதவ் கவனித்துள்ளார்.

இந்த முன்னோட்டம், விறுவிறுப்பான பீரியாடிக் ஆக்‌ஷன் திரைப்படத்திற்கான எதிர்பார்ப்பை அதிகரித்துள்ளது. இந்தத் திரைப்படம் தமிழ், தெலுங்கு, மலையாளம், கன்னடம், இந்தி மற்றும் பெங்காலி ஆகிய மொழிகளில் 2027 மார்ச் 19ஆம் தேதி முதல் திரையரங்குகளில் வெளியாகிறது.

நடிகர்கள்:

பிரபாஸ், இமான்வி, மிதுன் சக்கரபோர்த்தி, அனுபம் கேர், ஜெயப்பிரதா, பானு சந்தர் மற்றும் பலர்.

தொழில்நுட்பக் குழு:

எழுத்து மற்றும் இயக்கம்: ஹனு ராகவபூடி
தயாரிப்பு நிறுவனம்: மைத்ரி மூவி மேக்கர்ஸ்
வழங்குபவர்கள்: குல்சன் குமார், பூஷன் குமார் மற்றும் டி-சீரிஸ்
தயாரிப்பாளர்கள்: நவீன் யெர்னேனி, Y. ரவிசங்கர் மற்றும் பூஷன் குமார்
ஒளிப்பதிவு: சுதீப் சட்டர்ஜி ISC
இசை: விஷால் சந்திரசேகர்
தயாரிப்பு வடிவமைப்பு: அனில் விலாஸ் ஜாதவ்
படத்தொகுப்பு: கோத்தகிரி வெங்கடேஸ்வர ராவ்
VFX: R. C. கமலக்கண்ணன்
நடன இயக்குநர்: பிரேம் ரக்ஷித்
ஆடை வடிவமைப்பாளர்கள்: ஷீத்தல் இக்பால் சர்மா, டி. விஜய் பாஸ்கர்
மக்கள் தொடர்பு: யுவராஜ்

Zion Films மற்றும் MRP Entertainment தயாரிப்பில் பிரபுதேவா – சிம்ரன் இணைந்து நடிக்கும் புதிய காதல் திரைப்படத்திற்கு ‘கமல் ஸ்ரீதேவி’ எனப் பெயரிடப்பட்டுள்ளது. !!

Zion Films சார்பில் சௌந்தர்யா ரஜினிகாந்த் மற்றும் MRP Entertainment இணைந்து வழங்கும் இப்படத்தை பசிலியான் நாசரேத், மகேஷ் ராஜ் பசிலியான் தயாரிக்கின்றனர். பிரபுதேவா, சிம்ரன் முதன்மைக் கதாபாத்திரங்களில் நடிக்கும் இப்படத்தில் மிதுன் ஜெய் சங்கர், ஸ்மேகா உள்ளிட்டோரும் இணைந்து நடிக்கின்றனர்.

ஏற்கெனவே Zion Films மற்றும் MRP Entertainment இணைந்து வழங்கிய ‘வித் லவ்’ திரைப்படம் பிரம்மாண்ட வெற்றியைப் பெற்றதைத் தொடர்ந்து, இரு நிறுவனங்களும் மீண்டும் இணைந்து இப்படத்தை தயாரிப்பது குறிப்பிடத்தக்கது.

குடும்பத்துடன் இணைந்து ரசிக்கும் வகையில், மனதை வருடும் வித்தியாசமான காதல் கதையாக ‘கமல் ஸ்ரீதேவி’ உருவாகிறது. மூணாறு மற்றும் சென்னையில் படப்பிடிப்பை ஒரே கட்டமாக நிறைவடைந்து, தற்போது இறுதிக்கட்டப் படப்பிடிப்புப் பணிகளில் பரபரப்பாக ஈடுபட்டுள்ளது.

இப்படத்தை கிருஷ்ணானந்த் கொட்டாரப்பட்டு எழுதி இயக்குகிறார். ஜி.வி. பிரகாஷ் குமார் இசையமைக்கிறார். சரண் வேலாயுதன் ஒளிப்பதிவு செய்கிறார். ராஜா ஆறுமுகம் படத்தொகுப்புப் பணிகளை மேற்கொள்கிறார். ராஜீவன் தயாரிப்பு வடிவமைப்பையும், சேகர் கலை இயக்கத்தையும் கவனிக்கின்றனர். அனுவர்தன் மற்றும் நவா ராஜ்குமார் ஆடை வடிவமைப்பாளர்களாகப் பணியாற்றுகின்றனர். மகேஷ் மேத்யூ சண்டைக் காட்சிகளை வடிவமைக்கிறார்.

கேமரா செந்தில் விளம்பரப் புகைப்படப் பணிகளையும், மணியன் படப்பிடிப்புத் தளப் புகைப்படப் பணிகளையும் மேற்கொள்கின்றனர். R.J. சுரேஷ் குமார் தயாரிப்பு மேலாளராகப் பணியாற்றுகிறார். கோபி பிரசன்னா விளம்பர வடிவமைப்பையும், சுரேன் ஜி மற்றும் அழகியகூத்தன் ஒலி வடிவமைப்பையும் கவனிக்கின்றனர். சிவகாந்த் தலைமை இணை இயக்குநராகவும், தினேஷ்.E இணை இயக்குநராகவும் பணியாற்றுகின்றனர். யுவராஜ் மக்கள் தொடர்புப் பணிகளைக் கவனிக்கிறார். பிரசாந்த் எக்செக்ட்யூவ் தயாரிப்பாளராகவும், சரத் J. சாமுவேல் இணைத் தயாரிப்பாளராகவும் பணியாற்றுகின்றனர்.

தமிழ் சினிமாவில் மாறுபட்ட கதைக்களங்களைக் கொண்ட திரைப்படங்களைத் தயாரித்து வரும் MRP Entertainment நிறுவனம், ‘குட் நைட்’, ‘லவ்வர்’, ‘டூரிஸ்ட் ஃபேமிலி’, ‘வித் லவ்’ ஆகிய படங்களின் வெற்றியைத் தொடர்ந்து தனது அடுத்த தயாரிப்பாக ‘கமல் ஸ்ரீதேவி’ திரைப்படத்தை உருவாக்குகிறது. இப்படத்தை Zion Films சார்பில் சௌந்தர்யா ரஜினிகாந்த் இணைந்து வழங்குகிறார்.

இப்படத்தின் தலைப்பு தற்போது வெளியாகியுள்ள நிலையில், படத்தின் அடுத்தடுத்த அறிவிப்புகள் குறித்த எதிர்பார்ப்பு அதிகரித்துள்ளது.